Na 28. Wostrowskim nalětnim běhu wubědźowaše so kónc měrca 436 atletow z cyłeje Hornjeje a srjedźneje Łužicy, z Drježdźan a wokoliny kaž tež z pomjeznych kónčin susodneje Pólskeje a Čěskeje.
Po Mužakowskim parkowym běhu běše Wostrowski lětuše druhe wurisanje a hódnoćenje za rjadnu lisćinu Wopačanski cup běharjow, kotryž hižo 15 lět přewjeduja. Jednotliwe distancy wurisanjow we Wostrowcu běchu 0,8 / 2,0 / 4 a 12 km. Na nich wubědźowachu so lubowarjo běhanja wot předšulskeho dźěsća hač k 83lětnemu wuměnkarjej. Mjez nimi bě tež zaso horstka serbskich sportowcow.
Na 0,8 km doběža 69 předšulskich dźěći a młódšich šulerjow do cila. Na 2,0 km wubědźowaše so 64 staršich šulerjow, z nich 35 šulerkow.
We wurisanju na 4,0 km (128 w cilu, z nich 60 žónskich) běštaj cyłkownaj dobyćerjej Georg Rabe (O-See-Sport; 15:01 min) a Anna Böhme z Biskopic (17:22 min). Budyšanow Leja Čórlicha a Jurja Nuka počesćichu za 2. městno w starobnymaj klasomaj – Čórlich docpě w U 18 (18:25 min) a Nuk w sk 80 (31:47 min), wón běše z 83 lětami najstarši wobdźělnik. Nuk je so tež w mjenje wšitkich starterow zarjadowarjej znowa zjawnje za tak přikładnu organizaciju dźakował.