ST 1922 Radwor – Drohotka Ramnow 1:4 (1:2)
Zestawa domjacych: Wróbl – Wjeńka, Šěrak, Henke, Zähr (46. Omran), Nuk, Zimmermann, Rachela, Winar, Schulze, Kurjat (62. Bejmak)
Zeleny štwórtk wotmě so nachwatanska dypkowa partija koparjow ST Radworja we Wjazońcy přećiwo Drohotce Ramnow. Pod swětłomjetakami zahwizda sudnik duel, kotryž so tež cyle po předstawje Radworčanow započa. Sebjewědomje startowachu woni do hry a přewzachu komando na kopanišću. Hižo w 9. min. kapitan Paul Zimmermann po róžku Měrćina Kurjata bul do wrotow zhłójčkowa. Tež po nawjedowanju wostachu domjacy koncentrowani. Wuhrachu sej wjacore dobre šansy, tola zdźěla falowaše trěbne zbožo abo běše rozsudny bul w nimohrě. Defensiwa wokoło Fabiana Šěraka móžeše w prěnich 30 mjeńšinach přeswědčić. Tola w 40. min. zawinowa wrotar Fabian Wróbl jědnatku – dohromady štwórtu w zašłych třoch hrach. Paul Groba za Ramnow přetwori a wuruna. Radworčenjo so hišće mjerzachu a hižo w klětce Wróbla znowa zaklinka. Róžk z praweho boka móžeše Conrad Wähner w 42. min. k nawjedowanju wužić. Defensiwa hosćićela bě w tym wokomiku njewěsta.