Krajny sejm sej žada, nowe financne zrěčenje hač do kónca lěta podpisać

Drježdźany (SN/mb). Kónc lěta so drje skónči doba aktualnje płaćiweho statneho zrěčenja Zwjazka, Sakskeje a Braniborskeje wo financowanju Załožby za serbski lud, ale hač budźe naslědne dojednanje wo dobje 2026 do 2030 sčasom podpisane, hišće jasne njeje. Dočasnych nowowólbow zwjazkoweho sejma dla je so proces jednanjow dlijił. Wčera je mjeńšinowa koalicija Sakskeje CDU a SPD namjet statnemu knježerstwu w Drježdźanach na dnjowy porjad krajneho sejma přinjesła, kotryž zamołwitych namołwja, so do spěcha měć: Zastupjerjo Sakskeje maja w jednanjach ze Zwjazkom a z Braniborskej na to tłóčić, zo so zhromadnje hač do 31. decembra na nowe zrěčenje dojednaja, kotrež stupace personelne a wěcne kóšty wobkedźbuje. Nimo toho njech sakske knježerstwo hižo hač do kónca nowembra wo mjezystawje jednanjow rozprawi.