To a tamne (08.06.17)
Wobě noze złamał je sej paduch w Mecklenburgsko-Předpomorskej při ćěkańcy. Zhromadnje z kumpanomaj bě wón w twarskich wikach w Parchimje wěcy w hódnoće 60 eurow kradnył. Přistajeni skupinu lepichu a dowjezechu ju do běrowa w prěnim poschodźe. Jedyn z muži tam z wokna skoči a so ćežko zrani. Tamneju přepodachu policiji. Zranjeneho dowjezechu do chorownje.
Něhdy za dźesać eurow na čaporowych wikach kupjeny, nětko za 750 000 eurow dale předaty: Londonski awkciski dom Sotheby’s je drohotny diamantny pjeršćeń za njewočakowano wulku sumu přesadźował. Muž bě před něšto časom pjeršćeń w awkciskim domje trochować dał. Při tym so wukopa, zo ma stary pjeršćeń z 80tych lět drohotny 26,92 karatowy diamant za 350 000 eurow. Sumu su nětko jasnje přetrjechili.
Katolikojo wupožčichu wołtar
Wittenberg/Münster (B/SN). Ze swjatočnej Božej słužbu pod hołym njebjom z wjac hač 100 000 wěriwymi bu před tydźenjom we Wittenbergu Ewangelski cyrkwinski dźeń zakónčeny. Na jewišću steještej dwě požčonce: Wołtar a čitanski pult z masiwneho drjewa buštej hižo na mnohich Dnjach katolikow wužiwanej. Wobě cyrkwinskej wulkozarjadowani sej stajnje zaso mjezsobu pomhatej, rjekny jednaćel Dnja katolikow, Martin Strauch: „Je to rjane ekumeniske znamjo.“
Najdlěša biblija swěta
Kilica zajeli
Istanbul (dpa/K/SN). Turkowska wyšnosć je krajneho šefa organizacije čłowjeskich prawow Amnesty International Tanera Kilica w prowincy Izmir zajeć dała. Kilicej wumjetuja, zo je wudźeržował zwiski z muslimiskim prědarjom Fethullah Gülenom. Turkowski prezident Recep Tayyip Erdoğan hibanje w USA žiweho prědarja toho winuje, zo je naškarał pospyt puča w juliju zašłeho lěta. Amnesty International sej wot Turkowskeje žada, Kilica hnydom zaso pušćić.
Dawk njepłaćiwy
Karlsruhe (dpa/SN). Dawk za palne elementy w jadrowych milinarnjach, kotryž bě Němska wot lěta 2011 hač do 2016 zběrała, spřećiwja so zakładnemu zakonjej. Tole je Zwjazkowe wustawowe sudnistwo w Karlsruhe dźensa rozsudźiło. Z tym móža so atomowe koncerny nadźijeć, zo jim srědki wjace hač šěsć miliardow eurow zaso wróća. Po měnjenju sudnikow njebě Zwjazk kompetentny, zakoń za wony dawk zdźěłać. Po informacijach financneho ministra je dawk statnej kasy 6,285 miliardow eurow wunjesł.
Rentowy koncept předstajeny
Dosć přijomny termin mějachu koparjo němskeho narodneho mustwa ...
Politika Trumpa je wopačna
Třěleńca w Teheranje
Němska wojakow z Incirlika cofnje
Berlin (dpa/SN). Zwjazkowe knježerstwo je puć k cofnjenju Zwjazkoweje wobory z turkowskeho İncirlika runało. Kabinet je dźensa wotpowědny plan zakitowanskeje ministerki Ursule von der Leyen (CDU) bjez diskusije schwalił. Po nim chcedźa 260 w İncirliku zaměstnjenych wojakow z wuskušowanskimi lětadłami typa Tornado kaž tež tankowanske lětadło do Jordaniskeje přepołožić. Jednotka ma přichodnje wot lětanišća Al-Asrak njedaloko južneje mjezy Syriskeje bój přećiwo teroristiskej milicy Islamski stat podpěrać. Přeměstnjenja wojakow dla budźe zasadźenje lětadłow něhdźe dwaj měsacaj přetorhnjene, w tym zwisku zdźělichu.
Hłowna přičina přepołoženja je rozsud turkowskeho knježerstwa, zo je zapósłancam zwjazkoweho sejma zakazane, wojakow w İncirliku wopytać. Ankara reagowaše tak na rozsud němskeho knježerstwa, turkowskim wojakam w Němskej azyl přizwolić. Wšitke prócowanja wo rozrisanje zwady běchu zwrěšćili.
Ruske dušepastyrstwo trěbne
Čestnohamtscy pomocnicy staraja so wo wopory w jich maćeršćinje
Berlin/Podstupim (dpa/SN). Nuzowe dušepastyrstwo za rusce rěčacych ludźi w Berlinje a Braniborskej je předewšěm w zwjazkowej stolicy jara prašane. Mjeztym lěto wobstejaca skupina w Berlinje z tuchwilu wosom čestnohamtskimi nuzowymi dušepastyrjemi bě dotal znajmjeńša pjeć króć zasadźena. W jednym padźe su team do Braniborskeje wołali, zdźěli farar Justus Münster, społnomócnjeny za nuzowe dušepastyrstwo w Berlinskej diecezy.
Při swojim prěnim zasadźenju dyrbjachu so dušepastyrjo wjacore hodźiny wo rusku swójbu starać, kotrejž bě dźěćo po ćežkej chorosći zemrěło. „Smjerć bě za nas překwapjaca, swójba bě chětro rozpjeršena“, Münster rjekny. W tejle situaciji bě derje, zo móžachmy so wo přiwuznych w jich maćeršćinje starać.“
Zapasena šansa
Zwada mjez Němskej a Turkowskej by zwjazkowemu knježerstwu dobra składnosć być móhła, němskich wojakow domoj zwołać a wonu dwělomnu akciju, z kotrejž pječa bój přećiwo terorowej milicy Islamski stat (IS) podpěruje, skónčić. Ludoprawnisce je jasne: Němske wojerske lětadła nimaja w syriskim powětrowym rumje ničo pytać, dokelž je Syriska naje-bać krawnu wobydlersku wójnu přeco hišće suwereny stat a dokelž Němska za wone zasadźenje wotpowědny mandat Bjezstrašnostneje rady UNO nima.
Mjeztym je znate, zo su informacije, kotrež němske wuskušowanske lětadła nad Syriskej za antiterorowu koaliciju zběraja, tež krajam přistupne, kotrež IS na wšelakore wašnje podpěruja, byrnjež zaćichim. Hdyž tak chceš: Němska indirektnje Islamski stat z informcijemi zastaruje, štož wězo nichtó přiznać njebudźe. To měło so spěšnje skónčić. Marko Wjeńka
To a tamne (07.06.17)
Zwrěšćił je pospyt rekorda na kupje Rujany. Tam chcychu 16 metrow wysoki hród z pěska natwarić a do Guinnessoweje knihi rekordow zapisać dać. Při wudeskowanju bě so hród wčera puknył a so skónčnje sypnył. „Smy wšitcy jara zrudni“, zdźěli zamołwita festiwala skulpturow na Rujanach. Kónc meje běchu wjace hač 5 000 tonow prasowaneho pěska přiwjezli, zo móhł hoberski twar nastać. Nowonatwar njeje hižo móžny.
Muzej nimokulenych wunamakanjow je wot dźensnišeho w šwedskim Helsingborgu přistupny. Tam pokazuja eksponaty, wot kotrychž běchu sej producenća swój čas wulki wuspěch lubili: datowe nawoči Google Glass, składowak datow MiniDisc, zamróžene jědźe zhotowjerja zhubneje pasty Colgate abo parfim twarca motorskich Harley-Davidson. Koncerny tajke něšto rady zatajeja.
