Kritizuje list wučerjow
Berlin (dpa/SN). Berlinska senatorka za wědomosć Ina Czyborra (SPD) je podpěraćelski list sta wučerjow na Berlinskich wysokich šulach za propalestinskich demonstrantow kritizowała. Minjenu wutoru běchu 150 aktiwistow na Berlinskej Swobodnej uniwersiće spytali, dwór wobsadźić a stany natwarić. Tohorunja wołachu parole přećiwo židowskim demonstrantam. „Njewěmy štó běchu akterojo“, Czyborra wuzběhny. Policija ma rozestajenja přepytować.
Wjace prawow Palestinjanam
New York (dpa/SN). Na plenarnej zhromadźiznje Zjednoćenych narodow chcychu sobustawojo dźensa wo prawach Palestinjanow wothłosować. Aktualny naćisk rezolucije zmóžnja, zo smědźa so zastupjerjo Palestiny aktiwnje na posedźenjach plenarneje zhromadźizny wobdźělić. Prawo wothłosować pak woni nimaja. Hladajo na wójnu w Gazaskim pasmje pak je nastork, tole změnić.
Zaso wjele mortwych rybow
Po njewšědnje sylnych zliwkach na juhu Brazilskeje wojuja ludźo w ...
„Z chłostanjemi to njerozrisamy“
„W Němskej su so časy změnili“
Washington (dpa/SN). Zakitowanski minister Boris Pistorius (SPD) je w USA přilubił, zo chce Němska nawjedowacu rólu hladajo na škit Europy přewzać. „Dajće nam – USA a Němskej zhromadnje – přichod ze wšěmi wuhotować, kotřiž so za swobodu, měr a mjezynarodny porjad zasadźeja“, wuzběhny wón wčera w narěči na renoměrowanej Johna Hopkinsowej uniwersiće we Washingtonje. Němska je kmana a zwólniwa, swój nadawk w zwjazkarstwje a globalnej politice přewzać.
Nimo toho wotbłyšćowaše Pistorius nowy kurs Němskeje. Wójsko w Zwjazku ma so zaměrnje wuhotować, tak zo móže spušćomnje reagować. Tohorunja dodawa Němska brónje do wójnskich kónčin. „Časy su so změnili“, wón podšmórny. Dale rěčeše wón wo „zmylkach“. Pistorius je přeswědčeny, zo Němska něšto podobne kaž wobornu winowatosć zaso trjeba.
Surowa situacija
Twarske wiki derje předawali
Köln (dpa/SN). Miłe wjedro w měrcu a aprylu je tójšto ludźi w Němskej pohnuło, so do swójskeje zahrody podać. Twarske a zahrodowe wiki su lětsa wo tójšto lěpje do za jich tak wažneje nalětnjeje sezony startowali hač 2023. Branša je wo 4,4 procenty přidobyła a wobrot 4,76 miliardow eurow docpěła. Tole zdźěla zwjazk wikowarjow gratu, twarskich maćiznow a zahrodkoweje potrjeby. W měrcu su předawarnje samo přirost 9,6 procentow nadźěłali.
Wosebje prašane běchu zemja, symjenja a zahrodkowa chemija. Tu běchu wobroty wo 43 procentow wyše hač lěto do toho. Sylny rozrost registrowachu tež pola rostlinow a zahrodoweje techniki. Prašane běchu tež robotery-trawusyčaki.
Hłowny jednaćel zwjazka Peter Wüst je hladajo na wuhlady při wšěm zdźeržliwy. „Wjeselimy so, zo smy lětsa tak dobry zazběh dožiwili. Najebać to pak njeje wšudźe derje běžało.“ Jasne straty wobrota mějachu we wobłuku twarstwa kaž pola kachlicow (-15,2 procentaj), meblow (-9,7) a twarskich elementow (-8,2). Trěbne su „impulsy rozmacha“ ze stron politiki, je Wüst přeswědčeny.
To a tamne (10.05.24)
Dźěćo je w awće wohnjostroj zapaliło, čehoždla dóńdźe k wohenjej na zwjazkowej awtodróze A8 pola Stuttgarta, policija wčera zdźěli. Na zadnim sedle awta ležachu pryskotawki a bengalosy za narodniny. Kak a što dokładnje bě hólc zawčerawšim zapalił, njemóžachu přepytowarjo hišće zwěsćić. Jako wuchowanske pomocnicy k wohenjej přichadźachu, steješe awto na pódlanskej jězdnej a so hižo paleše. Mać a šěsćlětneho hólčeca dowjezechu pomocnicy do chorownje.
29. mjezynarodne zetkanje Trabantow je Trabbi Buggy klub zawčerawšim na lětanišću w Anklamje zahajiło. Něhdźe 700 wobdźělnikow zarjadowar tam wočakowaše. Za fanow NDRskich kultowych awtow a dalšich nostalgiskich jězdźidłow su hišće hač do zajutřišeje njedźele najwšelakoriše programowe dypki a wubědźowanja předwidźane.
CDU wólbny bój zahajiła
Berlin (dpa/SN). CDU je dźensa oficialnje horcu fazu europskeho wólbneho boja zahajiła. Na zjězdźe strony w Berlinje su kónčnu fazu boja do wólbow 9. junija startowali. Planowana bě tež narěč prezidentki komisije EU Ursule von der Leyen před tysac delegatami. Unija CDU/CSU ma dobre wuhlady, so při wólbach z najsylnišej politiskej mocu stać. Wona docpěwa tuchwilnje stabilnje 30 procentow, dwójce telko kaž SPD, Zeleni a AfD.
Ruska Ukrainu nadběhowała
Kijew (dpa/SN). Ruska je po informacijach Kijewa energijowy system Ukrainy znowa masiwnje nadběhowała. Minjenu nóc su připrawy milinoweho zastaranja w šěsć regionach atakowali. Technikarjo z wotmachom na tym dźěłaja, škody zwuporjedźić. Wobydlerjo su namołwjeni, milinu lutować. Nócny powětrowy alarm su zahajili, po tym zo so 21 ruskich bojowych trutow bližeše. Ukrainske wójsko je wjacore truty wottřěliło.
Žadyn proces přećiwo Trumpej
Na dworje Lipšćanskeje uniwersity steja sej pro-israelscy a ...
Ruske chorhoje lětsa znowa zakazane
Berlin (dpa/SN). Składnostnje skónčenja Druheje swětoweje wójny a wuswobodźenja wot nacionalsocializma před 79 lětami planuja dźensa a jutře tójšto zarjadowanjow a wopominanskich swjatočnosćow. Wopominać chcychu wuswobodźenje dźensa na sowjetskim wopomnišću w Berlinskim Treptowskim parku, w Tiergartenje w zapadnym Berlinje a ze zarjadowanjemi při Braniborskich wrotach. Tež w druhich městach Němskeje su zarjadowanja přizjewjene. Připowědźili su pak dźensa tež demonstracije w zwisku z wójnu Ruskeje přećiwo Ukrainje, mjez nimi pro-ruske a pro-ukrainske. Loni běchu móžnych namócnosćow dla 1 500 policistow zasadźili.
8. meje 1945 bě Němska kapitulowała. Druha swětowa wójna w Europje so skónči. W Ruskej woswjeća róčnicu jako swjedźeń dobyća 9. meje. Zastupnicy ruskeho wulkopósłanstwa tón dźeń na wjacorych wopomnišćach wěncy kładu.
