Widźał, słyšał, napisał (19.03.18)

Montag, 19. März 2018 geschrieben von:
Awtorka dźensa Halena Jancyna

Mjeztym 20. raz wotměja spočatk junija w Zhorjelcu „Swjedźeń wolejbula“. Woblubowany to wjeršk sezony, tež mjez serbskimi wolejbulistkami a wolejbulistami. Wšo dohromady 24 mustwow wojuje tam w třoch kategorijach wo dobyće. Jedna so wo turněry muži, žonow a wólnočasnych sportowcow Tež lětsa stej Viktoria Worklecy a ST Marijina hwězda zaso pódla. Za organizatora VfB Zhorjelc je to jubilej a zdobom kónčny dypk. Budźe to poslednje wubědźowanje tajkeho razu, dokelž towarstwo personelnych přičin dla po 25 lětach rozpušća. 30. junija so w towarstwje swěcy hasnu.

Widźał, słyšał, napisał (13.03.18)

Dienstag, 13. März 2018 geschrieben von:
Awtor dźensa Clemens Šmit

„Hdyž sej mysliš, zo mysliš, potom sej jenož mysliš, zo mysliš ...“ – Chróšćanske druhe koparske mustwo ma nowu „kmótru“. Juliane Werding je jemu minjenu sobotu tři wažne dypki přećiwo kontrahentej z Lubuša zawěsćiła. Haj, tak to je. W kabinach Sokoła spěwa Měrćin Štrawba, za Horjansku rezerwu su to němske šlagry. Nastało bě wšitko při jědnatce, přeradźi mi nadběhowar Chróšćanow a zamołwity za hudźbu w kabinje. Wo kotru jědnatku so tu jedna, jědnatku při kopańcy abo znatu sobotnu zabawu, wšak nochcyše mi rjec. Ćim rjeńšo, zo stej kónc tydźenja wobě zastupni­stwje koparjow SJC z dobyćom do druheje połserije startowałoj. Štó by sej to myslił?

Awtor dźensa Jurij Bjeńš

Poprawom nochcych w póstnym času žane słódkosće chłóšćić. Sprawnje pak přiznawam, zo sym so toho předewzaća poměrnje spěšnje wzdał. Zo pak bych swojemu ćěłu tola něšto dobreho popřał, předewzach sej kóždy dźeń znajmjeńša poł hodźinki sportować. Pozitiwny pódlanski efekt je tón, zo při sportowanju stajnje něšto dožiwješ.

Sibirske temperatury minjeny tydźeń ćehnjechu nas na lód. Tak smy tydźenja cyłe popołdnjo na Kamjentnym haće za čornym pukom honili. Lód bě jara kruty a nimale tak hładki kaž w hali – perfektne to wobstejnosće. Puk pak bě tak spěšny, zo so hač do rohodźe na kromje suny a so tam chowaše. Runje na tych městnach pak bě lód přećeńki a tuž móžno njebě jón tam zaso wotewzać. Mandźelska sobuhrajerja wšak měnješe, zo so jej to poradźi. A woprawdźe. Móžachmy bórze zaso lodohokej hrać, ale hakle po tym zo bě wona cyle přemokana z lódzymneho hata wulězła. Na tym městnje hišće raz wutrobny dźak za angažowane zasadźenje a runočasnje wuběrnu show.

Awtor dźensa

André Strelow

Zhromadźizna sudnikow wotmě so kónc januara w Němskich Pazlicach, kotřiž hwizdaja hry we wokrjesnej wyšej lize Zapadołužiskeho koparskeho zwjazka abo chcedźa to přichodny čas wyše činić. Tež wobkedźbowarjo refereejow běchu přitomni. Ronny Martick a Marc Oliver Löw pokazaštaj jim nimale tři hodźiny trajace specielne na sudnikow wusměrjene zwučowanja.

Widźał, słyšał, napisał (29.01.18)

Montag, 29. Januar 2018 geschrieben von:
Awtor dźensa Jurij Nuk

Kónc lěta je cyle wěsće nimale kóždy sportowc wo wukonach w swojej družinje přemyslował. Kóždy chce wšak wědźeć, hač su so nałožene mocy a wudawki zadanili. Tajka bilanca wuspěchow aktiwnych běharjow po srjedźnych a dołhich čarach w minjenej sezonje 2017 we wobłuku doskónčneho zaměstnjenja, wuhódnoćenja a mytowanja hłowneju rjadneju lisćinow našeju Łužicow, Wopačanskeho cupa běharjow a Łužiskeje běhanskeje serije kaž tež Drježdźanskeje wobwodneje serije, je zrealizowana. Poslednje lońše hódnoćenske wubědźowanje za Wopačanski cup kaž tež za Drježdźansku seriju běše 17. Biskopičanski Butrowohórski­ běh w septembru, a za Łužisku seriju běše to 39. Oberlichtenauski silwesterski běh.

Awtor dźensa Tomaš Faska

Jutře za měsac je tak dalo­ko. W južnokorejskim Pyeonchangu zahaja so 23. olympiske hry w zymskich disciplinach. Kóžde štyri lěta zetkawaja so sportowcy z cyłeho swěta, zo bychu mocy měrili. A nimale kóždy, kiž je tónle podawk jako wobdźělnik dožiwił, drje wobhladuje to jako wjeršk swojeho ćěłozwučowanskeho wuwića.

Južna Koreja tele zymske hry prěni raz wuhotuje. Lětnju olympiadu wšak je hižo 1988 organizować směła.

Nětko potajkim Zymske olympiske hry w Južnej Koreji. Dwójce bě wony region ze 44 000 wobydlerjemi hižo kandidował a zwrěšćił, a to w lětomaj 2010 a 2014. Kónčina, kotrejež mjeno móžeš do serbšćiny přełožić z „Měr a wuspěch“, dyrbješe so kanadiskemu Vancouverej resp. ruskemu Sočijej kłonić. Nětko pak přesadźichu so poža­darjo z prowincy w horinach Taebaek chětro jasnje přećiwo francoskemu Annecy a „našemu“ Mnichowej.

Widźał, słyšał, napisał (27.12.17)

Mittwoch, 27. Dezember 2017 geschrieben von:
Awtorka dźensa Halena Jancyna

W zymje volleyball hrać? Haj, to je w kóždej sportowni móžno. A što je z beachvolleyballom? Ně, je dźě přezyma, a často mjerznje! Mam pak něšto noweho za was: snowvolleyball. Mysliće-li runje na krótke cholowy, pěsk a wysoke temperatury, móžeće to hnydom zabyć. Tu su volleyballisća ćopłu sportowu drastu woblečeni a hraja w sněze. Nimo toho maja koparske črije wobute.

Snowvolleyball je wosebita warianta volleyballa, při kotrejž je hrajnišćo w sněze. Regularije wotpowěduja tym beachvolleyballa. Snowvolleyballowa hra pak wotměwa so na wysokosći něhdźe 2 000 metrow. Snowvolleyball njeje žana wunamakanka z Němskeje. Wuwili běchu tule sportowu družinu w lěće 2009 w awstriskim Wagrainu. Po wjacorych turněrach w Alpach připózna awstriski volleyballowy zwjazk 7. nowembra 2011 snowvolleyball jako oficialnu sportowu družinu. Před lětomaj bě tak daloko, zo je ju Europske volleyballowe zjednoćenstwo (CEV) oficialnje do programa přiwzało. Wotnětka buchu turněry pod hesłom Snow Volleyball European Tour přewjedźene.

Widźał, słyšał, napisał (27.11.17)

Montag, 27. November 2017 geschrieben von:
Awtor dźensa Ludwig Zahrodnik

Mnozy z nas tróšku staršich za sport so horjacych dopominaja so rady na podawk, kotryž sta so 4. julija 1954 we Wankdorfstadionje šwicarskeho Berna. Měnju kónčnu hru wo swětowe mišterstwa w kopańcy mjez faworitom z Madźarskeje a outsiderom z Němskeje. Mjena kaž Turek, Liebrich, Morlock, O. a F. Walter abo Rahn, kiž je rozsudne wrota třělił, su so nam hłuboko do pomjatka zaryli.

Jedyn, kiž njeje tak w fokusu medijow a zjawnosće stał, je pak rozsudnje k triumfej němskeho mustwa přinošował, bě Hans Schäfer. Wón je w oktobrje w Kölnje 90. narodniny swjećił a 19 dnjow pozdźišo zemrěł. Tuž je nětko 1931 rodźeny Horst Eckel jenički hišće žiwy z legendarneho mustwa Seppa Herbergera.

Hans Schäfer je wot lěta 1948 do 1965 jako nadběhowar za 1. FC Köln hrał a 243 wrotow docpěł. Zdobom steješe 39 razow w němskej wubrance a třěli za nju dwaceći wrotow. Trójce – 1954, 1958 a 1962 – je so na swětowych mišterstwach wobdźěłił. 1963 wuzwolichu jeho za koparja lěta Němskeje.

Widźał, słyšał, napisał (20.11.17)

Montag, 20. November 2017 geschrieben von:
Awtor dźensa Michał Nuk

Hišće 81 dnjow hač do Pyeongchanga. Swětowy zymski sport hotuje so 13. raz na swój wjeršk. Kónc tydźenja je so w tójšto disciplinach olympiska sezona zahajiła; a hižo na ličbje wobdźělnikow so wotbłyšćuje, kak wažna wona je. A to za etablěrowane kraje fa­woritow, kotrež liča z wjele medaljemi, runje­ tak kaž za eksotow. W sankowanju w Inns­brucku-Iglsu na přikład chcyše so jenož pola žonow wjace hač 40 starterkow za hłowne wubědźowanje swětoweho cupa kwalifikować – w njeolympiskej sezonje je to snadź połojca. Někotre su z krajow, hdźež žana lodowa čara nje­eksistuje abo hdźež ani sněha njeznaja. W bobowym sporće móhła so samo w februaru stawi­zna „Cool Runnigs“ wospjetować. Žónske mustwo z Nigerije je so sobotu ze swojim pjatym dokónčenym běhom na čarje w Calgaryju za Olympiske zymske hry kwalifikowało – na samsnym městnje, hdźež bě před nimale 30 lětami jamaiske mustwo cyły swět zahoriło.

Widźał, słyšał, napisał (14.11.17)

Dienstag, 14. November 2017 geschrieben von:

Awtor dźensa

André Strelow

W zašłej kolumnje pisach wo prěnich nazhonjenjach zasadźenja widejowych sudnikow w zwjazkowej koparskej lize. Problemy dale wobsteja, runje hladajo na fakt, w kotrym wokomiku widejowy sudnik docyła zakroči. Třěšny zwjazk DFB je nětko jasne prawi­dła wozjewił. Hač so situacija polěpši, to pokazaja nam přichodne tydźenje a měsacy. W tym nastupanju je znaty koparski sudnik Manuel Gräfe dalše diskrepancy w zwisku z posudźowanjom sudniskich wukonow narěčał, kritizujo, zo wukony zdźěla njeobjektiwnje nastawaja. Posudźowanja so zdźěla skoriguja, tak, kaž su trěbne. Nimo toho zhotowištaj zamołwići za sudnikow Herbert Fandel a Helmut Krug lisćinu ze sudnikami, „rjadowanu bóle po stykach a nosu“. Tele wuprajenje Gräfy je dalši znaty sudnik Felix Brüch podšmórnył. To bě wězo sylny tobak a na boku DFB wulki wukřik.

Anzeige