Z nowym formatom zarjadowanjow wabitej floristka Annegret Petasch a kucharka Carola Arnold do Hornjeje Hórki. Milenka Rječcyna je so z Carolu Arnold­ rozmołwjała.

Flaněrować a diněrować w Gretlinym zahrodowym raju je hesło, kotrež zwjazuje přirodu z kulinariku a kulturu. Kak je tónle zwisk nastał?

C. Arnold: Sym so loni za nowy powołanski puć rozsudźiła a swój mały hosćenc w Kumwałdźe naslědnikam přewostajiła. Chcu pak přiwšěm wosebitosće hornjołužiskeje kuchnje šěrić. Tuž pytach za partnerami, z kotrymiž móžu dale kreatiwnje skutkować. Floristka Annegret Petasch bě mi hižo na wjacorych zarjadowanja poboku.

Rěka to, zo daće nětko druhich warić?

C. Arnold: Něhdźe dźesać lět sym při dźěle hač na mjezy swojich mocow šła. To hižo njemóžach a nochcych. Swoje powołanje dale wukonjam a warju, ale ramikowe wuměnjenja su so změnili. Mój mandźelski Lutz je mějićel předewzaća „Projektowa kowarnja Carola wari“. Wón rozsudźi, kotre projekty přewjedźemoj a kotre poskitki přiwozmjemoj.