Regina Šołćina z Konjec: Lube „rady być“-jěcharki:

Sćěhuju pro a kontra tuteje tematiki w Serbskich Nowinach. Njedawa da woprawdźe žanych wažnišich temow hač swoje česćelakomne „ego“ na tajke wašnje spytać do dwělomneho swětła stajeć?

Lube žony a holcy, kotrež wojujeće wo tónle jedyn dźeń, jutrowničku, z konja dele hladać a wupyšeneho „pod rić“ (!) měć? Kajke wupadaja potom waše zbywace 364 dnjow lěta, nabožnje a narodnje?

Dopominam so na jutry před někak pjeć lětami, jako koronapandemija woprawdźe kćěješe a jěchanje bě zakazane. Tu so skupina Konječanskich muži zmužiće jako křižerjo pěši(!) na puć do Kulowa po­da (SN rozprawjachu – wobraznje!). Po pobožnosći tam so zaso domoj wróćiwši hišće po wsy kročo jutrowne kěrluše zanošowachu!