Zapósłane (26.09.25)
Lukaš Novosad z Prahi reaguje na wutoru wozjewjeny čitarski list Tima Meškanka z Lipska:
„Nazyma započina so 22. septembra“, pisa w swojim teksće Timo Meškank. Hdyž na kalender hladamy nic astronomisce, ale meteorologisce, započina so nazyma 1. septembra a cyły požnjenc tohodla ličimy kaž nazymski měsac, štož kóždy najpozdźišo wot pěstowarnje wě.
Na podobne wašnje móžemy nimale kóždu sadu knjeza Meškanka problematizować. Kelko medialnych wustupow trjebamy, zo bychmy kajkužkuli temu jako derje wopisanu deklarować móhli a wědźeli, zo je ju towaršnosć woprawdźe zapřijała? Su nadawki politikarjow woprawdźe jenož technisce „so starać wo zakonske wuměnjenja“, abo wočakujemy wot politiki tež moralisku dimensiju? Wažny pak je wjeršk mojeje arogancy, kiž knjez Meškank zwjazuje z moju sadu: „Nimamy zajim, srjedźnu a wuchodnu Europu zrozumić“, najskerje dokelž je wón lětsa dowol na Balkanje spožiwał.
Zapósłane (23.09.25)
Timo Meškank z Lipska je nam sćěhowacy čitarski dopis sposrědkował:
Rozwažujo wo tym, hač měł přinošk Lukaša Novosada w SN 12. 9. komentować, sym dóšoł k wusudej, zo móhło to być wužitne. Njepostorkuju so na wobsahowych wuwjedźenjach awtora, ale na wašnju předstajenja maćizny. „Čehodla to nětko w nazymje pisam,“ praša so L. N. nimale na kóncu swojeho teksta. A wotmołwi chroble: „Dokelž su to za was zawěsće nowe informacije.“ Ně, njejsu to za nas žane nowe informacije, znapřećiwju jemu skrótka a zesłódka. A dodam připódla: Nazyma započina so 22. 9.
Ale wróćo k tekstej: Wšitcy Serbja wobknježa dźensa nimo swojeje maćeršćiny tež němčinu. Wo koncerće chorwatskeho spěwarja Thomsona su mj. dr. nadregionalne nowiny FAZ 6.7. a NZZ 7.7. wobšěrnje pisali. Někotři Serbja staršeho semestra wobknježa nimo toho tež čěšćinu. Wo róčnicy masakra w Srebrenicy je mjez druhim časopis Respekt 4. julija nadrobnje rozprawjał. Serbja njejsu hłupi wjesnjenjo, kotřiž su potrěbni rozswětlenja kajkehožkuli mudrowačka.
Zapósłane (16.09.25)
Měrćin Krawc, čłon Serbskeho sejma, piše pod napismom: Žiwe znamjo serbskeje wěry a žiwjenja
Njedźelu wječor mějach česć, poslednje předstajenje pasionskich hrow 2025 w Chrósćicach dožiwić – a sym přeco hišće hłuboko hnuty. Štož su tam na jewišću pokazali, bě wo wjele wjac hač činohra: Bě to awtentiske, skutkowne swědčenje žiweje wěry a žiweho serbstwa.
Dźiwadźelnicy a hrajerjo – nimale wšitcy wobydlerjo Chróšćanskeje wosady – su z wulkej zahoritosću a nutřkownym přeswědčenjom hrali. Přihladowar je zdźěla dospołnje zabył, zo bě to „jenož“ dźiwadło. Woni su w swojich rólach rozkćěli a je ze žiwjenjom napjelnili. Bě hnujace dožiwić, kak tu z wěry wony zhromadny skutk nasta, kotryž njeje jenož wuměłsce přeswědčił, ale tež hłuboke spirituelne a kulturne poselstwo sposrědkował.
Za mnje a druhich zapósłancow Serbskeho sejma, z kotrymiž sym so wuměnił je jasne: Tutón projekt njebě jenož jednotliwy wusahowacy podawk jedneje wsy, ale tež přikład druhim wosadam w serbskim sydlenskim rumje – katolskim runje tak kaž ewangelskim.
Zapósłane (01.09.25)
„Wětrniki – jenička ideja za milinu?“, praša so Krystof Šołta z Hórkow:
Srjedź awgusta wotmě so informaciski wječor nastupajo planowanej wětrnikaj mjez Chrósćicami a Hórkami resp. Chrósćicami a Lejpoldom.
Knjez Wjesela je tam spontanu narěč dźeržał, zo njechamy wjac brunicu ze zemje ćahać, zo trjebamy alternatiwu. Tak daloko jemu přihłosuju. Štož pak hinak widźu je, to z pomocu jeničkeje alternatiwy činić, mjenujcy z wětrnikom. Nochcu, zo mje wopaki rozumiće. Wětrniki na prawym blaku njejsu runjewon špatna ideja. Ale tu dyrbitej so wětrnikaj dosrjedź sydlenskeho ruma stajić. Blisko dokoławokoło su potrjechene wjeski.
Wobmyslenja su wšelake. Na přikład je to wysokosć tutych wětrnikow. Ta wučinja we wysokosći wokřidłow 250 metrow. Tute potom tež we wěstych časach swój sćin směr wjeskow mjetaja. Dalši problem je móžny šum wokřidłow. Napohlad na sydlenski rum so přez hobersku wysokosć tež dospołnje změni.
Zapósłane (29.08.25)
Křesćan Krawc z Hrubjelčic měni, zo njeje domiznowěda wjace ta, kaž smy my dźensa wosomdźesaćlětni ju dožiwili:
Tuž so njedźiwam, hdyž w dźeniku, předewšěm našu domiznu wobjednawacym, so z wjesnymi mjenami chětro swojowólnje wobchadźa. W rubrice Policija čitach w srjedownišim wudaću tutoho tydźenja: Klukš. Po prěnich linkach mi bě, kaž bych špaltu zhubił, dokelž so nadobo wobchadne njezbožo blisko Słoneje Boršće wopisowaše. A hnydom w sadźe po tym: „Do směra Rakec jěducy ... běše přespěšnje jěł ...“ A dale zaso: „před kružnym wobchadom ...“ A běch zaso w Słonej Boršći.
Nowa Wjeska je sej wulećała do Tuchorskeho lěsa w Delnim Wujězdźe! Němcy dyrbja Delnjemu Wujězdej přidawk přistajić: Uhyst/Spree. Serbja sej spěwachu a sej hišće spěwaja: Ha wyše mi Hornjeho Wujězda ... Njeby hubjene było, hdyž bychu kolesowarjo z Noweje Wjeski so w něhdušej barace zešli, jeli hišće steji, a sej tutón spěw zaspěwali a sej wuwědomili, w kotrym Wujězdźe su byli a zo w Delnim Wujězdźe ženje a nichtón Tuchorski lěs njenańdźe.
Zapósłane (25.08.25)
Jan Wjenk z Wotrowa: Panorama našeho byća:
Zapósłane (22.08.25)
André Bulank, wjesnjanosta gmejny Njebjelčicy, podawa swoje zhladowanje na konflikt wokoło Heldec doma w Njebjelčicach, wo kotrymž běchu Serbske Nowiny 14. awgusta rozprawjeli:
Heldec dom so hižo dawno wjace jako zetkawanišćo towarstwow abo putniska hospoda njewužiwa. Něhdźe pjeć lět dołho jón tohodla přenajamy. Za komunalne objekty maja so generelnje potrjeby saněrowanja zwěsćić. Kak při aktualnym napjatym hospodarskim połoženju z tym wobchadźamy, je dale wotewrjene. Za towarstwowe žiwjenje je we wjesnym dźělu Njebjelčicy alternatiwow, mjez druhim su rumnosće w gmejnskim centrumje abo na farskim dworje.
Zapósłane (19.08.25)
Naš čitar Petr Pánek z Mikulašovic reaguje pod titlom „Z čěskim wóčkom Jáchyma“ na přinošk „Čěske ćeže z prózdninami“ (SN zašły štwórtk):
Sym posledni artikl „Z čěskim wóčkom“ čitał a zaso raz začuwał, zo nochcu swět dale z čěskimaj wočomaj widźeć. Spytam jón z wočomaj swojeho 11lětneho syna Jáchyma widźeć.
Čehodla? Mi so na přikład čěske zhladowanje na dźěći njelubi. W mojim ródnym kraju mjenujcy su dźěći ludźom nimale wšudźe wobćežne. Stajnje zetkawaš nerwoznych staršich, kotřiž na dźěći njetrjebawšo rjeja. Praja jim: Njenerwuj mje! abo zo nimaja chwile. Hdyž dźěći do ćaha abo busa zalězu, budźe hnydom při durjach něchtó, kiž na nje swari. W šuli maja wučerki, kotrež dźěći rady nimaja. A tak móhł z naličenjom pokročować. Ně, Čěska njeje dźěćom přichileny kraj.
Zapósłane (15.08.25)
Měrko Šołta wupraja so k artiklej „Sep prapremjerow, nowe formaty a abonementy w SLA“ ( SN 12. awgusta):
Wutoru informowachu SN zjawnosć nastupajo „wjerški hrajneho plana“ Serbskeho ludoweho ansambla w dobje 2025/2026. Mjez druhim chce SLA „oratorij ‚Nalěćo‘ Korle Awgusta Kocora a Handrija Zejlerja“ předstajić. We woprawdźitosći pak jedna so wo „Nalěćo“ Jana Bulanka, kotrež bě wón jako adapciju na kompoziciju Korle Awgusta Kocora stworił. Potajkim, informujće sprawnje a njewodźće ludźi za nós.
Zapósłane (05.08.25)
Cyril Pjech z Berlina piše:
Zašły tydźeń su so awtoromaj hnydom w dwěmaj serbskimaj medijomaj sylzy ronili: Njedźelu awtorej w Katolskim Posole hladajo do Ukrainy a srjedu tomu w SN hladajo na Gazaske pasmo.
A što widźitaj awtoraj (złožuju so na Tagesschau, kotruž kóždy dźeń hladam)? W Ukrainje njepokazuja wobrazy z fronty, jenož wobškodźene twarjenja w městach, a mjenuja ličbu mortwych. Wysokodomy maja wobškodźene fasady, ale steja. Rusojo twjerdźa, zo su je trjechili, dokelž běchu tam wojerske zarjadowanja.
W Gazaskim pasmje hižo ani jedyn dom njesteji, jenož rozwaliny su widźeć, ludźo tradaja hłód a ličba mortwych je mjeztym wyša hač 60 000. Tež Israel twjerdźi, zo chowaja so pod domami, chorownjemi, lěhwami a šulemi wojowarjo Hamas. Za awtora KP su sylzy zawod za nabožne mysle, kaž je to za zawodny nastawk z wašnjom. Awtor w našim wječorniku praša so politisce za tym, što to woznamjenja, a kritizuje politiku stata Israel. Je prěnje sobužarowanje a druhe antisemitizm?
