Zapósłane (23.09.21)
Damian Dyrlich, čłon CDU z Noweje Wjeski, piše njedźelne wólby nastupajo:
„Lětuše wólby su wažne směrodajne wólby za přichod“, čitamy w nowinach Die Zeit, FAZ a Die Welt. Tež Zeleni kaž Annalena Baerbock su to podobnje hižo prajili. Haj, zawěrno budźe wuslědk njedźelnych wólbow naš kraj a snano tež Europu sylnje formować.
K dwěmaj wobsahowymaj aspektomaj chcu so tule rady wuprajić: k hłosej na wólbnym lisćiku w Budyšinje a k wólbnym programam stron. Prěni aspekt drje wšitkich wolerjow w Budyskim wokrjesu potrjechi. Zašły raz bě sej Karsten Hilse wot AfD direktny mandat w Budyšinje zdobył a zastupuje tuž naš wokrjes w Berlinje. Bohužel je protestowy rozsud mnohich wolerjow tež w sejmje jenož protest wunjesł.
Zapósłane (20.09.21)
Bernadeta Göthowa z Wolfena wěnuje so dopisej Sonje Krječmarjoweje w SN ze 14. septembra:
„Je dopokazane, zo je šćěpjenje jenička móžnosć, ćežkemu přeběhej chorosće zadźěwać a pandemiju přewinyć.“ Wodajće – sym wćipna! Bych rady zhoniła, na kajku wědomostnu studiju so knjeni Krječmarjowa tu poćahuje?
Po słowach našeje zwjazkoweje kanclerki je pandemija resp. epidemija našeho kraja hakle nimo, hdyž su wšitcy šćěpjeni! Mediciniske dopokazy za to žane njeznaju. Čehodla dyrbi šćěpjenje j e n i č k a móžnosć być so před ćežkim přeběhom škitać? Njepišu tu wo ćežko schorjenych! Pišu wo normalnej ludnosći, kotrejž je date swój imunostny system woměrje trenować a so na njón spušćeć. Što je ze strowym zežiwjenjom, z hibanjom a sportom, ze sparom a swěcu? To su někotre z regulatornych mechanizmow našeho ćěła. Wšitcy wěmy, zo je něchtóžkuli ćežko schorjeł a někotři njejsu chorosć přežiwili. Cyłkowna smjertnosć našeho wobydlerstwa pak bě po datach Zwjazkoweho statistiskeho zarjadnistwa loni druha najmjeńša minjenych 20 lět.
Zapósłane (17.09.21)
Julian Nyča z Prěčec wupraja so k póndźelnemu wólbnemu forumej Domowiny a Serbskich Nowin:
Zo njehodźa so wšitke wotmołwy kandidat(k)ow wobmjezowaneho městna w ćišćanej nowinje dla naličić, je zrozumliwe. K wudospołnjenju pak skedźbnjam na tři konkretne dypki, w kotrychž so tuchwilny zapósłanc w zwjazkowym sejmje wot tamnych kandidat(k)ow rozeznawa.
Sprěnja chce wón najebać wuskutki na klimu jako jenički dale brunicu wudobywać, byrnjež prajił, zo nimaja so žane serbske a žane němske wjeski brunicy dla wotbagrować. Chibazo bychu so za to dalše wjeski zhubić dyrbjeli. Zo je pak dalewjedźenje tuchwilnych jamow po lěće 2038 jeničce móžno, jeli so dalše serbske wsy wotbagruja, je fakt. Zdruha bě wón jenički, kotryž při starym žadanju za dwurěčnymi taflemi při awtodróze jako prěnje na „přidatne kóšty“ mysli a nic na wysoku symbolisku hódnotu a widźomnosć našeje rěče. A střeća nima wón – zaso jako jenički – móžnosć, sej jako serbska žona serbske mjeno z prawej kóncowku tež do wupokaza zapisać směć, scyła za trěbnu. Haj, wón samo na tym dwělowaše, zo sej to scyła něchtó žada.
Zapósłane (14.09.21)
Sonja Krječmarjowa z Budyšina wupraja so k přinoškej Marka Wjeńki w SN z 10. septembra:
Zapósłane (13.09.21)
Jako čłon krajneho dźěłoweho zjednoćenstwa „Serbske žiwjenje“ Zwjazka 90/Zelenych podawa Hagen Domaška swoje mysle k přinoškej „Zdźěla jasne wuprajenja k serbskim naležnosćam“ we wudaću SN z 8. septembra:
Serbske dźěłowe kruhi sakskich stron SPD, Lěwica a Zwjazk 90/Zeleni su nadstronski wólbny forum organizowali. Nowy Casnik, Serbske Nowiny kaž tež politiske strony internetnje su wo terminje informowali
Zaměr při tym bě, zo kandidatki a kandidaća swoje stejišćo k serbskim naležnosćam rozłožuja a rozjimaja. Jich za serbske temy sensibilizować bě dalši narok, zo bychu je dale w swojej stronje šěrili, so zeznawali a mjezsobne styki nawjazali.
Jedne ćežišćo mjez wjacorymi bě přichod politiskeho zastupnistwa serbskeho ludu. Derje je, zo maja wšitke kandidatki a wšitcy kandidaća Serbski sejm za wažneho rozmołwneho partnera. Wšako złožuje so jeho wobstaće na samsny princip kaž zwjazkowy sejm, w kotrymž chcedźa so stać ze zapósłanču abo zapósłancom: na swobodnych wólbach. To je poprawom přezjednosć w němskim staće, pječa pak nic w našim małym ludźe.
Zapósłane (08.09.21)
Měrćin Krawc z Delnjeho Wunjowa přispomnja k póndźelnemu zarjadowanju wokoło 20. róčnicy Chróšćanskeho šulskeho zběžka:
Połny wočakowanjow podach so do Chrósćic na zarjadowanje, kotrež stej Domowina a Serbske šulske towarstwo organizowałoj. Po tym zo běchu na minjenej hłownej zhromadźiznje třěšneho zwjazka serbskich towarstwow kubłansku awtonomiju jako nowy zaměr wuwołali, sym so nadźijał, zo prašenje, što nas zhladowanje na lěto 2001 wuči a što z toho slěduje, kotre žadanja dyrbjeli stajeć a što móžemy sami činić, w narěčach a diskusijach wažnu rólu hraja. Buch pak hórko přesłapjeny: Nimo žałosćenja dožiwjeneho dla a nimo hordosće, zo njejsu sej tónkróć raz wšitko lubić dali, wosta zarjadowanje kóždy rozmach a nastork, kotryž bych sej přał, dołžne.
Zapósłane (16.08.21)
„Njeje spomóžne, wukony druhich na tajke wašnje pohódnoćeć“, měni Manfred Hermaš z Rownoho ke komentarej Mariana Wjeńki w rubrice „Mój wid“ w SN z 9. awgusta a piše:
Hdyž ma něchtó dobru ideju a ju wulkotnje zwoprawdźi, njeje pak Hornjoserb – da měło so tola něšto namakać, štož móžeš kritizować. Přispomnjenja Mariana Wjeńki k tomu, kak je serbski awdijowy přewodnik za Wochožanski park błudźenkow nastał, su bjez respekta.
Ze swojeho časa jako čłon Rady za serbske naležnosće Sakskeje wěm, zo tež gmejny w serbskim jadrje swoje winowatostne nadawki nastupajo serbskosć přeco spjelnjeć njemóžachu, dokelž pjenjezy pobrachowachu. Tohodla je Sakska fonds zarjadowała, z kotrehož nětko wšitkim komunam w serbskim sydlenskim rumje spěchowanje přisteji. A ze sakskeho fondsa „Čiń sobu!“ su sej tež gmejny w serbskim jadrje přidatne projekty spěchować dali, byrnjež to pjenjezy byli, kotrež su za změnu strukturow po zakónčenju brunicoweho hospodarstwa předwidźane.
Zapósłane (29.07.21)
Benjamin Hrjehor z Wiena poćahuje so na přinošk „Młody pjekar z łužiskim chlěbom“ w SN z 23. julija:
Móže to špatny čłowjek być, kiž tajki rjany chlěb pječe? Foto wo młodym pjekarju z łužiskim chlěbom namakaš tróšku nakromnje na štwórtej stronje pjatkowneho wudaća Serbskich Nowin, tam hdźež snano někotři hižo tak dokładnje njehladaja. Pjekar je sobustaw AfD, kaž to znajmjeńša w poslednjej lince steji. Wón pak je wjace hač to. Za přećelnym posměwkom chowa so jedyn z hłownych akterow Budyskeje wotnožki neofašistiskeho identitarneho hibanja.
Paul Neumann pochadźa z pjekarskeje swójby a je na serbskim gymnaziju maturował. Swoje znajomosće serbšćiny wužiwaše w zašłosći při zhotowjenju serbskorěčnych plakatow a transparentow za neofašistiske demonstracije. W socialnych syćach pokazuje so wědomje byrgarski, tež tu pak wukopaja so přez zhromadne wobrazy přeco zaso zwiski k militantnej neonacistiskej scenje. Tajke postupowanje so šlachći. Wjace hač 800 ludźi — mjez nimi tež syła młodych Serbow a Serbowkow — sćěhuje Neumanna na Instagramje, podobna ličba na Facebooku.
Zapósłane (15.07.21)
Cyril Pjech z Berlina piše:
Zapósłane (13.07.21)
Goro Christoph Kimura z Tokija pisa:
Knjez Jan Wjenk je w swojim dopisu 30. junija w SN mój list w naležnosći zachowanja farskeho městna we Wotrowje naspomnił. Runje před dźesać lětami běch tehdyšemu Drježdźansko-Mišnjanskemu biskopej swój wid zdźělił, zo zasłužeja sej Serbja jako mały lud wosebitu kedźbnosć (wujimk, přełožk z němčiny): „Zdźeržeć fararja za relatiwnje mału wosadu kaž Wotrow móže so nadproporcionalne zdać přirunujo z druhimi wosadami. Katolska cyrkej na swěće pak njerozsudźa telko po ličbach, ale dźiwa na połoženje potrjechenych. Tak ma na přikład mała katolska diaspora w Mongolskej na 20 ludźi (!) fararja a na 500 ludźi w cyłym kraju biskopa. (...) Dopominam so na hosći z Bayerskeje we Wotrowje. Woni z wobdźiwanjom zwěsćichu, zo w Serbach wjele wjace ludźi kemši chodźi hač pola nich. Spěchować tajku sylnu a nadměru aktiwnu wosadu změje zawěsće tež pozitiwny wliw na cyłe biskopstwo.“ Dźakuju so knjezej Wjenkej za naspomnjenje, a chcu horliwemu Serbej hišće z cyłeje wutroby k 80ćinam gratulować.
