André Bulank, wjesnjanosta gmejny Njebjelčicy, podawa swoje zhladowanje na konflikt wokoło Heldec doma w Njebjelčicach, wo kotrymž běchu Serbske Nowiny 14. awgusta rozprawjeli:
Heldec dom so hižo dawno wjace jako zetkawanišćo towarstwow abo putniska hospoda njewužiwa. Něhdźe pjeć lět dołho jón tohodla přenajamy. Za komunalne objekty maja so generelnje potrjeby saněrowanja zwěsćić. Kak při aktualnym napjatym hospodarskim połoženju z tym wobchadźamy, je dale wotewrjene. Za towarstwowe žiwjenje je we wjesnym dźělu Njebjelčicy alternatiwow, mjez druhim su rumnosće w gmejnskim centrumje abo na farskim dworje.
Naš čitar Petr Pánek z Mikulašovic reaguje pod titlom „Z čěskim wóčkom Jáchyma“ na přinošk „Čěske ćeže z prózdninami“ (SN zašły štwórtk):
Sym posledni artikl „Z čěskim wóčkom“ čitał a zaso raz začuwał, zo nochcu swět dale z čěskimaj wočomaj widźeć. Spytam jón z wočomaj swojeho 11lětneho syna Jáchyma widźeć.
Čehodla? Mi so na přikład čěske zhladowanje na dźěći njelubi. W mojim ródnym kraju mjenujcy su dźěći ludźom nimale wšudźe wobćežne. Stajnje zetkawaš nerwoznych staršich, kotřiž na dźěći njetrjebawšo rjeja. Praja jim: Njenerwuj mje! abo zo nimaja chwile. Hdyž dźěći do ćaha abo busa zalězu, budźe hnydom při durjach něchtó, kiž na nje swari. W šuli maja wučerki, kotrež dźěći rady nimaja. A tak móhł z naličenjom pokročować. Ně, Čěska njeje dźěćom přichileny kraj.
Měrko Šołta wupraja so k artiklej „Sep prapremjerow, nowe formaty a abonementy w SLA“ ( SN 12. awgusta):
Wutoru informowachu SN zjawnosć nastupajo „wjerški hrajneho plana“ Serbskeho ludoweho ansambla w dobje 2025/2026. Mjez druhim chce SLA „oratorij ‚Nalěćo‘ Korle Awgusta Kocora a Handrija Zejlerja“ předstajić. We woprawdźitosći pak jedna so wo „Nalěćo“ Jana Bulanka, kotrež bě wón jako adapciju na kompoziciju Korle Awgusta Kocora stworił. Potajkim, informujće sprawnje a njewodźće ludźi za nós.
Cyril Pjech z Berlina piše:
Zašły tydźeń su so awtoromaj hnydom w dwěmaj serbskimaj medijomaj sylzy ronili: Njedźelu awtorej w Katolskim Posole hladajo do Ukrainy a srjedu tomu w SN hladajo na Gazaske pasmo.
A što widźitaj awtoraj (złožuju so na Tagesschau, kotruž kóždy dźeń hladam)? W Ukrainje njepokazuja wobrazy z fronty, jenož wobškodźene twarjenja w městach, a mjenuja ličbu mortwych. Wysokodomy maja wobškodźene fasady, ale steja. Rusojo twjerdźa, zo su je trjechili, dokelž běchu tam wojerske zarjadowanja.
W Gazaskim pasmje hižo ani jedyn dom njesteji, jenož rozwaliny su widźeć, ludźo tradaja hłód a ličba mortwych je mjeztym wyša hač 60 000. Tež Israel twjerdźi, zo chowaja so pod domami, chorownjemi, lěhwami a šulemi wojowarjo Hamas. Za awtora KP su sylzy zawod za nabožne mysle, kaž je to za zawodny nastawk z wašnjom. Awtor w našim wječorniku praša so politisce za tym, što to woznamjenja, a kritizuje politiku stata Israel. Je prěnje sobužarowanje a druhe antisemitizm?
Hagen Domaška z Drježdźan piše:
Stawiznar Karl Schlögel je Měrowe Myto němskeho knihikupstwa dóstał. Hižo w januaru 2023 zwěsći wón w Tagesspiegelu, zo maja „žadanja němskich intelektualnych, so přećiwo dodawanjam brónjow do Ukrainy wuprajić a město toho jednanja z Ruskej spěchować, z cyłej njewědu połoženja činić“. Na to chcu tež serbskich intelektualnych skedźbnjeć, kotřiž chcedźa Ukrainje rady dać.
Z Ruskej njemóže tuchwilu nichtó ani wo čłowjeskich prawach, ani wo ludowym prawje jednać. Ale bjez čłowjeskich prawow njeje žanoho měra – to wuči nas wobydlerske hibanje 80tych lět. Přizamknu so tohodla Karlej Schlögelej, kotryž praji: „Bjez swobodneje Ukrainy njemóže žanoho měra w Europje być.“
Michał Šołta z Budyšina piše:
Wulki šok mje zaja, jako čitach pjatk, 18. julija, w Serbskich Nowinach, zo bu knjez Hanzo Wylem-Keł z Huštanja z towarstwa „Gromaźe“ wuzamknjeny. Kaž naš wječornik pisa, so Keł dlěje hač tři lětdźesatki za serbski lud angažuje a je pjeć dwurěčnych dźěći woćahnył. Poprawom dobry čłowjek. Přičina jeho wuzamknjenja je, zo je wón we Wětošowje mandat za AfD přiwzał.
Tak wjele kaž wěm, njeje Domowina žana politiska strona a towarstwo „Gromaźe“ tež nic. Podawk pak ma tola politiski poćah. AfD pak je jedna strona, z kotrejž budźemy prawdźepodobne tež w přichodźe ličić dyrbjeć. Politiske konstelacije hustodosć njejsu tak stabilne kaž so zdadźa. Najlěpši přikład je zwrěšćenje Němskeje demokratiskeje republiki (NDR). W Budyšinje na přikład hižo njebudu zmahować serbske chorhoje před hamtami a na mosće měra. Što chcemy činić, jeli budźe AfD w knježerstwach krajow a zwjazka?
Christiana Piniekowa z Choćebuza wupraja so k postupowanju Braniborskeje nastupajo serbšćinu na techniskej uniwersiće:
Jara wjeselu so nad wobzamknjenjom krajneho sejma, zo budźe so na Braniborskej techniskej uniwersiće (BTU) wot zymskeho semestra 2026/2027 zahajić studij wučerstwa serbšćiny za primarny schodźenk, t. r. za zakładnu šulu (1. do 6. lětnik), štož je krajny sejm 16. julija 2025 wobzamknył po tym, zo su frakcije CDU, SPD a BSW wotpowědnu próstwu stajili. Tutomu wuspěchej su mjez druhim čłonojo Rady za serbske naležnosće Braniborskeje přinošowali, wšako so lěta dołho za to zasadźowachu a parlamentariske dźěło wukonjachu. Myslu sej, zo mamy w Delnjej Łužicy dosć kompetentnych a nazhonitych ludźi, kotřiž zamóža tutón studij rěčnje, wědomostnje a didaktisce w serbskej rěči zdokonjeć. Njech so w dobrej zhromadnosći wšitko derje radźi! Widźu w tym wulki krok emancipacije delnjoserbskeje comunity.
Manfred Hermaš ze Slepoho ma wosobinske přispomnjenje k wčerawšemu čitarskemu listej Jadwigi Malinkoweje:
Zo móže wšo hinak hić, je Slepo na „Zjězdźe Serbow 2000“ dnja 1. julija 2000 dopokazało. Tam smy njedźelu ekumenisku Božu słužbu swjećili. Spočatnje tomu tehdyši Serbski superintendent zadźěwaše. Ale z podpěru našeje tehdyšeje fararki Ulriki Menzeloweje smy mšu potom zmóžnili. Sam sym tehdy Serbsku wosadnu słužbu EKsOL nawjedował. Ze Šćěpanom Delanom smój so potom na zhromadny liturgiski wotběh dojednałoj. Prědowanje smój do třoch blokow dźěliłoj, tak zo rěčachu naša wjesna fararka, serbski superintendent a kanonik Šćěpan Delan. Tež na spěwy smój so dojednałoj. Tak spěwachmy wotměnjejo kěrluše z hornjoserbskich ewangelskich spěwarskich a z katolskeho Wosadnika. Jenož při jednym choralu smy našeho katolskeho bratra prosyli, zo spěw resp. hrónčko z česćowanjom Marije njespěwa. Kóžda strona je kompromisy akceptowała a tak smy po tym na farskej zahrodźe zhromadnje lipy sadźeli.
Fararka Jadwiga Malinkowa ze Slepoho ma přispomnjenje k lětušemu mjezynarodnemu foklornemu festiwalej w Chrósćicach:
Minjeny kónc tydźenja smědźach ze swójbu zaso wulkotnu hospodliwosć Chróšćanow na mjezynarodnym folklornym festiwalu dožiwić. Wobdźiwam Chróšćanow a wosebje tež Chróšćanki, z kelko prócu su znowa swoje dwory wupyšili a tysacy ludźi pohosćili. Lětsa słuša jim hišće wjetši dźak, wšako su so hižo w zašłych tydźenjach k jubilejej 800. róčnicy přewšo angažowali. Wša česć wam!
Wězo wobdźělich so na festiwalnej njedźeli tež na tamnišich kemšach na farskej łuce. Tež tute běchu z wjele prócu přihotowane, wšako wěm ze swójskich nazhonjenjow, što to rěka, tajke wulke a wjacerěčne kemše organizować.
Dalokož wěm, pak njeje mjezynarodny folklorny festiwal katolske zarjadowanje, ale festiwal cyłeje Łužicy: W Hochozy, Budyšinje a Chrósćicach wustupuja folklorne skupiny. Tohodla by swjedźenskim kemšam festiwala wotpowědowało, bychu-li ekumeniskeho razu byli.
Jan Wjenk z Wotrowa piše k smjerći Rejzy Čornakoweje: