Regina Šołćina z Konjec pisa:

„Serbja, što to dyrbi?“, rěka w žortnym skeču. Haj, to so prašam, myslo na hłowna a wólbnu zhromadźiznu župy „Michał Hórnik“ Kamjenc minjeny pjatk w Chróšćanskej „Jednoće“.

Za ewentualnu legitimaciju natyk­njenja z koronu za strowotniski zarjad dla bu kóždy čłon namołwjeny, wonu „cedlku“ w němskej rěči wupjelnić. Čehodla so potom w zjawnosći wjele lubjacy slogan „Sorbisch? Na klar.“ propaguje? Nažel widźu w tajkim zjawje přisłowo: „Wodu prěd’wać a wino pić.“

K aktualnemu rozestajenju wo kanclersku kandidaturu CDU/CSU měni Eduard Luhmann ze Smjerdźaceje:

Kaž Markus Söder z Arminom Laschetom wobchadźa, njeje jenož čłowjesce šamałe, ale awtoritu Lascheta jako předsydy CDU chětro podrywa. Njemóžu so zaćišćej wobarać, zo so Söder samo trochu wjeseli Lascheta zdemontować.

Ćim bóle mje kaž tež mnohich mojich stronskich přećelow w Sakskej CDU zwjesela, zo je bywši riwala Armina Lascheta we wólbach wo předsydstwo zwjazkoweje CDU Friedrich Merz w tak mjenowanym „K-prašenju“ Laschetej pomocliwje po­boku. To njeswědči jenož wo čłowjeskej přistojnosći, ale runje tak wo politiskej rozhladniwosći. Wšako móhło so Merzej poboku Lascheta poradźić wonych wolerjow zaso za sebje zdobyć, kotřiž su klubu a z přesłapjenja sčasami AfD wolili. Dalši plusdypk je, zo nima Merz jenož nastupajo hospodarstwo a financy jasne a krute měnjenje, ale wě swoje namjety tež zaměrnje zwoprawdźeć.

K znapřećiwjenju Dawida Statnika we wudaću našeho wječornika z 12. apryla na přinošk Klawsa Thielmanna „Koordinowane – znajmjeńša“ (SN ze 6. apryla) wupraja so Měrćin Krawc z Delnjeho Wunjowa:

Dawid Statnik měni w swojim zna­pře­ćiwjenju, zo by Domowina tež politiske zastupnistwo Serbow zaručiła, a skedźbnja k tomu na přewjedźene rozmołwy ze zapósłancami a statnymi ministrami, na wu­zběhnjenje Serbow w podłožkach nastupajo strukturnu změnu kaž tež na poradźowanske gremije młodźiny pola zwjazkoweho ministerstwa za nutřkowne naležnosće. Lěpje hač předsyda Domowiny njemóžeš tuchwilnu politisku bjezmócnosć a wobmjezowanosć našeho ludu dopokazać: wuradźowanja a wu­zběhnjenja su wjeršk našeje politiskeje participacije! Tu wšak so kompetency zastupnistwa zajimow, kajkaž Domowina z.t. je, njewuchilnje kónča.

Priwatny docent dr. Timo Meškank z Lipska měni k nastawkej wo čěskim ministerskim předsydźe Babišu we wudaću SN z 12. apryla:

Je derje a chwalobne, zo Serbske Nowiny prawidłownje wo połoženju w susodnej Čěskej republice rozprawjeja. K tomu słušeja tež politika a jeje zastupjerjo. Andrej­ Babiš je wot lěta 2017 předsyda knježerstwa. Zdobom je wón załožer a mějićel wulkeho koncerna Agrofert. Narodźił a wotrostł bě wón w Bratislavje, mać a nan běštaj komunistiskaj funkcionaraj. W lěće 1980 sta so wón tohorunja z čłonom Komunistiskeje strony Čěskosłowakskeje (KSČ). Wot toho lěta wjedźeše jeho statna bjezstrašnosć jako dowěrnika, wot lěta 1982 pak jako agenta.