Ze zwrěšćenja wuknyć – nowa šansa za Serbow?, piše dr. Měrćin Wałda z Njeswačidła po rozsudźe na njedobro iniciatiwy mjeńšin Minority Safe Pack:

Kaž njedawno Serbske nowiny pisachu, je najmłódši rozsud EU hórki signal, po kotrymž nimaja so žane dalše škitne naprawy za mjeńšiny a jich rěče přewjesć – runje za nas Serbow, kotřiž nimaja swójski stat, ani škitacy maćerny kraj a žane stabilne swójske struktury. Iniciatiwa Minority Safepack, 2013 z wjele nadźiju zahajena, je zwrěšćiła. Nětko ćim bóle na nas samych zaleži, zamołwitosć přewzać. Přetož jedne je jasne: Nichtó njebudźe to za nas činić.

Prawy započatk bě drje dialogowy forum Serbska debata, kotryž nasta pod třěchu Krajneje centrale za politiske kubłanje. Dalokož njewostanje při sym­boliskich kołach, ma wona potencial. Woprawdźite dorozumjenje pak trjeba wjace: hłubše zhromadne rozmyslo­wanje, připosłuchanje, znapřećiwjenje, změnu perspektiwy – a wolu, nošne rozrisanja wuwiwać. Přehusto skutkuje dialog inscenowany, nježiwy.