Bonn (dpa/SN). Zo bychu splažne znjewužiwanje dźěći a młodostnych přez katolskich duchownych dokładnje předźěłali, chcedźa němscy biskopja přiradu potrjechenych załožić. To je konsekwenca z přepytowanja, předpołoženeho w septembru 2018, zdźěla Němska biskopska konferenca w Bonnje. „Nazhonjenja minjenych lět nas wuča, zo móžetej so předźěłanje a prewencija splažneho znjewužiwanja jeno zhromadnje z potrjechenymi skutkownje poradźić“, potwjerdźa społnomócnjeny biskopskeje konferency za znjewužiwanje, biskop Stephan Ackermann. „Sym sej wěsty, zo je přirada po­trjechenych za to dobra pomoc.“

Hač do 7. februara 2020 móža wosoby, kotrež su wot splažneho znjewužiwanja přez duchownych potrjechene, swój zajim za sobudźěło w planowanej přiradźe přizjewić.

Studija bě wunjesła, zo je w lětach 1946 do 2014 znajmjeńša 1 670 katolskich duchownych 3 677 zwjetša muskich njepołnolětnych znjewužiwało. Awtorojo studije warnuja, zo tema dawno hišće wotbyta njeje. Strach znjewužiwanja cyrkwinskich strukturow dla dale wobsteji.

Silwestra dla chcedźa w Berlinskim měšćanskim dźělu Srjedźa wšitke 1 300 parkowanskich awtomatow zamknyć, zo bychu je před praskotakami škitali. Kaž přisłušny porjadniski zarjad zdźěla, budu awtomaty wot 27. decembra hač do 1. januara wotpowědnje škitane. Šoferojo maja so najebać to na nadróžny porjad dźeržeć. Pak zapłaća z mobilnym telefonom, pak połoža sej parkowansku tačel do awta. Štóž so na to dźerži, tón budźe ze šokolodku mytowany, kaž rěka.

Z nostalgiskej podzemskej železnicu móža zajimcy w do- a hodownym času po New Yorku jězdźić. Ćah z 30tych lět wozy hosći po podzemskim systemje ameriskeje metropole. Zamołwići na to dźiwaja, zo wšitko kaž něhdy wupada. Na sćěnach wisaja­ plakaty tehdyšeho časa, kotrež wabja­ za wójnske požčonki abo mydło za dźesać­ centow.

Drježdźany/Chrósćicy (SN/BŠe). Chróšćanska wosada dyrbješe minjeny tydźeń špatnu powěsć Drježdźanskeho-Mišnjanskeho biskopstwa znjesć. Hórnikowy dom w Chrósćicach njebudźe přichodnje ponowjeny, kaž zastupjerjo wosady minjeny tydźeń w Drježdźanach zho­nichu. Hižo přizwolene spěchowanske srědki we wobjimje 700 000 eurow njesmědźa sej wupłaćić dać. Wo tym informowaše Chróšćanski wosadny farar Měrćin Deleńk přitomnych na njedźelnej Božej mši.

Nowinski rěčnik biskopskeho ordi­nariata Michael Baudisch mjenuje dwě přičinje. W Drježdźansko-Mišnjanskim biskopstwje maja system, po kotrymž potrěbnosć twarjenjow na ličbje wosadnych měrja. Fary dóstanu za nje přiražki. Serbske wosady wobhladuje biskopstwo jako jedyn pastoralny rum, a za njón dyrbja zamołwići wužitny koncept twarjenjow zdźěłać, kotryž dotal njepředleži. „Fary maja mjezsobne kooperacije wutworić“, Baudisch rozkładźe, „a pruwować, kak móhli twarjenja wužiwać.“

Podstupim (SN/at). Statny sekretar w ministerstwje za wědomosć, slědźenje a kulturu Tobias Dünow je nowy knježerstwowy społnomócnjeny za nalež­nosće Serbow w Braniborskej. Kabinet w Podstupimje jeho wčera powoła.

47lětny, w Düsseldorfje rodźeny naslědnik dr. Ulriki Gutheil w zastojnstwje, je w Göttingenje němsku filologiju, srjedźne a nowše stawizny, publicistiku a komunikaciske wědomosće studował. Do powołanja na statneho sekretara 20. nowembra dźěłaše čłon SPD w zastupnistwje Delnjeje Sakskeje pola Zwjazka w Berlinje.

Takrjec jako prěnju akciju w nowej funkciju wabi Tobias Dünow w hamtskim łopjenu za klětuše wupisanje krajneho myta „Miny Witkojc“. Kaž z nowinskeje zdźělenki ministerstwa wuchadźa, ma wón „serbsku kulturu za wurjadne bohatstwo w a za Braniborsku. Wjeselu so serbskich akterow a zarjadnišća ze­znać a hromadźe z nimi k tomu přinošować, tule kulturu zawěsćić a dale wuwić.“

Prěni „serbski“ wopyt Tobiasa Dü­nowa w Delnjej Łužicy přihotuja za 9. januar.