„Akcija zdobom kampanja“
Budyšin (SN/bn). „Wotewrjenosć a inkluzija“ běštej hesle wčera sedmy raz wuhotowaneje akcije „Happy monday – Wjesoła póndźela“. Na Budyskim Póstowym naměsće powita předsyda Domowiny Dawid Statnik něhdźe 200 zajimcow wuzběhnywši, zo je „akcija zdobom imageowa kampanja za tolerantne a hižo sta lět dwurěčne město“. Program wuhotowachu poetryslammerka Kaddi Cutz a hosćo kaž tež band Zukunftsmusik dešća dla w foyeru Serbskeho domu.
Wyše popłatki za hladanje
Berlin (dpa/SN). Ludźo dyrbja so spočatk lěta 2025 na dalše zwyšenje přinoškow za hladanske zawěsćenje nastajić. Runje tak kaž chorobna kasa DAK liči tež zwjazk narunanskich kasow ze stupacymi přinoškami. Hłowna přičina je snadna pjenježna rezerwa hladanskich kasow, kotraž njedosaha wjace dlěje hač měsac. W tymle padźe smě zwjazkowe knježerstwo popłatk zwyšić. W Němskej ličba hladanja potrěbnych raznje přiběra.
Raketa po starće rozbuchnyła
Na swojim wopyće w Němskej porěča francoski prezident Emanuel ...
Macron wopyt w Němskej zakónčił
Meseberg/Münster (dpa/SN). K zakónčenju swojeho tři dny trajaceho wopyta w Němskej je so francoski prezident Emmanuel Macron dźensa ze zwjazkowym kanclerom Olafom Scholzom (SPD) k politiskim rozmołwam zešoł. Na zetkanju na hrodźe Meseberg w Braniborskej su so tež ministrojo wobeju knježerstwow wobdźělili. Wobsahowje póńdźe wosebje wo prašenje brónjenja a wěstoty kaž tež wo europsku hospodarsku politiku na swětowych wikach. Na spočatku chcyštaj so wobaj politikarjej k wosobinskej rozmołwje zetkać.
Dopołdnja wočakowachu francoskeho hosća w Münsteru. Tak chcychu jemu Mjezynarodne myto Westfalskeho měra spožčić. Z nim hódnoća prócowanja Macrona wo pohłubšenje zhromadneho dźěła. Zwjazkowy prezident Frank-Walter Steinmeier chcyše lawdaciju za francoskeho hosća dźeržeć. Ze zrěčenjom Westfalskeho měra běchu 1648 zahubnu Třicećilětnu wójnu w Europje skónčili.
Kijew wita francoskich wukubłarjow
Kijew (dpa/SN). Wyši rozkazowar ukrainskeho wójska Olexander Syrskyj wita iniciatiwu Francoskeje, wojerskich wukubłarjow do Ukrainy pósłać, zo bychu ukrainskich wojakow wukubłali. Wón je hižo dokumenty podpisał „kotrež zmóžnjeja prěnim francoskim wukubłarjam, hižo bórze ukrainske wukubłanišća wopytać a so tam z infrastrukturu a personalom zeznajomić“. Oficialne wobkrućenje z Francoskeje, zo tajku wukubłansku misiju woprawdźe planuja, dotal njepředleži. Zakitowanske ministerstwo w Parisu na naprašowanje powěsćernje dpa zdźěla, zo je wukubłanje na ukrainskim teritoriju „jedne z twarnišćow, wo kotrychž diskutujemy“. Nadrobnosće sej z ukrainskimi partnerami dorěča.
Při nowych ruskich nadpadach na wuchodne ukrainske město Charkiw je po oficialnych informacijach wobydler žiwjenje přisadźił. Mjeztym je ličba smjertnych woporow po zahubnym ruskim nadpadźe na twarske wiki w Charkiwje minjenu sobotu na 18 rozrostła. Ruska twjerdźi, zo jednaše so wo objekt wójska.
UNO wuradźuje wo nadpadźe
Bjezstrašnostna rada po smjertnych nalětach na lěhwo ćěkancow w Rafah
New York (dpa/SN). Po zahubnym nadpadźe israelskich lětadłow na stanowe lěhwo ćeknjenych palestinskich ciwilistow w Gazaskim pasmje su Bjezstrašnostnu radu UNO dźensa k nuzowemu posedźenju zwołali. Po informacijach diplomatow ma so zetkanje dźensa wječor w 21.30 hodź. wotměć. Spočatnje njebě jasne, hač wotměje so posedźenje najmócnišeho gremija UNO, kotrež běštej Algeriska a Słowjenska zwołałoj, zjawnje abo za zawrjenymi durjemi.
Israelske wójsko bě při nalětach lětadłow na lěhwo wuhnatych minjenu sobotu wječor po informacijach Palestinjanow znajmjeńša 45 ludźi moriło a dźesatki zraniło. Wopory běchu zwjetša žony, dźěći a młodostni. Podawk bě mjezynarodnje zludanje zbudźił. Generalny sekretar UNO António Guterres je postupowanje Israela raznje zasudźił: „Tutón horor dyrbi so skónčić.“
Zahuba nas napomina
Chcemy so nadźijeć, zo su francoskemu prezidentej Macronej rozkładli, kotry wuznam Myto Westfalskeho měra ma, kotrež su jemu dźensa w Münsteru spožčili. Lěta 1648 bě Europa po 30 lět trajacej wójnje na kóncu. Města běchu zničene, wjeski wurubjene a wotpalene. Ludnosć běchu landsknechty, kotrež po krajach ćahachu, morili. W Kulowje bydleše po chronice města hišće pjeć mandźelskich porikow. Hóršu katastrofu tehdy hišće dožiwili njeběchu. Traješe lětdźesatki, doniž so kraj poněčim zaso njezhraba.
Hdyž słyšu plany Macrona, francoskich wojakow do Ukrainy pósłać, so mi zdawa, zo jeho tola hišće prawje informowali njejsu. Tež mócnarjo tehdyšeho časa běchu swoju móc na sylne wójska a na strategiske zwjazkarstwa zepěrali. Na kóncu stejachu před wulkej zahubu. Njeby lěpje było, myto w Münsteru jako zakład Europskeho měroweho zrěčenja wobhladować, zo bychmy nowej zahubje kaž 1648 tola hišće zadźěwali? Marko Wjeńka
Pisane a wótře za tolerancu
Běła Woda (CK/SN). Składnostnje 2. Christopher Street Day (CSD), běše so minjenu njedźelu něhdźe 75 ludźi na hłownym torhošću zhromadźiło, zo bychu za tolerancu a akceptancu wšelakorych formow žiwjenja a lubosće demonstrowali. Kaž loni hižo, měješe swjatk tež lětsa zaso njerjanu předstawiznu: Po lońšim zarjadowanju běchu zarjadowarjow na Facebooku skřiwdźili, lětsa běchu njeznaći wjacore wulke transparenty roztřihali, kotrež mějachu za demonstraciju wabić. Wot toho pak njedadźa sej organizatorojo přihoty skazyć, měni zapósłanča krajneho sejma Antonia Mertsching (Lěwica), kotraž je CSD zhromadnje z iniciatiwnej skupinu přećiwo mobbingej zarjadowała. Skóncowanje plakatow pak bě podpěru měšćanskeje towaršnosće hišće powjetšiło, powěda Mertsching dale. „Stejimy tu zhromadnje. Naša Běła Woda je pisana a mnohostronska“, potwjerdźi wona. Nawodnica twarskeho referata, Dorit Baumeister, wozjewi w mjenje wyšeho měšćanosty: „Hakle mnohotnosć a toleranca tworiłoj strowu měšćansku zhromadnosć, kotraž da cuzym přichadźeć a wostawać.
To a tamne (28.05.24)
„Moped lubosće“, z kotrymž je bywši francoski prezident François Hollande skradźu swoju lubku wopytał, su w Parisku za 25 420 eurow přesadźowali. Kupił je jězdźidło załožer awtomobiloweho muzeja. Za čas prezidentstwa běchu Hollandeho 2014 fotografowali, jako k swojej lubce, dźiwadźelnicy Julie Gayet, jědźeše. Mjeztym je Hollande dawno z Gayet zmandźeleny. Kupcej bywši prezident pisomnje wobkrući, zo jedna so wo originalny moped tehdyšeho časa.
Psy, kóčki, ptački a hady chcedźa w Berlinskej ewangelskej wosadźe w měšćanskim dźělu Rudowje 1. junija znowa žohnować. Zamołwići akcije liča z něhdźe sto wopytowarjemi, kotřiž ze swojimi zwěrjatami přińdu. Te pak njesmědźa wyše hač meter być, zo njebychu na kóncu konje a kruwy w Božim domje stali. Tež jědojte zwěrjata njejsu dowolene.
Liča z 2 000 woporami
Port Moresby (dpa/SN). Narodny zarjad za škit před katastrofami na kupje Papua-Neuguinea liči ze znajmjeńša 2 000 smjertnymi woporami po zahubnym zesuwanju zemje minjeny pjatk. Zemja bě so w nocy na pjatk zesuwała a sydlišćo zničiła. Hłowne dróhi potrjecheneje kónčiny su blokowane. Połoženje je dale njewěste, dokelž so masy zemje dale hibaja. Tole wohrožuje pomocnikow, kotřiž zadwělowani spytaja, zasypanych wobydlerjow ze zemje a kamjenjow wućahnyć.
Wjeršk WHO bjez zrěčenja
Genf (dpa/SN). Po zwrěšćenju swětoweho pandemijoweho zrěčenja su dźensa w Genfje kóždolětne zeńdźenje Swětoweje strowotniskeje organizacije WHO zahajili. Minjeny pjatk bu znate, zo dyrbi planowany wjeršk zhromadźizny wupadnyć. Předwidźane bě swjatočne schwalenje zrěčenja, kotrež ma nowemu chaosej po wšěm swěće, kaž při koronapandemiji, zadźěwać. Zastupnicy 194 čłonskich statow pak njemóžachu so hač do kónca na zhromadny tekst dojednać.
Wjace hladanja potrěbnych
Žadyn jasny wuspěch AfD w Durinskej
Erfurt (dpa/SN). Při wólbach krajnych radow a wyšich měšćanostow w Durinskej njeje AfD w prěnim wólbnym přeběhu wčera žane wodźace zastojnstwo zdobyła. Wo tym rozsudźa wolerjo hakle w druhim wólbnym kole, w kotrymž so zwjetša kandidaća CDU a AfD rozestajeja. W połojcy wšěch wokrjesnych sejmow a měšćanskich radow stej wobě stronje někak jenak sylnej. Wólby su prěni test politiskeje nalady do wólbow krajnych sejmow w septembrje. AfD leži we wšodurinskich woprašowanjach hižo měsacy daloko před druhimi stronami. W Durinskej knježi tuchwilu koalicija SPD, Lěwicy a Zelenych z ministerskim prezidentom Bodom Ramelowom (Lěwica) na čole.
Cyłkownje dźewjeć z 13 nastupjenych kandidatow AfD je druhe wólbne koło docpěło, kaž ze zdźělenki krajneho wólbneho nawody wuchadźa.
CDU bě we wjacorych městach wuspěšna a móžeše tam swoju komunalnu móc skrućić. Tak je so w Erfurće kandidat CDU Andreas Horn přećiwo mějićelej zastojnstwa Andreasej Bauseweinej (SPD) přesadźił. We Weimaru a Suhlu staj kandidataj CDU hnydom w prěnim wólbnym přeběhu dobyłoj.
