Wotpokazuja socialny wottwar
Reichsbürgerow přepytowali
Pušćenje zastajencow so dliji
Tel Aviv/Gaza (dpa/SN). Mjez Israelom a islamistiskej Hamas wujednane pušćenje zastajencow z Gazaskeho pasma so dliji. „Dojednanu akciju móžemy drje hakle pjatk přewjesć“, zdźěli israelski wěstotny poradźowar Tzachu Hanegbi wčera wječor medijam. Dokładny termin wojerskeje přestawki chcychu dźensa wozjewić. Hamas bě wčera připowědźiła, zo chcychu dźensa wojować přestać, zo móhli zastajencow přepodać. Na druhim boku wočakowachu Palestinanjow, kotrychž chcyše Israel ze swojich jastwow pušćić. Pječa pak pobrachuja pod wotpowědnym dokumentom hišće wjacore podpisma israelskeje strony a zastupnikow Hamas. Nětko so nadźijeja, zo wobě stronje dokument přichodne hodźiny podpisatej. Israelske medije rěča wo „komplikacijach w poslednjej mjeńšinje“.
W zwisku z Hamas stejaca a z israelom tohorunja znjepřećelena milica Hisbollah w Libanonje, kotraž po spočatku Gazaskeje wójny stajnje zaso israelske wójsko nadběhuje a z raketami wobtřěla, njeje wobstatk zrěčenja.
To a tamne (23.11.23)
Wisajo pod nakładnym awtom je wopity Awstralčan na wšě 400 kilometrow sobu jěł. Poprawom chcyše so na tute wašnje darmotnje hač do přichodneho městačka předrěć a tam při čerwjenej ampli „wotskočić“. Truck pak měješe na swojim puću jenož zelene ample a hakle po štyrjoch hodźinach w měsće Gold Coast w susodnym zwjazkom staće pozasta. Policisća napisachu mužej chłostanku 170 eurow a dowjezechu jeho na dwórnišćo.
Pytajo za pokładom je muž na polu w Hohenlindenje pola Mnichowa ze swojim metalowym detektorom kwasny pjeršćeń 81lětneje žony z Awstriskeje namakał. Žona bydleše po kwasu 1964 we wsy a je tam pjeršćeń zhubiła. Pozdźišo přesydli so wona do Awstriskeje. Namakar, bywši policist, móžeše žonu z pomocu zadypaneho kwasneho datuma a stawniskich zapisow wsy wuslědźić.
Zastajencow spěšnje pušćić
Washington (dpa/SN). Knježerstwo USA dźěła po swójskich informacijach z wotmachom na tym, zastajencow w Gazasskim pasmje spěšnje wuswobodźić. Po słowach komunikaciskeho direktora Narodneje wěstotneje rady Běłeho domu John Kirbyja prócuja so „bjez přestawki“ wo rozrisanje, kotremuž su pječa „wo tójšto bliše přišli“. Při tym dźe wosebje wo pušćenje dźěći a žonow z rukow Hamas, „a wězo tež wo Američanow“.
Nowe brónje USA za Ukrainu
Washington (dpa/SN): Ukraina dóstanje nowy paket bróni z USA. Posyłka w hódnoće sto milionow dolarow je wobstatk pomocneho programa, kotremuž je kongres USA hižo přizwolił. Konkretnje jedna so wo rakety za wotwobaranje lětadłow, nastroj za mjetanje raketow a municiju za artileriju. Knježerstwo USA je nimo toho ruskimaj oficěromaj zakazało, do USA přińć, wumjetujo jimaj „ćežke ranjenje čłowjeskich prawow“.
Planuja nowy satelit
Zbožowny palestinski hólc wjeze měch muki domoj, kotryž je na ...
Wjetšina: Dalši powabk přećiwo wšědnemu dźěłu
Berlin (dpa/SN). 64 procentow wobydlerstwa so boji, zo móhli so ludźo zwyšenja wobydlerskeho pjenjeza 1. januara dla přećiwo tomu rozsudźić, prawidłownje na dźěło chodźić. Tole wuchadźa z dźensa wozjewjeneho wuslědka woprašowanja slědźenskeho instituta Forsa w nadawku magacina Stern.
Wosebje kritisce wobhladuja zwyšenje wobydlerskeho pjenjeza přiwisnicy AfD a unije CDU/CSU. 86 respektiwnje 78 procentow z nich měnja, zo njemóhło so tohodla hižo wudanić, dźěło wukonjeć. Tež mjez wolerjemi FDP (60 procentow) a SPD (54 procentow) přewahuje strach, zo móhła motiwacija na dobro dźěła popušćić. Jeničce přiwisnicy Zelenych su hinaše měnjenja. Jenož 27 procentow z nich wobhladuja zwyšenje wobydlerskeho pjenjeza jako powabk, nic wjace wšědnje dźěłać chodźić. Za zwěsćenje bě so institut 16. a 17. nowembra 1 009 dorosćenych prašał. Spočatk 2024 wobydlerski pjenjez za wjace hač pjeć milionow dorosćenych a dźěći w zakładnym zawěsćenju přerěznje wo dwanaće procentow zwyša. Sadźbu – kaž něhdy pola Hartza IV – kóždolětnje płaćiznam a mzdam přiměrjeja. Za samostejacych so sadźba potom wo 61 na 563 eurow měsačnje zwyši.
Guterres za wzajomne rozrisanje
New York/Gaza (dpa/SN). Gazaske pasmo njeměło so po skónčenju wójny z wida generalneho sekretara UNO Antónia Guterresa z protektoratom zjednoćenych narodow stać. „Njewěrju, zo by tole dobre rozrisanje było“, rjekny Guterres wčera na nowinarskej konferency w New Yorku. Wón žadaše sej město toho přechodnu fazu, na kotrejž dyrbjeli USA a arabske staty wobdźělene być. „Wšitcy dyrbjeli wuměnjenja stworić, kotrež bychu sylnemu palestinskemu zarjadnistwu zmóžnili, zamołwitosć w Gazaskim pasmje přewzać a na tutym zakładźe konsekwentnje konstrukt dweju statow zdźěłać“, wón rjekny. W pobrjóžnym Gazaskim pasmje bě islamistiska Hamas lěta 2007 namócnje móc na so storhnyła.
Rozrisanje dweju statow předwidźi samostatny palestinski stat w měrniwym susodstwje z Israelom. „Za to trjebamy zakład wjacorych akterow, kotřiž na wšelakich runinach hromadźe dźěłaja“, generalny sekretar UNO rozłoži. USA su garant wěstoty Israela, Palestinjenjo zepěraja so na swojich arabskich susodow.
Žane nowe wudawki wjace
Wusud sudnistwa w Karlsruhe wuskutkuje so na dźěło koalicije w Berlinje
Berlin (dpa/SN). Po wusudźe Zwjazkoweho wustawoweho sudnistwa nastupajo zwjazkowy etat je financne ministerstwo w Berlinje cyły rjad planowanych wudawkow blokowało. Po tutym puću chcedźa „dočasnemu poćežowanju etata za přichodne lěta zadźěwać“, wčera wječor w ministerstwje zdźělichu. Potrjechene su etaty wšitkich ministerstwow. Tuchwilne financne zawjazki wostanu płaćiwe, nowe pak su zakazane.
Amplowa koalicija SPD, Zelenych a FDP so dale wo tym wadźi, kak wobchadźeć z wusudom sudnikow w Karlsruhe. SPD je swoje žadanje potwjerdźiła, zakonski zakaz zadołženja zběhnyć, zo móhli deficit 60 miliardow eurow wurunać.
