Rozsudźa wo přichodźe kraja
Wjerškowe zetkanje kanclera Scholza z ministerskimi prezidentami
Berlin (dpa/SN). Je drje to jedne z najwažnišich wjerškow mjez Zwjazkom a zwjazkowymi krajemi: Dźensa su so zwjazkowy kancler Olaf Scholz (SPD) a ministerscy prezidenća zwjazkowych krajow zetkali, zo bychu předewšěm wo kóštach zaměstnjenja a zastaranja ćěkancow kaž tež wo wobmjezowanju njeregularneje migracije wuradźowali. Při tym chcychu wo wotstronjenju njetrjebawšeje běrokratije, wo pospěšenju procesow planowanja a dowolnosćow rěčeć. Nic naposledk steji přichod cyłoněmskeje jězdźenki „Deutschlandticket“ na hračkach.
Jednanja móhli so hač do pózdnjeje nocy ćahnyć, předewšěm, dokelž dźe wo wjele pjenjez. Na kóncu budźe wažne, hač móža so Zwjazk a kraje w bytostnym prašenju dojednać, zo bychu pačenju towaršnosće zadźěwali. Tole bě ideja zwjazkoweho kanclera Olafa Scholza, jako spočatk septembra pakt Němskeje za modernizowanje kraja namjetowaše.
To a tamne (06.11.23)
Dwójce USA přeprěčił je němski ekstremny sportowc Jonas Deichmann w běhu štyrjoch měsacow – z kolesom z New Yorka do Los Angelesa a pěši wróćo. Po nawróće do New Yorka je 36lětny předwčerawšim, sobotu, hišće měšćanski marathon sobu běžał, zo by so „zaso wochłódnił“. Deichmann je mjeztym w Guinnessowej knize rekordow zwěčnjeny. Z kolesom poby wón mjez druhim we Wladiwostoku a w Južnej Africe.
Dospołnje nimo kulił je so pospyt muža w badensko-württembergskim Dossenheimje, wobchod wurubić. 72lětna wobsedźerka jeho wućěri. Njeznaty muž bě pjatk wječor do wobchoda přišoł a wobsedźerku z nožom wohrozył, žadajo sej pjenjezy. Na to žona z dekoraciskimi wěcami, kiž měješe runje k rukomaj, za nim mjetaše. Překwapjeny paduch na to bjez rubizny z wobchoda ćekny.
Žadaja sej lěpšu podpěru
Wiesbaden (dpa/SN). Krótko do z napjatosću wočakowaneho wjerškoweho zetkanja nastupajo migraciju je sej předsyda konferency ministerskich prezidentow wjace pjenjez Zwjazka za zastaranje ćěkancow žadał. Kaž hessenski knježerstwowy šef Boris Rhein (CDU) zdźěla, su cyłoněmske wudawki za přiběracu ličbu migrantow mjeztym na 17,6 miliardow eurow rozrostli. Zwjazk přinošuje „runje 3,75 miliardow“ a chce sumu klětu znižić. Wuradźować chcedźa póndźelu.
Scholz: Znajomosće pruwować
Mannheim (dpa/SN). Zo bychu znajomosće dźěći w němčinje lěpje a zaměrnišo spěchować móhli, trjebaja po słowach zwjazkoweho kanclera Olafa Scholza (SPD) prawidłowne přirunowanske testy na šulach Němskeje. Tute testy měli so po dwěmaj lětomaj wospjetować. Tak móhli zamołwići zwěsćić, kajki je staw kmanosćow na tutym polu. Wuslědki njeměli so za statistiku, ale za politiske rozsudy na polu kubłanja wužić.
Přepytuja Chrupalle dla
Z njesměrnym wotmachom je orkan Ciaran atlantiski pobrjóh ...
Gazaska wójna ludźi starosća
Habeck žněje připóznaće
Wonkowny minister USA w Israelu
Tel Aviv (dpa/SN). Wonkowny minister USA Antony Blinken je znowa k rozmołwam do Israela dolećał. W Tel Avivje wočakowaše jeho israelski ministerski prezident Benjamin Netanjahu zhromadnje z dalšimi zastupnikami knježerstwa. Blinken chcyše so wo wojerskich planach Israela w boju přećiwo teroristiskej Hamas w Gazaskim pasmje informować. Nimo toho chcyštaj Blinken a Netanjahu wo humanitarnej pomocy za ciwilnu ludnosć w Gazaskim pasmje rěčeć. Blinken bě krótko po nadpadźe Hamas 7. oktobra hižo raz w Israelu pobył.
Mjeztym israelske wójsko ze swojej pozemskej ofensiwu přećiwo Hamas w Gazaskim pasmje pokročuje. Po informacijach israelskeje armeje su wojacy mjeztym Gazu wobstupili. Katastrofalne połoženje wobydlerjow Gazaskeho pasma kaž tež wulka ličba ciwilnych woporow w husto wobsydlenej pomórskej kónčinje su mjezynarodnu kritiku na postupowanju Israela zbudźili.
„Marku“ za Łužicu
To a tamne (03.11.23)
Domjace myše pytane: Slědźerjo w USA proša wobydlerjow wulkich městow kaž New Yorka, Philadelphije abo Richmonda, zo bychu domjace myše popadnyli a jim přewostajili. Ludźo měli pasle nastajić a zwěrjata žiwe popadnyć. Slědźerjo chcedźa zwěsćić, kak su so hrymzaki na čłowjekow zwučili, hač su w městach snadź mjenje spłóšiwe abo hač maja čłowjeka dla mjenje stresa. Projekt přepytuje tež ćělne rozdźěle myšow – hač su w městach wjetše hač na wsach.
Powětr z wobručow 70 awtow wotpušćili su njeznaći w nocy na štwórtk w Podstupimje w měšćanskim dźělu Babelsberg. Skućićeljo zawostajichu poselstwa, z kotrymiž protestowachu přećiwo wysokej přetrjebje bencina a diesela tutych awtow. Policija pruwuje, hač steji akcija w zwisku z podobnymi njeskutkami w druhich dźělach Podstupima.
Wulki narok jako normalita: Serbske ewangelske towarstwo
Platforma za dobru serbšćinu, čiłu diskusiju a integraciju nowych Serbow
Hdyž ći něchtó w bjezporočnej serbšćinje rozkładźe, zo nažel cyle porjadnje njeserbuje – potom sy na zetkanju Serbskeho ewangelskeho towarstwa (SET). Dalše wosebite přiznamjo, kotrež su tež na lětušej hłownej zhromadźiznje pěstowali, je čiła a cyle wotewrjena diskusija wo wšelakich temach. Tak je so na přikład Helmut Grós z Hornjeje Hórki prašał, čehodla serbski rozhłós rańše „słowo k dnjej“ njewusyła kóždu hodźinu, ale jenož trójce. Roman Nuk, redaktor MDR a jako rozprawjer přitomny, njeje to wotpokazał, ale na to skedźbni, zo je ludźi, kotřiž serbski rozhłós dlěje hač hodźinu słuchaja. Kelko wospjetowanja ma zmysła?
Sylna stronka SET je tež sensibilita, z kotrejž přidružnikow do serbstwa integruje. Nimo Handrija Sembdnera je dalši entuziast z Drježdźan z čłonom SET a je sej na hłownu zhromadźiznu dojěł: Arnim Busch, kotryž bě najprjedy čěsce nawuknył a nětko sej awtodidaktisce serbšćinu přiswoja.
