Biden do Indiskeje wotlećał
Washington (dpa/SN). Po negatiwnym tesće na koronawirus je so prezident USA Joe Biden na wjeršk G20 do Indiskeje podał. Lětadło prezidenta je wčera wječor na wojerskim lětanišću Andrews wotlećało. Po informacijach Běłeho domu su 80lětneho štwórty dźeń za sobu negatiwnje testowali, po tym zo běchu pola mandźelskeje Jill Biden póndźelu infekciju zwěsćili. Amtěrowacy španiski ministerski prezident Pedro Sanchez je pozitiwny a na wjeršk njepřijědźe.
CSU hłosy přisadźiła
Mnichow (dpa/SN). Měsac do wólbow bayerskeho krajneho sejma dyrbi CSU po zwěsćenju politbarometra ZDF z runje 36 procentami najšpatniši wuslědk woprašowanjow minjeneju lět na wědomje brać. Swobodni wolerjo móža so po aferje lětaka wokoło swojeho předsyda Huberta Aiwangera dla na rekordne 16 procentow hłosow nadźijeć. Zeleni maja tohorunja 16 procentow, AfD dwanaće a SPD dźewjeć procentow. FDP njeby ze štyrjomi procentami wjace w sejmje była.
Baerbock nochce lisćinu rozšěrić
Berlin (dpa/SN). Wonkowna ministerka Annalena Baerbock wotpokazuje žadanja, lisćinu tak mjenowanych wěstych krajow pochada rozšěrić, zo móhli migrantow spěšnišo zaso wotsunyć. „Z nutřkopolitiskich přičin wonkopolitisce z trawusyčakom postupować, mam za zwažliwe“, rjekny politikarka Zelenych nowinarjam. Přiwšěm wona wita, zo zapisaja Georgisku a Moldawsku na lisćinu wěstych krajow. Wobaj krajej stej po puću do EU a dodźeržitej měritka demokratije a čłowjeskich prawow, wona rjekny.
Předsyda CDU Friedrich Merz bě sej minjeny kónc tydźenja žadał, kraje kaž Tunezisku, Algerisku a Marokko jako wěste kraje zastopnjować. Hladajo na přiběrace ličby migrantow a na problemy komunow njemóže nichtó rozumić, zo ludźo z tutych krajow w Němskej wo politiski azyl proša, bě Merz rjekł.
Sakska dyrbi minus wurunać
Tepjenski zakoń wobzamknjeny
Berlin (dpa/SN). Zwjazkowy sejm je dźensa tak mjenowany tepjenski zakoń wobzamknył. Wjetšina amploweje koalicije hłosowaše za zakoń, z kotrymž chce knježerstwo tepjenje přichodnje klimje přichileniše sčinić. W tym zwisku chcedźa wolijowe a płunowe tepjenja krok po kroku wotstronić a z nowymi nješkódnymi tepjenjemi narunać. Žro zakonja je plan, zo ma kóžde nowe zatwarjene tepjenje w přichodźe 65 procentow swojeje potrjeby z wobnowjomnych energijow brać. Płaćić ma zakoń wot spočatka 2024 najprjedy raz jenož za nowotwarske kónčiny. Za wobstejace twarjenja předwidźi zakoń komunalne ćopłotne planowanje. Na tutym zakładźe maja wobsedźerjo domow samo rozsudźić, hač so wobstejacej tepjenskej syći přizamknu abo sej klimje přichilene tepjenje zatwarja.
Opozicija w zwjazkowym sejmje bě ze swojim předewzaćom zwrěšćiła, rozsud wo zakonju přestorčić. Wosebje unija CDU/CSU bě sej wjace časa za wuradźowanje žadała. Po jeje měnjenju zakoń twarske kóšty a podruže dale podróša.
To a tamne (08.09.23)
Nimale štyri metry dołheho pytonoweho hada su policisća w jendźelskim měsće West Bromwich popadnyli. Wobydlerjo běchu zastojnikow w połnocy informowali, zo wije so had po dróhach města. Dokelž njemóžachu fachowcow za to přisłušneje zwěrjata škitaceje organizacije docpěć, wjacori „zmužići zastojnicy“ zaskočichu, w zdźělence rěka. Woni tyknychu hada do policajskeho awta a dowjezechu zwěrjo ke skótnemu lěkarjej. Komu zwěrjo słuša, hišće njewědźa. Policija města wabi powołanski dorost nětko ze „wšědnje nowymi wužadanjemi“.
Cyły skakanski hrodźik pokradnyli su njeznaći we wólnočasnym parku w vogtlandskim Pöhlu. Nimo toho paduši spytachu, so do předawanskeje budki zadobyć. Hódnota hrodźika z kompresorom a milinowym kablom wučinja 15 000 eurow, wěcna škoda tysac eurow.
CSU hłosy wolerjow přisadźiła
Augsburg (dpa/SN). Bayerska CSU je po informacijach instituta Civey w nahladnosći wolerjow dwaj procentaj přisadźiła. Strona ministerskeho prezidenta Markusa Södera přińdźe w zwisku z aferu wokoło Huberta Aiwangera na 36 procentow. Swobodni wolerjo zastupowaceho ministerskeho prezidenta Huberta Aiwangera maja dobry měsac do wólbow krajneho sejma stabilne dwanaće procentow. AfD polěpšuje so wo štyri dypki na 17 procentow. Dźensa chcyše so krajny sejm z Aiwangerom zaběrać.
USA sćelu uranowu municiju
Kijew (dpa/SN). USA přewostaja Ukrainje w boju přećiwo ruskemu nadpadej dalšu wojersku pomoc. Po informacijach zakitowanskeho ministerstwa ma pomocny paket wobjim 163 milionow eurow. Pósłać chcedźa Ukrainje rakety za powětrowy škit, municiju za mjetaki raketow a granaty za artileriju. Prěni króć sćelu USA tež tankowe granaty z uranom. Te su twjerdše hač woclowe granaty a maja wjetšu móc, cile přerazyć. Wo jich zasadźenju kontrowersnje diskutuja.
Mortwi na torhošću
Njewjedra a sylne zliwki su w srjedźnej Grjekskej zapławjenja ...
Landsberg: Pakt za Němsku ničo noweho
Berlin (dpa/SN). Zwjazk městow a gmejnow Němskeje paruje we wot zwjazkoweho kanclera Olafa Scholza (SPD) namjetowanym „Pakće za Němsku“ na dobro modernizowanja kraja nowe ideje. Wšitko, štož je Scholz rjekł, „by kóždy z nas podpisał. Dyrbimy pak sprawni być: To je stare wino w nowych sudach“, rjekny hłowny jednaćel Gerd Landsberg dźensa rozhłosownikam. Zwjazk městow a gmejnow bě sej hižo 2020 zakoń za spěšniše zwoprawdźenje planowanych inwesticijow žadał. „Problemy su poprawom wšě znate. Prašenje je, hač mamy w Němskej wolu, tole činić. To pak njejsym sej tak wěsty“, Landsberg rjekny. W Němskej knježi bohužel stara zasada: „Wina je stajnje tón druhi.“
Poćahujo so na sportowe zranjenje zwjazkoweho kanclera Olafa Scholza a na toho wóčnu klapu Landsberg rjekny: „Zwjazkowy kancler je tuchwilu tajke něšto kaž pirat, kiž namołwja, łódźe běrokratije nadpadnyć. Problem pak je: Dźěl jeho mustwa sedźi na tutych łódźach.“
Etaty ministerstwow na blidźe
Berlin (dpa/SN). Zwjazkowy sejm w Berlinje je dźensa z wuradźowanjemi wo naćisku etata 2024 pokročował. Na spočatku steješe etat ministerstwa za hospodarstwo a škit klimy. Nawoda ressorta Robert Habeck (Zeleni) pokaza na słabu konjunkturu w Němskej a na w mjezynarodnym přirunanju wysoke płaćizny energije. Habeck namjetuje nachwilnje wot stata podpěrowanu płaćiznu miliny za industriju, štož tež SPD a dźěłarnistwa witaja. Nimo toho wuradźowachu dźensa w zwjazkowym sejmje wo etatowych planach strowotniskeho, justicneho, nutřkowneho a ratarskeho ministerstwa kaž tež kubłanskeho ressorta.
Wuradźowanja wo financnych planach jednotliwych ministerstwow chcedźa jutře zakónčić. Zwjazkowy minister za financy Christian Lindner (FDP) bě předwčerawšim, wutoru, naćisk zwjazkoweho etata předpołožił. Po tym chce Zwjazk klětu 445,7 miliardow eurow wudać, 30 miliardow mjenje hač loni. Wobjim nowych kreditow chcedźa na 16,6 miliardow eurow wobmjezować.
Industrijna politika centralna
W Brüsselu wuradźuja ministerscy prezidenća tuchwilu z EU
Brüssel (dpa/SN). Dźensa chcedźa ministerscy prezidenća a prezidentki němskich zwjazkowych krajow swoje wuradźowanja z Europskej uniju dale wjesć. Mjez druhim steja zesylnjenje industrije, ale tež rozdźělenje ćěkancow a wobchad z wjelkom na agendźe politikarkow a politikarjow. Za to chcedźa so mjez druhim ze zamołwitymi EU za klimu, migraciju, energiju a wobswět zetkać. Po tym chcedźa woni tak mjenowane „Brüsselske rozjasnjenje krajow“ předstajić.
W srjedźišću rozmołwow steji starosć wo kmanosć němskeho a europskeho hospodarstwa w mjezynarodnym wubědźowanju dale wobstać. „Europa je jeničce tak sylna kaž jeje regiony“, wuzběhowaše prezidentka komisije EU Ursula von der Leyen (CDU), na wčerawšim zahajenju rozmołwow. Tohodla je Europa tež jenož tak sylna kaž zwjazkowe kraje a jich hospodarstwo.
