Koalicija bjez wólbneho dobyćerja?
Berlin (dpa/SN). Po wospjetnych wólbach w Berlinje tenděruje krajne předsydstwo SPD po informacijach předsydki Franziski Giffey skerje k pokročowanju koalicije SPD, Zelenych a Lěwicy. „Přiwšěm pak bjerjemy wězo tež wólbneho dobyćerja CDU za chutneho, kotryž jasnje před nami leži“, podšmórny Giffey wčera wječor po posedźenju čłonow předsydstwa w centrali SPD w Berlinje.
SPD je so na to dorozumiła, zo zahaji sonděrowanske rozmołwy z CDU a swojimi tuchwilnymi koaliciskimi partnerami. Giffey a jeje ko-šef Raed Saleh staj wot krajneho předsydstwa mandat dóstałoj, rozmołwy wjesć. Wyša měšćanostka stolicy Němskeje je drje předsydstwu poskićiła, zo móhł něchtó druhi na jeje městno stupić, wšako je wuslědk wólbow njespokojacy. W krajnym předsydstwje su wčera wuslědk wuhódnoćili. Tak běchu sej wšitcy přezjedni, zo je stabilne krajne předsydstwo bjez změny trěbne.
Tole nihdy njezabudu: „Drježdźany so pala!“
Chrysta Meškankowa dopomina so na nóc před 78 lětami
Přez bombardowanje dnja 13. februara 1945 – běše to póstniska wutora – w času wot 22.13 hodźin do 22.28 hodźin, potajkim w běhu jenož pjatnaće mjeńšin, buchu tři štwórćiny staroměšćanskeho dźěla Drježdźan zničene. W naslědnych štyrceći hodźinach sćěhowachu hišće tři dalše nadpady na něhdy pyšnu barokowu stolicu Sakskeje.
My Rječkecy bydlachmy tehdy na Starej šuli w Róžeńće a ja chodźach do prěnjeho lětnika. Wěm so hišće jara derje dopomnić, kak rěkaše: „Drježdźany so pala!“ Z wokna w hornim poschodźe, na zapad hladajo, widźachmy nazdala, nad ćmowinu Pěskečanskeho lěsa, wulke čerwjeno-žołte płomjenja do njebja sapać. Tutón wobraz nihdy njezabudu! A wěm tež hišće, zo praji moja starša sotra Angela zdychujo: „Nětko je tež tón špic mortwy.“
Čehodla běše jej tuta mysl přišła?
Tesla: Zwadadla sćežorow
Grünheide/Podstupim (dpa/SN). W rozkorje z njedowolenymi twarskimi dźěłami na ležownosći předewzaća Tesla w Grünheide prócuje so braniborski wobswětowy minister Axel Vogel (Zeleni) wo termin ze zwjazkami, zarjadami a twornju. „Termin smy za spočatk měrca namjetowali“, zdźěli minjeny pjatk rěčnik ministerstwa. „Rozmołwa ma tomu dopomhać, zo so zakładne dźěło polěpši.“
Tesla je po informacijach wokrjesa Wódra-Sprjewja na parkowanišću wjac hač sto sćežorow do zemje twarić dało. Tak chcychu třěchu ze solarnymi modulemi nad parkowanišćom připrawić. Twarske dźěła su mjeztym zastajene, dokelž njeje dowolnosć předležała, rěka ze stron wokrjesa. „Smy zludani. Zamołwići wokrjesa so nětko nadźijeja, zo Tesla swoje interne wotběhi pruwuje, tak zo hižo k njedostatkam njedóńdźe“, rěčnik wokrjesa Mario Behnke zwurazni. Dotalne dźěła kołowokoło třěchi na parkowanišću wokrjes nětko přepruwuje. Hač su so dźěła na dnownu wodu wuskutkowali, jasne njeje. „Tuchwilu z toho njewuchadźamy“, Behnke rozjasni.
Dojednanje trěbne
Jasny rozsud
To a tamne (14.02.23)
Z rezidency budźe muzej
Vatikan (B/SN). Bamžowsku rezidencu blisko Roma Castel Gandolfo wužiwachu wot 17. lětstotka jako lěćnu rezidencu. Nětko bamž Franciskus postaji, zo ma z 55 hektarow wobstejaceje ležownosće rezidency muzej jako centrum za ekologiske kubłanje a ratarstwo z nowym pomjenowanjom „Borgo Laudato Si“ nastać. Tamniše zahrody a domy budu hišće lětsa přetworjene.
Rozmołwy z muslimami
Rom (B/SN). Rjadnik a poradźowar bamža we Vatikanje Markus Solo, zaběracy so hłownje z islamom, je zwěsćił, zo maja křesćenjo a muslimojo wjele zhromadnosćow, zdobom pak tež wulke rozdźěle při interpretaciji čłowjeskich prawow a w zwisku z dialogom z fundamentalistami a radikalnymi. Wobě stronje wobžarujetej, zo so nabožina ze statneje strony dale a bóle jako priwatna naležnosć instrumentalizuje.
Ignoruje wučby cyrkwje
Wólby w Berlinje bjez panow – wid Serbow w stolicy
Berlinčenjo su wčera swoje wólby krajneho parlamenta wospjetować dyrbjeli, dokelž běše tež zwjazkowe wustawowe sudnistwo wólby lěta 2021 wšelakich „panow“ dla jako njepłaćiwe posudźowało.
Berlin (SN/MiP). Franzisku Giffey wuslědk wólbow zawěsće zwjeselił njeje: Z 28 procentami je Berlinska CDU z načolnym kandidatom Kaiom Wegnerom jasny wólbny dobyćer – po 20 lětach to najlěpši wuslědk jeho strony. Porno tomu je SPD z 18,4 procentami najhubjeńši wuslědk po 1945 w Berlinje docpěła. CDU běše w zańdźenych tydźenjach jara polarizowacy wólbny bój wjedła. Po „silwesterskich podawkach“ je wona z temu „zjawna wěstota a porjadk“ wočiwidnje starosće mnoho Berlinčanow pomjenowała. Konkretne wotmołwy pak žane podała njebě. Načolnej kandidatce Zelenych, Bettinje Jarasch, je so poradźiło, z 18,4 procentami wólbny wuslědk poslednich wólbow wospjetować. Tež Lěwica je z něhdźe 12 procentami wuslědk stabilny niwow dźeržała. FDP njeje 5-procentowsku wólbnu mjezu překročiła a je z tym won z parlamenta. AfD je so poradźiło, z 9 procentami poměrnje wjele wolerjow za sebje mobilizować.
Alojs Mikławšk młodu naslědnicu namjetuje
Wudwor (SN/mb). Alojs Mikławšk, zapósłanc frakcije CDU w Sakskim krajnym sejmje, njebudźe při klětušich wólbach hižo kandidować. To je 64lětny serbski zapósłanc pjatk na nowinarskej konferency wozjewił. Mikławšk běše pjatnaće lět sobudźěłaćer Georga Milbradta, tehdomnišeho financneho ministra a ministerskeho prezidenta (2002–2008) Sakskeje, doniž njebu 2009 prěni raz direktnje do sejma swobodneho stata woleny. We wólbnym wokrjesu Budyšin 2 (hač do 2014 Kamjenc 1) móžeše so 2019 z 39,8 procentami jasnje před kandidatom AfD (30,4 procenty) přesadźić. Za swoje naslědnistwo ma wón, takrjec po modelu lěta 2009, hižo namjet čłonam CDU, kotřiž budu wo tym na nominowanskej konferency rozsudźeć: swoju sobudźěłaćerku Elaine Jentsch. Tón wólbny wokrjes je takrjec najbóle serbski po cyłej Sakskej, wšako do njeho gmejny zarjadniskeho zwjazka „Při Klóšterskej wodźe“ słušeja.
Recesija drje žana njebudźe
Brüssel (dpa/SN). Hospodarstwo w Europje budźe so lětsa po ličbach prognozy komisije EU lěpje wuwić hač wočakowane. Brüsselski zarjad wočakuje rozrost wo 0,8 procentow a za eurostaty rozrost wot 0,9 procentow, z dźensa wozjewjeneho trochowanja wuchadźa. W EU a w europasmje tuž žana recesija njebudźe. Přičiny wuwića su derje pjelnjene składźišća płuna, snadniša přetrjeba a wjace dodawarjow płuna. Nimo toho je połoženje na dźěłowych wikach jara dobre.
Konflikt so dale přiwótřa
Tel Aviv (dpa/SN). Po raketowym nadpadźe z Gazaskeho pasma je Israel w nocy na dźensa po swójskich podaćach na cil w Palestinskej kónčinje třěliła. Tak su podzemski kompleks nadpadnyli, w kotrymž w Gazaskim pasmje knježaca islamistiska organizacija Hamas surowizny za zhotowjenje raketow składowaše, zdźěli israelske wójsko. Palestinjenjo w Gazaskim pasmje běchu hižo zawčerawšim wječor raketu na israelsku pomjeznu kónčinu wottřělili.
Bio je dźeń a wažniše
