Za dypkowne roznošowanje
To a tamne (31.01.23)
Při Mnichowskim lětanišću z wačoka pućowaceho wuswobodźeny běły aligator bydli mjeztym w Sewjerorynsko-Westfalskim zwěrjencu. Kaž stacija za reptilije w Mnichowje wčera zdźěli, je zwěrjo srjedź januara do noweho domicila w Rheinbergu přećahnyło. Mała Ophelia je so tam derje zažiwiła. Cłownicy su běłeho aligatora w septembru při přepytowanju kófrow we wačoku pasažěra namakali. Zwěrjo bě dospołnje do folije zawite.
Wopušćene wosoby móža k dnjej Walentina škabry po swojim něhdyšim žiwjenskim partneru pomjenować. K tomu je zwěrjenc w Texasu namołwjał. Škabry z mjenom chcedźa potom na zwěrjata picować. Ludźo po cyłym swěće móža so na akciji wobdźělić.
Poslednja kniha wušła
Rom (B/SN). Tři njedźele po smjerći bamža Benedikta XVI. je jeho kniha „Was ist das Christentum?“ spočatnje w italskej rěči wušła. W 16 přinoškach, poslednje su hakle 2022 spisane, wón wot stareho testamenta hač k dźensnišej formje Božich mšow wótrje argumentuje, Martina Luthera atakuje a poruča dialog z protestantami a muslimami. Kontrowersow njeje so bojał.
K jednoće namołwjał
Vatikan (B/SN). Na njedźeli słowa Božeho je bamž Franciskus před „njetrjebawšimi debatami“ warnował, namołwjejo sto přitomnych biskopow a kardinalow katolskeje cyrkwje město toho k jednoće, zo bychu so na wozjewjenje Božeje lubosće koncentrowali. Swjaty wótc podšmórny, zo je Jězus „hranicy rozpušćił“, a rjekny: „Boža miłosć je za wšěch a nic jeno za prawomyslnych.“
Zastojnske powyšenje
Njemóža deklaraciju wotedać
Drježdźany (dpa/SN). Sakska njebudźe jutře swoju deklaraciju za ležownostny dawk swójskich imobilijow wotedać móc. Tež statny zawod Sachsenforst tole njezdokonja. Hač do jutřišeho maja so podłožki financnym zarjadam wotedać. Krajny financny minister Hartmut Vorjohann (CDU) je wuzběhnył, zo njebudźe so čas podlěšić. Zakład za noworjadowanje ležownostneho dawka bě wusud Zwjazkoweho wustawoweho sudnistwa. Nowy ležownostny dawk maja wobsedźerjo imobilijow a ležownosćow potom wot 1. januara 2025 płaćić.
Diskusiju Scholz kritizuje
Santiago/Kijew (dpa/SN). Zwjazkowy kancler Olaf Scholz (SPD) je diskusiju wo dodawanju wojerskich lětadłow do Ukrainy kritizował. W běhu wopyta w Chile wón wuzběhny, zo dyrbi so debata serioznje wjesć. Dale wón měni, zo njeměli so kraje nastupajo pomoc za Ukrainu mjez sobu wubědźować. Šefina SPD Saskia Esken njeje dodawanje wuraznje wuzamknyła. „Rozsudnje dźe wo to, zo so Němska a NATO na wójnje njewobdźělitej.“
Solidarny popłatk wostanje
Najebać teroristiske nadpady su w Israelu znowa dźesaćitysacy ...
Dźěłarnistwo widźi potencial
Žołma nimo
Drježdźany (dpa/SN). W lětušej zymje je w Sakskej dotal 106 wosobow w zwisku z infekciju gripy zemrěło. Kaž z minjeny pjatk wozjewjeneje rozprawy wuchadźa, jedna so wo 52 muži a 54 žonow w starobje mjez 34 do 97 lět. Ličba infekcijow poda krajna přepytowanska słužba (LUA) cyłkownje z 28 968. Z wjac hač štwórćinu padow (27 procentow) je starobna skupina mjez 25 do 49 najbóle potrjechena.
Mjeztym wuchadźa přepytowanska słužba z toho, zo je předewšěm w třećim tydźenju januara ličba infekcijow jasnje přiběrała. Niwow pak njeje dawno hišće tak wysoki kaž w časach do korony. Po informacijach LUA, kotraž złožuje so na Roberta Kochowy institut, je lětuša žołma infekcijow gripy zakónčena. Dale pak so dalše wirusowe chorosće mjez ludźimi rozpřestrěwaja.
Historiske wuprajenja cyrkwje
Přeswědčeny Europčan dobył
Češa su Petra Pavela z 58,3 procentami jasnje za prezidenta wolili
Praha/Drježdźany (dpa/SN). Čěska ma noweho prezidenta! We rozsudnych wólbach je so 61lětny něhdyši NATO-general Petr Pavel w rozsudnych wólbach njewočakowanje jasnje přećiwo populistiskemu něhdyšemu šefej knježerstwa Andrejej Babišej přesadźił. Po wuličenju wšitkich wólbnych wokrjesow docpě Pavel 58,3 procentow hłosow – tak zdźěli čěski statistiski zarjad CSU w Praze. Porno tomu hłosowaše z 41,7 procentami jasnje mjenje Čechow za miliardara Babiša. Wólbne wobdźělenje běše ze 70 procentami wot zawjedźenja direktnych prezidentskich wólbow před dźesać lětami dotal najwyši wuslědk.
Pavel, w swojim wólbnym boju za „měr a porjad“ wabjo, běše wot 2015 do 2018 předsyda wojerskeho wuběrka NATO. Zdobom běše wón z tym prěni NATO-general, kiž pochadźeše z něhdyšeho stata wuchodneho bloka. Swojim wyskacym přiwisnikam wón praji: „W tutych wólbach su hódnoty dobyli – hódnoty kaž wěrnosć, dostojnosć, respekt a ponižnosć.“ Přeswědčeny Europčan Petr Pavel budźe 9. měrca naslědnistwo prezidenta Miloša Zemana (78) nastupić.
Awtonomnje jězdźić w stolicy
Drježdźany (dpa/SN). W nowym testowym centrumje za jězdźidła chce Drježdźanska Techniska uniwersita w přichodźe wěstu a awtomatizowanu mobilitu přepytować. Něhdźe 37 milinow eurow tam inwestuja, zdźěli minjeny pjatk sakske financne ministerstwo. Cyłkownje 33 milionow eurow je z Europskeho fondsa za regionalne wuwiće, dalše štyri miliony eurow chce swobodny stat inwestować. Testowy centrum přisłuša Drježdźanskemu institutej za awtomobilnu techniku.
Na stejnišću chcedźa fachowcy předewšěm nowu techniku za jězdźidła a ćěrjenje awtow přepytować. Tež nabiwanske systemy a awtomatizowanemu jězdźenju chcedźa so potom wěnować.
„Přetwarjenej a ponowjenej hale z najmodernišimi wuměnjenjemi matej zakład tworić, zo móhli tu wuspěšnje tež na dobro Europy slědźić“, měni minjeny pjatk sakski financy minister Hartmut Vorjohann (CDU). Nawodnica Drježdźanskeje Techniskeje uniwersity Ursula M. Staudinger wjeseli so, zo móže jónkrótne slědźenske stejnišćo w sakskej stolicy nastać.
