Budar wuči Domowinu
Serbski sejm w němskim sejmje
Njebjelčicy/Berlin (SN). Zastupjerjo Serbskeho sejma su so předwčerawšim w Berlinje z braniborskim zapósłancom zwjazkoweho sejma Knutom Abrahamom (CDU) zetkali, kotryž je zdobom zastupowacy čłon parlamentariskeje přirady Załožby za serbski lud.
Hromadźe su temy kaž medialny pilotowy projekt za cyłu Europu z hranicy překročacej syću za młodych ludźi AKTIS, kotryž ma so 2024 zahajić, w Njebjelčicach iniciěrowany šulski projekt IANUA kaž tež w kubłanskim wobłuku zasydleny němsko-čěski-pólski uniwersitny projekt ETULIS rozjimali. Róle hraještej dale „nadhódnota serbskeje rěče a přez lětdźesatki zrosćene sebjewědomje serbskich wobydlerjow“. Na wobě bě wjelelětny wjesnjanosta „wnučkakmaneje gmejny“ Njebjelčicy Tomaš Čornak skedźbnił, kaž w zdźělence Serbskeho sejma rěka.
Runje tak su so Tomaš Čornak, Harald Baumann-Hasske, dr. Měrćin Wałda, Hanzo Wylem-Kell a David Chmelik, prezident Slavonic Europe, ze zapósłancom wo dialogu z Domowinu wo změnje strukturow kaž turistisko-hospodarske prašenja nastupajo wuměnili.
To a tamne (18.01.23)
Swojeje zhubjeneje móšnje dla bu 21lětny wot namakarja tuteje wudrěwany. Wudrěwar žadaše sej přez telefon 200 eurow, zo by młodemu mužej móšeń z wažnymi dokumentami zaso wróćił, kaž zwjazkowa policija wčera zdźěli. Młody muž pak policiju zašaltowa, kotraž so při přepodaću přidruži a muža lepi. Muž dyrbi so wudrěwanja a překřiwjenja (Unterschlagung) dla zamołwić.
Zo budźe Adidas w přichodźe na dźěłowe prawa dźiwać a zo přewza bywša tekstilna sobudźěłaćerka z Kambodźa ko-jednaćelstwo zawoda, běchu fingěrowane wozjewjenja protestneje akcije New-Yorkskeje guerillaskupiny The Yes Men póndźelu na Berlinskej fashion week. Tući wumjetuja Adidas, zo njejsu sobudźěłaćerjo kaž na přikład w Kambodźe wčasu koronapandemiji połnu mzdu dóstali. Adidas wumjetowanja wotpokaza.
Pistorius naslědnik Lambrecht
Berlin/Ulm (dpa/SN). Zakitowanska ministerka Christina Lambrecht je wčera kanclera Olafa Scholza (wobaj SPD) wo jeje pušćenje ze zastojnstwa prosyła. Z tym reaguje wona na hižo měsacy dołho pospochi zwuraznjenu kritiku na jeje wosobje, wosebje ze stron opozicije. Jeje naslědnik budźe Boris Pistorius (SPD), nižosakski nutřkowny minister – tak powěsćernja dpa zdźěli, złožujo so na informacije z kruhow knježerstwa. Zwjazkowy kancler Olaf Scholz chce naslědnistwo dźensa oficialnje wozjewić.
Wuznawataj swoju lubosć
Berlin (dpa/SN). Zapósłancaj unije Wolfgang Stefinger (CSU) a Sepp Müller (CDU) staj prěni homoseksualny por w zwjazkowym sejmje. Wobaj staj swoju mjezsobnu lubosć wčera wječor runočasnje pod #loveislove na Twitteru publikowałoj a pisaštaj: „11 procentow wšěch porikow so na dźěłowym městnje zeznaje a zalubuje. Druhdy so kolegojo spřećela. Z naju přećelstwa je naju lubosć wurostła. Smój zbožownaj.“
Ličba wobydlerstwa woteběra
Regionalny ćah bliži so železniskemu přechodej mjez ...
Saksojo su w trendźe
Šwikawa/Berlin (dpa/SN). 33 předewzaćow z ratarskeho, zežiwjenskeho kaž tež turistiskeho sektora zastupuje Saksku na lětušim Mjezynarodnym zelenym tydźenju (IGW) w Berlinje. To je pjeć wobdźělnikow mjenje hač na poslednich wikach do pandemije w lěće 2020. Přičiny za to su hospodarske ćeže wysokich energijowych płaćiznow dla, skedźbliwosć po koronowej přestawce a dołha přizjewjenska doba.
Sakski ratarski minister Wolfram Günther (Zeleni) rjekny na nowinarskej konferency wčera w Šwikawje, zo je runje w času krizow wažne, ratarstwo a zežiwjenske hospodarstwo hromadźe z turistiskimi iniciatiwami šěrokemu publikumej předstajić. „Z regionalnymi produktami smy dospołnje w trendźe,“ wón wudospołni. Jědnaće sakskich předewzaćow ma bio-certifikaciju, to rěka produkuje cyle abo podźělnje w bio-kwaliće. Nimo dołholětnych wobdźělnikow pojědźe lětsa jědnaće wustajerjow prěni raz na Zeleny tydźeń do Berlina, na přikład Drježdźanska whisky-manufaktura, Budyske rěznistwo Meister‘s kaž tež Łužiske agrarne drustwo Jězor z Niskeje, kotrež předstaja wudźěłki z lěwanćika.
Čas dialoga a rozsuda
Zelenskyj podpěru chwali
Lützerath: Symbol škita klimy
Po měsacy trajacych demonstracijach a diskusijach je wjes „zrumowana“
Erkelenz (dpa/SN). Měsacy dołho su klimowi aktiwisća Lützerath wobsadźili. Woni zasadźeja so za kónc wudobywanja brunicy jako přinošk k dodźerženju hranicy 1,5-stopnjoweho sćoplenja zemje. Energijowe předewzaće RWE chce pak w Lützeraće brunicu wudobywać. Koncern wozjewi spočatk oktobra 2022, zo je z wobswětowymaj ministerstwomaj Zwjazka a krajom Porynsko-Westfalskej dojednał, zmilinjenje brunicy hižo 2030 město 2038 skónčić. Zwjazkowy hospodarski minister Robert Habeck (Zeleni) rěčeše wo dobrym dnju za škit klimy. Za wobswětoškitnu organizaciju Greenpeace pak ma planowany kónc wudobywanja wuhla hórki přisłód, dokelž ma so wudobywanje wuhla při jamje Garzweiler přechodnje samo rozšěrić, tak rěka. Tež organizacija za škit klimy Fridays for Future plany kritizuje. „Zelene hospodarske ministerstwo je za zawrjenymi durjemi z fosilnym koncernom RWE mazany deal dojednało – mjeztym, zo klimowa kriza po cyłym swěće hižo lěta dołho čłowječe žiwjenja wohrožuje a zniča“, tak Linda Kastrup.
Syć dale wutwarja
Drježdźany (dpa/SN). Wysoke płaćizny miliny njebudu po posudku sakskeho hospodarskeho ministerstwa wutwar syće stołpow za nabiwanje elektrojězdźidłow w Sakskej wobwliwować, je powěsćernja dpa zhoniła. Po stawje 1. nowembra 2022 su w Sakskej 2 354 zjawnje přistupnych normalnych stacijow nabiwanja a 540 stacijow za spěšne nabiwanje.
