Eisenhüttenstadt (dpa/SN). Braniborska hotuje so ze stami městnow w objektach za prěnju registraciju na to, ćěkancow z Ukrainy krótkodobnje zaměstnić. Kónc tydźenja mějachu tam kapacity za 800 ludźi přihotowane, zdźěli rěčnik nutřkowneho ministerstwa Martin Burmeister powěsćerni dpa. Městna su we ­hłownym objekće za prěnje zaměstnjenje w Eisenhüttenstadće a we won­kownej wotnožce w Frankfurće nad Wódru k dispoziciji. Dyrbjała-li potrjeba ­přiběrać, hodźa so kapacity krótkodobnje rozšěrić. To je móžno ze stanami, kontejnerami, sportowej halu w Eisenhüttenstadće a z wotnajećom přidatnych ležownosćow.

Braniborske nutřkowne ministerstwo pak z toho wuchadźa, zo dyrbitej Pólska a Słowakska hłownu ćežu nawala ćěkancow zmištrować. Nimo toho móže być, zo ćěkancy w Němskej najprjedy raz pola přiwuznych bydla. Ukrainscy staćenjo smědźa so w Schengenskim rumje tři měsacy bjez wizuma swobodnje hibać. Nutřkowny minister Michael Stübgen (CDU) liči ze 400 000 ćěkancami w Němskej, 11 000 z nich w Braniborskej.

Na powjazu 30 metrow wysoko je němski artist Alexander Schulz před palastom Red Fort w indiskej stolicy New Delhiju běžał. Bě to zarjadowanje składnostnje 75. róčnicy njewotwisnosće Indiskeje. Schulz steji ze swojimi rekordami hižo w Guinnessowej knize rekordow. Před lětomaj bě wón nad aktiwnym wulkanom w južnym Pacifiku kročił. Lěto na to přeprěči Schulz na 1,7 kilometrow dołhim powjazu hłubinu – a to 800 metrow wysoko ze zawjazanymaj wočomaj.

Kozoła na zadnjej ławce swojeho awta měještaj policistaj w Durinskej sedźo. Do toho běchu při zasadźenju objekt přepytali. Jako swědk bě tež wobsedźer kozoła na městnje. Tón zastojnikow hnydom warnowaše, zo „kozoł rady z awtom jědźe“. A hižo skoči tón do woza, zo by sobu jěł. Přeće pak jemu policistaj nje­spjelni­štaj, kozoł dyrbješe awto wopušćić.

Berlin (dpa/SN). Zwjazkowy minister za strowotnistwo Karl Lauterbach (SPD) so tomu spjećuje, po 20. měrcu najwjetši dźěl wobmjezowanjow koronawirusa dla zběhnyć. „Freedom Day“ pola wirusa žadyn zaćišć njezawostaji, rjekny politikar SPD Stuttgartskim nowinarjam. „Pandemiju njemóžeš ze swjedźenjom skónčić.“ Tež po 20. měrcu trjebaja zwjazkowe kraje wjace srědkow za bój přećiwo pandemiji. Testy a nahubniki njedosahaja, zo móhli na přichodne žołmy reagować.

Žadyn rusko-chinski zwjazk

Berlin (dpa/SN). Politikar Lěwicy Gregor Gysi warnuje hladajo na nadpad na Ukrainu před móžnym zwjazkom mjez Ruskej a Chinu. Sankcije přećiwo Ruskej a hižo wobstejace přećiwo Chinje móhli krajej k tajkemu zwjazkej nuzować. China je hospodarsce wo wjele sylniša hač Ruska, ta pak je za to wojersce mócniša. „Jeli so krajej woprawdźe zwjazatej, nastanje hoberski faktor mocy, kotryž njemóža demokratije zapada wjace wob­knježić. Zaćah Ruskeje na Ukrainu Gysi jako „złóstniski nadpad“ raznje zasudźa.

Mjenje mortwych na dróhach

Kijew (dpa/SN). Ukrainske jednotki steja po informacijach generalneho staba w ćežkich wojowanjach w Kijewskej měšćanskej kónčinje. W měsće Iwankiw, něhdźe 80 kilometrow sewjerozapadnje ruskeje stolicy, wobaraja so parašutisća „přemóžacej“ ličbje ruskich wojakow, kotřiž su z tankowymi wozami přijěli. Tež na strategisce wažnym lětanišću Hostomel sewjerozapadnje Kijewa dale wojuja, kaž generalny stab zdźěli. Ukrainske jednotki su ruske nadběhi tam dotal wotwobarać móhli. Medije rozprawjeja nimo toho wo wjacorych ruskich nalětach. W Kijewje wujachu znowa sireny. Stacije podzemskeje železnicy słužachu woby­dlerjam města z 2,8 milionami wobydlerjow jako škitne rumnosće. Wobrazy pokazowachu wjacore palace so domy. Pječa je Ukraina ruske lětadło nad městom wottřěliła. Přiwšěm wostanje wojerske połoženje njepřewidne.