Berlin (dpa/SN). Po dalšim njewuspěšnym zetkanju Armina Lascheta a Mar­ku­sa Södera minjenu nóc čakachu dźensa wšitcy wobdźěleni na wukónc ćahańcy wo kanclersku kandidaturu unije. Předsydaj CDU a CSU běštaj so wčera w twarjenju zwjazkoweho sejma w Berlinje zetkałoj a dlěje hač tři hodźiny wuradźowałoj, powěsćernja dla rozprawja. Wo wobsahach rozmołwy nižo znate njeje.

Zetkanje bě dotalny wjeršk zwady unije, kotraž so minjeny tydźeń dale a bóle přiwótřeše. Njedyrbjałoj-li so Laschet a Söder tež dźensa dojednać, dyrbjała to frakciji CDU/ CSU zwjazkoweho sejma rozrisać. Bjezposrědnje do wčerawšeho zetkanja Södera a Lascheta je so Młoda unija (JU) z wjetšinu za Söderom stupiła a tak ćišć na Lascheta dale zesylniła. „Wobaj kandidataj měještaj dosć chwile, rozrisanje namakać. To njeje so stało. Nětko čujemy so nuzowani poziciju zabrać. Smy z wulkej wjetšinu za Markusa Södera“, rjekny předsyda JU Tilman Kuban. Na konferency krajnych šefow JU bě so 14 z 18 předsydow za Södera wuprajiło.

Zwjazkowy sejm na dobro indigenych ludow rozsudźił

Budyšin (SN). Zwjazkowy sejm je na swojim posedźenju minjeny štwórtk „Do­jednanje čo. 169 Mjezynarodneje dźěłoweje organizacije (27. junija 1989) wo indigenych ludach“ ratifikował. Domowina kaž tež Serbski sejm to wuraznje witatej.

Předsyda Domowiny w swojim stejišću pisa: „Kaž wobzamknjeny dokument jasnje formuluje, ma so dotalne wusměrjenje něhdyšich mjezynarodnych normow zběhnyć, měrjace so na asimilaciju domoródnych ludow. Smy so tuž jako třěšny zwjazk serbskeho ludu, kotryž je w Federalistiskej uniji europskich narodnych mjeńšin tež mjezynarodnje zakótwjeny, stajnje za to zasadźeli, zo smědźa wšitke ludy po cyłym swěće swoju rěč a kulturu bjez wobmjezowanja pěstować. To je nam, kaž hižo při podpěrje europskeje ludoweje iniciatiwy Minority Safepack, prašenje solidarity.“

Móžu sej derje předstajić, zo měješe sakska CDU na swojim sobotnym zjězdźe kata­strofu lěta 2017 hišće dosć derje w pomjatku, jako sta so AfD při wólbach zwjazkoweho sejma před CDU z najsylnišej politiskej mocu Sakskeje. Byrnjež so to w sakskim sejmje direktnje njewuskut­kowało, bě škoda wulka. Na kóncu pak ministerski prezident Stanisław Tilich wotstupi. Nowy premier křesćanskich demokratow Michael Kretschmer měješe wjele dźěła. Wšako chcyše tomu zadźěwać, zo so wólbny wuslědk w lěće 2019 při wólbach krajneho sejma wospjetuje. Kaž wěmy, je so to jemu z koaliciju CDU, SPD a Zelenych runje hišće někak poradźiło. Nětko pak so z Berlina čorne mróčele bliža. Njedostojna ćahańca Armina Lascheta a Markusa Södera wo zastojnstwo kanclerskeho kandidata je hižo nětko wjele škody načiniła. Hdyž so w septembrje tež najswěrniši wolerjo wot unije wotwo­broća, móhli sćěhi fatalne być – w Berlinje a Drježdźanach. Marko Wjeńka

Projekt wjesnych kokošow so w porynsko-pfalcskim Bleckhausenje jako wulki wuspěch wopokazuje. Kurjenc z wonkownym arealom je mjeztym zetkawanišćo ludźi a komunikaciski centrum. Zastaranje skotu organizuja w „kokošacych skupinach“. Nimo toho maja městno za sedźenje a přihladowanje. Wjesnjanosta Markus Göbel ma projekt za „absolutne dobyće“. Ideju za wjesne kokoše měješe porik, kotryž bě z Essena na wjes přićahnył. Płoninu je gmejna přewostajiła.

Z kolonu bydlenskich mobilow su sej přiwisnicy campinga sobotu w Berlinje wotewrjenje stanowanišćow žadali. Iniciatiwa „camping z wotstawkom“ zliči wjace hač tysac wobdźělnikow. Wona pokazuje z peticiju na to, zo je camping najwěsćiša a na kontakty najsłabša forma wočerstwjenja za swójby. 44 000 podpismow su zezběrali.