To a tamne (05.05.20)
Zelenina město telewizora: Zhromadnje z dźěćimi w bydlenju kórki a tomaty plahować je w Japanskej w času koronapandemije dźeń a woblubowaniše. Wikowarjo symjenja w stolicy Tokiju maja widźomnje wjace kupcow, kotřiž chcyli w milionowej metropoli z dźěćimi doma w sadźenskich kašćikach zeleninu plahować. Wuwzaćny staw płaći hač do kónca meje, tuž maja hišće trochu chwile.
Po měsacy trajacym čakanju na morju su namórnicy 59lětneho płachtakowarja ze Singapura wuchowali a na kraj dowjezli. Wong Tetchoong bě so spočatk februara na tři lěta trajacy dyrdomdej po oceanu nastajił. Po wudyrjenju koronakrizy pak su wšitke přistawy zawrěli. Na Fidźiskich kupach su muža nětko přiwzali: Do karanteny wón njetrjeba, wšako njeje jeho na morju nichtó natyknyć móhł.
Za „njebjeski dowol“
Drježdźany (B/SN). Na kromje lětušich fachowych dnjow „cyrkwje w turizmje“ w Drježdźanach rozjimowachu zastupjerjo Sakskeje ewangelskeje krajneje cyrkwje, cyrkwje Berlin-Braniborska-šleska Hornja Łužica kaž tež Sewjerneje cyrkwje projekt „Njebjeski dowol w Hornjej Łužicy“. Prózdne farske domy móhli za „njebjeski dowol“ přetwarić. „Hladajo na woteběracu ličbu wosadnych ma so z toho wuchadźeć, zo dźensa prózdne domy tež za 40 lět wobsadźene njebudu,“ rjekny Kerstin Kracht, referentka za cyrkej a turizm a zamołwita za wotewrjenje Božich domow w Sakskej.
Podpěra potrěbnym
Erfurt (B/SN). W dnjowym zetkanišću Carity w Erfurće bjezdomnym a potrěbnym ludźom wšědnje w času wot 10 do 11 hodź. pakćiki z jědźu wudźěleja. „Wostanjemy wosrjedź ludźi w nuzy. Zo bychmy wudawki za žiwidła, napoje a wěcy wšědneje potrjeby kaž tež za hygienowe srědki financować móhli, prosymy wo pjenježnu podpěru“, informuje regionalny nawoda srjedźodurinskeje Carity Michael Wenzel.
Dźakuje so cyrkwjam
Chce mjezu zaso wotewrěć
Praha (dpa/SN). Čěske knježerstwo chce mjezu w juliju zaso wotewrěć. Wotpowědne rozmołwy z Awstriskej a Słowakskej su hižo daloko postupowali, z Pólskej pak su dale komplikowane, rjekny wonkowny minister Tomáš Petříček nowinarjam. „Bych mjezu k Němskej, Awstriskej, Pólskej a Słowakskej rady w juliju wotewrěł.“ Dyrbjało-li so połoženje w boju přećiwo koronapandemiji derje wuwić, móhł kraj mjezu tež hišće prjedy wotewrěć, Petříček připowědźi.
Scholz naprawy zakituje
Berlin (dpa/SN). W diskusiji wo raznym wobmjezowanju zjawneho a hospodarskeho žiwjenja koronapandemije dla skedźbnja wicekancler Olaf Scholz (SPD) na to, zo su druhe europske kraje wjele razniše postajenje wukazali. Němska njeje swoju industriju zawrěła, ludźo smědźachu minjene tydźenje stajnje dom wopušćić, rjekny wón wčera w telewiziji ARD. Najebać to zwjazkowe knježerstwo zhromadnje z přisłušnymi krajnymi knježerstwami „njepřestajnje rozmysluje“, kotre wolóženja móže zamołwić.
FDP: Zmylki analyzować
Schröder: Preč ze sankcijemi
Berlin (dpa/SN). Hladajo na koronakrizu něhdyši zwjazkowy kancler Gerhard Schröder namołwja, poměr k Ruskej zaso polěpšić. „Runje nětko, hdyž koronakrizy dla ćežke hospodarske časy na nas přińdu, dyrbimy wušo hromadźe dźěłać. Tohodla dyrbja bjezzmyslne sankcije preč“, rjekny politikar SPD wčera we wusyłanju Tagesspiegel.
Narěčany na přiswojenje połkupy Krim přez Rusku Schröder rjekny: „Štóž wěri, zo móžeš Rusku ze sankcijemi k něčemu nuzować, tón so myli. Žadyn ruski prezident Krim Ukrainje njewróći.“
Hladajo na róčnicu wuswobodźenja Gerhard Schröder rjekny, zo „njesměmy w padźe Ruskeje na stawizny zabyć. Bě to surowa zaničowanska wójna ze zaměrom, Rusku ze swětoweje politiki wušmórnyć. Tomu dyrbjała němska politika Ruskej napřećo bóle wotpowědować.“ Zo bě Ruska najebać surowu zašłosć zwólniwa, z Němskej dowěrliwje dźěłać, njemóžeš wysoko dosć hódnoćić, něhdyši kancler wuzběhny. „Tomu so sankcije njehodźa.“
Dalše wolóženja w koronakrizy
Sakski wobswětowy minister chce krok po kroku wróćo do normality
Drježdźany (dpa/SN). W Sakskej płaća za frizerow, muzeje, předawarnje meblow wot dźensnišeho nowe prawidła nastupajo koronawirus. „Podamy so z nowymi škitnymi naprawami koronawirusa dla krok po kroku dale do normality, do normality z koronu“, rjekny sakski wobswětowy minister a zastupowacy ministerski prezident Wolfram Günther (Zeleni). Wolóženja, na kotrež bě so sakske krajne knježerstwo minjeny štwórtk dorozumiło, płaća hač do 20. meje. „Po tym dyrbimy systematiske rjadowanja za tych namakać, kotřiž tuchwilu žane dochody nimaja, kreatiwnje dźěłacy, wuměłcy, ale tež hotelownicy a hosćencarjo“, Günther podšmórny.
Industrijna a wikowanska komora w Kamjenicy nima wobzamknjene rjadowanja za dosahace. Wona je přesłapjena, zo njejsu zajimy hotelownikow a hosćencarjow wobkedźbowane. Přenocowanja w hotelach a pensijach bychu při dodźerženju hygieniskich prawidłow bjeze wšeho móžne byli, komora zdźěla.
Za kruty płót
To a tamne (04.05.20)
Kaču swójbu wuchowali su policisća zhromadnje z dalšimi pomocnikami w delnjosakskim Einbecku. Pilatka hrožachu do gullyja padnyć, na čož ludźo policiju informowachu. Pomocnicy tyknychu je do kartona a donjesechu pilatka k bliskej rěčce. Kačka slědowaše z wěstotnym wotstawkom. Zastojnik akciju nimo toho z policajskim awtom zawěsći. Dospołna kača swójba so skónčnje na rěčce zminy.
Pozdatny mortwy je w Lipsku zasadźenje policije zawinował. 75lětna wobydlerka wjaceswójbneho domu bě ju zazwoniła, po tym zo bě nježiwu wosobu na zadnim dworje ležo widźała. Zastojnicy hnydom přijědźechu, wuhladachu pak tam chětro čiłu młodu žonu. Wona zastojnikam rozłoži, zo bě yoga zwučowała, po tym pak hišće trochu na trawniku wotpočnyła. W tym wokomiku drje bě ju 75lětna wuhladała a so stróžiła.
10,1 milion w krótkodźěle
Nürnberg (dpa/SN). Předewzaća Němskeje su koronakrizy dla hač do 26. apryla za 10,1 milion ludźi krótkodźěło přizjewili. Tule rekordnu ličbu je Zwjazkowa agentura za dźěło w Nürnbergu dźensa wozjewiła. Tak su tež najhórše prognozy hospodarskich fachowcow přetrjechene, kotřiž běchu z najwjace sydom milionami ličili. Ličba bjezdźěłnych w Němskej je tónle měsac na 2,644 milionow rozrostła. W Sakskej je mjeztym 520 000 dźěławych w krótkodźěle, kaž dźensa zdźělichu.
Wobmjezowanja drje podlěša
Berlin (dpa/SN). Koronakrizy dla płaćiwe wobmjezowanja socialnych kontaktow drje hač do 10. meje podlěša. Wo tym je šef kanclerskeho zarjada Helge Braun (CDU) přeswědčeny. Rozsudźić chcychu wo tym dźensa w běhu dnja na widejowej konferency kanclerki Angele Merkel (CDU) z ministerskimi prezidentami zwjazkowych krajow. Dotal płaća wobmjezowanja kontaktow hač do 3. meje.
Sakska rozsudźi wo naprawach
Na strukturnu změnu njezabyć
Grodk (SN). Najebać koronapandemiju njeměli na strukturnu změnu we Łužicy zabyć. Na to dojednachu so zastupjerjo Industrijnych a wikowanskich komorow kaž tež čłonojo Łužiskeho kruha, hórniski koncern Łužiska energija a milinarnje a zastupjerjo sakskeho a braniborskeho knježerstwa minjenu póndźelu na zhromadnym wuradźowanju, na kotrež bě zapósłanc zwjazkoweho sejma Klaus-Peter Schulze (CDU) do Grodka přeprosył.
Wobydlerjo Łužicy zhubja dowěru do pozitiwneje strukturneje změny, njebudźe-li skónčnje do kónčiny inwestowane. Zastupjerjo z hospodarstwa žadaja sej spušćomnu a planujomnu zawěsćensku fazu, a to njewotwisnje wot zestawy zwjazkoweho sejma. Nimo toho měli zakoń wo zesylnjenju strukturow nuznje hač do lěćneje přestawki dale wjesć.
„Chcu wšitko činić, zo so zakonske ramikowe a financielne wuměnjenja najebać korona-poćeženja dale wobjednawaja“, přilubi parlamentariska statna sekretarka zwjazkoweho hospodarskeho ministerstwa Elisabeth Winkelmeier-Becker.
To a tamne (30.04.20)
Z pišćelemi na nakładnym awće je znaty organist Cameron Carpenter z USA tele dny w Berlinje po puću. Ze swojim instrumentom chce 39lětny ludźi zwjeselić, kotřiž dyrbja koronawirusa dla doma wostać. Zahajił bě swoju štyri dny trajacu turneju pod hesłom „All you need is Bach“ wčera w měšćanskim dźělu Spandau. Hač do soboty chce wón před 30 hladarnjemi a starownjemi města twórby Bacha přednjesć.
Ze smjerdźacym kokošacym hnojom chce juhošwedske studentske město Lund tomu zadźěwać, zo so dźensa wječor tysacy młodych ludźi na tradicionalnu Wałporu w měšćanskim parku zhromadźa. Korony dla dyrbi swjedźeń lětsa wupadnyć. Hewak bě so tam w tej nocy stajnje hač do 30 000 ludźi zetkało. Tónraz dominuja tam pryskawy hnoja. To pozitiwne: Trawnik budźe za to ćim rjeńši.
