Drježdźany (SN). Runje lětsa je hladajo na koronapandemiju mnohim dawkipłaćerjam wažne, swoju dawkowu zdźělenku tak spěšnje kaž móžno dóstać. „Tójšto wobydlerjow dawkowu deklaraciju prjedy zdźěła, tak zo prawje bórze swoje zarunanja přepokazane dóstanu“, wujasni sakski financny minister Hartmut Vorjohann (CDU). Wobdźěłać deklaracije ma w financnych zarjadach tuž najwjetšu prioritu. „Cyłkownje 68 procentow dawkowych deklaracijow, kotrež su hač do kónca apryla dóšli, su mjeztym hižo wobdźěłane. Wjace hač 198 000 zdźělenkow su sakske financne zarjady hižo wotpósłali“, Vorjohann rozjasni. Wón dźakuje so wšitkim sobudźěłaćerjam zarjadow, kotřiž su w minjenych tydźenjach dobre dźěło wukonjeli a tak financne wuskutki potrjechenych za čas pandemije trochu wolóžili.

Drježdźany (dpa/SN). W Sakskej stajnje zaso za dźěćimi a młodostnymi pytaja. „Mnohe pady pak móžemy w běhu krótkeho časa rozrisać“, wuswětli rěčnik krajneho kriminalneho zarjada (LKA) Tom Bernhardt krótko do dnja zhubjenych dźěći, na kotrež dźensa, 25. meje, spominamy. Po cyłej Němskej a wjacorych dalšich krajach dopomina dźeń na zhubjene njepołnolětne dźěći.

W swobodnym staće bě před tydźenjom 67 dźěći a 102 młodostnej w starobje 14 do 17 lět zhubjenych. Mjez nimi bě tež 77 ćěkancow bjez přewoda. Po informacijach iniciatiwy „Zhubjene dźěći“ so kóžde lěto po cyłej Němskej něhdźe 60 000 njepołnolětnych zhubi. „80 do 90 procentow padow w prěnich hodźinach rozrisaja“, měni čłon předsydstwa iniciatiwy Lars Bruhns. Najwjac z nich je swójskich přičin dla kaž hubjenych znamkow abo rozkory ze staršimi doma ćeknyło. Su pak tež pady, hdyž staršiske dźěle dźěći do wukraja dowjezu, dokelž je swójba w rozkorje. Tajke pak zwjetša tak spěšnje njerozrisaja. Snadna dwucyfrowa ličba padow zhubjenja njepołnolětnych wostawa přiwšěm njerozrisana.

Karl Lauterbach kritizuje planowane zběhnjenje škitnych naprawow

Drježdźany/Berlin (dpa/SN). Po Durinskej chcyła tež Sakska dotalne wobchadźenje z wobmjezowanjemi wšědneho žiwjenja koronawirusa dla zasadnje změnić. „Wostanje-li ličba nowych infekcijow dale na jara snadnym niwowje, planujemy za čas po 6. juniju w nowym wukazu wo škitnych naprawach korony dla zasadnu změnu“, rjekny ministerka za strowotnistwo Petra Köpping (SPD) dźensa w Drježdźanach. „Město toho zo wukazamy razne wobmjezowanja z wuwzaćemi, chcemy generelnje wšitke wobmjezowanja zběhnyć a jenož tam wuwzaća napołožić, hdźež je to hišće trjeba“, ministerka podšmórny. Wjele wot toho wotwisuje, kak zamołwiće ludźo jednaja a sebje samych a druhich škitaja.

Tójšto puntow přibyli su Japanjenjo w časach koronakrizy. To je wuslědk woprašowanja internetneje fitnesoweje firmy „30.f“. Ta bě so 600 žonow a muži w starobje 20 do 49 lět prašała. 42,7 procentow žonow a 30,4 procenty muži při­znachu, zo su doma přibyli, žony přerěznje 2,6 a mužojo 3,3 kilogramy. Čas domjaceje izolacije pak so nachila: Hišće dźensa wočakowachu kónc nuzowych naprawow w stolicy Tokiju.

Wjelka dla wustróžane su sej štyri wosoby wčera rano na třěchu lawby w zjednoćenstwje małozahrodkarjow w Strausbergu pola Berlina wućeknyli, alarmujo policiju wo pozdatnym wjelku. Přichwatani zastojnicy pak móžachu zwěrjo jako „njestrašneho pastyrskeho psa“ identifikować, kotryž bě z bliskeje ležownosće twochnył. Wobsedźer sej jeho krótko na to zaso wotewza.