Jurisća pomhaja
Wojerecy (SN/at). Předźěłany naćisk za statne zrěčenje nastupajo serbske naležnosće w Sakskej a Braniborskej je wuběrk wustawa a prawo eksternej dźěłowej skupinje juristow rozłožił. Wo tym wuběrkownicy na posedźenju Serbskeho sejma minjenu sobotu we Wojerecach informowachu, kaž w nowinskej zdźělence gremija rěka. Jurisća zwěsćichu, zo wotpowěduje naćisk modernym narokam mjeńšinoweje politiki.
Dalše wolóženja w Sakskej
Drježdźany (dpa/SN). Sakska planuje dalše wolóženja w koronakrizy. Wone maja z nowym škitnym wukazom wot 30. junija hač do 17. julija płaćić. To je ministerka za strowotnistwo Petra Köpping (SPD) po wčerawšim posedźenju kabineta připowědźiła. Tak maja swójbne zarjadowanja z hač do sto wobdźělnikami zaso móžne być, dotal su na połsta wobmjezowane. Tuchwilu rozmysluja nastupajo winowatosć, při nakupowanju škit za hubu a nós wužiwać. „Smy pak hišće kedźbliwi“, Köpping zdźěli.
Chinska stolica zdźěla zawrjena
Peking (dpa/SN). Po znowawudyrjenju koronawirusa je połoženje w chinskej stolicy Pekingu napjate. Kaž strowotniske ministerstwo informuje, su w měsće dalšich 31 z wirusom natyknjenych zwěsćili. Tak je ličba natyknjenych w metropoli z 20 milionami wobydlerjow wot minjeneho štwórtka na 137 přiběrała. Jako reakciju na wudyrjenje, kotrež započa so minjeny tydźeń na wulkowikach, su zamołwići dźěle města zawrěli. Tež šule wostanu najprjedy raz zawrjene.
Mortwi pomjezneje zwady dla
Z kolesami demonstrowachu dźensa aktiwisća organizacije Extinction ...
Łužicu na „region přichoda“ wuwić
Budyšin (SN/MkWj). Koronakriza njeje dawno hišće přetrata. Wo tym je Budyski zapósłanc CDU w Sakskim krajnym sejmje Marko Šiman přeswědčeny. Tomu drje hakle budźe, je-li zakładna imunita ludnosće docpěta. Tuž měli wšitcy dale disciplinowani předpisy škita před koronu dodźeržeć. To zwurazni Šiman na wčerawšej nowinarskej rozmołwje w Budyšinje. Politika je wužadana wot krizy potrjechenym předewzaćam pomhać.
Hłowny dźěl rozmołwy pak wěnowaše Marko Šiman strukturnej změnje we Łužicy po skónčenju zmilinjenja brunicy. Hladajo na dźensniše wuradźowanje ministerskich prezidentow zwjazkowych krajow z kanclerku Angelu Merkel (CDU) w tej naležnosći a na bližacy so doskónčny rozsud zwjazkoweho sejma wo wotpowědnym zakonju žada sej Šiman lěpše ramikowe wuměnjenja. Jenož tak budźe móžno 10 000 derje płaćenych dźěłowych městnow w energijowym hospodarstwje narunać. Wón chcył wšitko za to činić, zo by so generacija 20- do 30lětnych, kotřiž su Łužicu wopušćili, zaso nawróćiła.
Prěnje wosobinske zetkanje
Berlin (dpa/SN). Po třoch měsacach widejowych a telefoniskich konferencow je so zwjazkowa kanclerka Angela Merkel (CDU) dźensa prěni króć zaso we wulkim kruhu wosobinsce z ministerskimi prezidentami zwjazkowych krajow w Berlinje zetkała. Na wuradźowanjach w kanclerskim zarjedźe rěčachu wo dalšim postupowanju w koronakrizy a wo wjacorych dalšich temach. Tak su ministerscy prezidenća a kanclerka tež zwoprawdźenje wot wulkeje koalicije wobzamknjeneho konjunkturneho paketa, pospěšeny wu-twar mobilnoškričkoweje syće, planowany wutwar cyłodnjowskeho poskitka na zakładnych šulach a přichodne poćahi k Wulkej Britaniskej po brexiće rozjimali.
Dnja 12. měrca běchu so Angela Merkel a krajni šefojo posledni króć wosobinsce zetkali. Dny po tym běchu šule, pěstowarnje, hosćency, bary a dalše zarjadnišća zawrjene. Zjawne žiwjenje womjelkny. Kanclerka a ministerscy prezidenća wuradźowachu po tym telefonisce a na widejokonferencach wo dalšim postupowanju.
Płaćizny energije reformować
Fachowcy žadaja sej tuńšu milinu a wuhlikowy dioksid podróšić
Berlin (dpa/SN). Wot zwjazkoweho knježerstwa zasadźena fachowa komisija poruča wobšěrnu reformu płaćizny energijow. Zo móhła Němska swoje klimowe zaměry docpěć, dyrbjała popłatki a dawki za milinu šmórnyć. Město toho měła „ambicioněrowanu“ płaćiznu za wustork wuhlikoweho dioksida zawjesć. To je komisija we wobłuku monitoringoweho procesa „Energija přichoda“ w swojim dokumenće namjetowała. Reforma płaćizny energije by tež naprawy za klimje neutralny přetwar industrije podpěrała.
Tak komisija mjez druhim namjetuje popłatk za dalewjedźenje wobnowjomnych energijow (EEG), kotryž kóžda domjacnosć přez zličbowanku miliny płaći, kompletnje šmórnyć. Dawk za milinu měł so na najniši niwow po směrnicach Europskeje unije znižić, fachowcy poručeja. To hodźało so srjedźodobnje w dalokej měrje zaso wurunać, hdyž so płaćizna za tonu wustorkowaneho wuhlikoweho dioksida na 50 eurow zwyši. Hišće pobrachowace srědki móhł Zwjazk ze swojeho etata zapłaćić.
To a tamne (17.06.20)
Hač do 36 inteligentnych ciwilizacijow w našim blišim swětnišću eksistuje. Wo tym su fachowcy přeswědčeni. Dźensniša technika pak hišće njedowola je namakać a so z nimi skontaktować, měnja wědomostnicy uniwersity w jendźelskim Nottinghamje. Přerězny wotstawk mjez ciwilizacijemi wučinja 17 000 swětłolět. Swětłolěto je čara, kotruž swětło a škričkowy signal w běhu lěta přeprěčatej.
Lubowarjo ptakow móža wokomiknje w internetnym livestreamje wobkedźbować, kak so młode pustawy (Turmfalke) na prěnje wulěty po Berlinje podawaja. „Pjeć młodźatam na terenje parkoweje kliniki we wobwodźe Weißensee je poněčim wočiwidnje wusko a wostudłe w hnězdźenskim kašćiku“, zdźěla Berlinski přirodoškitny zwjazk. Wobstatk Berlinskich pustawow wšak móže so widźeć dać: Wjace hač 300 porow tam maja.
Kritizuje wuprajenja Dudy
Berlin (dpa/SN). Społnomócnjeny Pólskeje za čłowjeske prawa Adam Bodnar je diskriminowace wuprajenja kandidata w prezidentskim wólbnym boju přećiwo splažnym mjeńšinam kritizował. „Njeje žanych wobstejnosćow, tež wólbneho boja nic, kotrež bychu wothódnoćenje towaršnostneje skupiny a homofobnu retoriku woprawnili“, Bodnar wčera rjekny. Wot narodno-konserwatiwneje knježerstwoweje strony PiS nastajeny kandidat, amtěrowacy prezident Andrzej Duda, bě na wólbnobojowym zarjadowanju wo homoseksualnych rjekł: „Chcedźa nam napowědać, zo su to čłowjekojo. Je pak to jenož ideologija.“
Schröder za nawrót Ruskeje
Berlin (dpa/SN). Bywši zwjazkowy kancler Gerhard Schröder so za to wupraja Rusku zaso do rjadow skupiny statow G7 přiwzać, kotraž by so potom zaso z G8 stała. „Njemóžemy kraj, kiž je stajny čłon Bjezstrašnostneje rady Zjednoćenych narodow a ma prawo na weto we wšěch prašenjach swětoweje politiki, prosće izolować“, rjekny politikar SPD w interneće. „Bjez Ruskeje njehodźa so mjezynarodne problemy rozrisać.“
Demonstruja za wyše mzdy
Pod raznymi wěstotnymi naprawami zahajichu dźensa w Frankfurće nad ...
FDP: Wosebite prawa korony dla zaso zběhnyć
Berlin (dpa/SN). FDP je zwjazkowy sejm namołwjała knježerstwu wosebite prawa zaso sćazać, kotrež bě jemu sejm koronapandemije dla spožčił. Tuchwilne połoženje w Němskej „wosebite prawa knježerstwa hižo njewoprawnja“, praji nutřkopolitiski rěčnik Konstantin Kuhle powěsćerni dpa. Dale wón rozłoži: „Epidemiske połoženje narodneho rozměra, z kotrymž hodźa so prawa parlamenta wobmjezować, hižo njewobsteji.“ Na lokalne wudyrjenje koronawirusa móža kraje a komuny po zakonju wo škiće před infekcijemi sami reagować. „Zwjazkowy sejm dyrbi nětko jednać.“
Strowotniskopolitiska rěčnica frakcije FDP Christine Aschenberg-Dugnus rjekny powěsćerni: „Mjeztym zo mějachmy za čas wobzamknjenja w měrcu wšědnje 4 000 do 6 000 nowych infekcijow, je jich tuchwilu hišće 200 do 400.“ Strach přećeženja narodneho strowotnistwa wjace njewobsteji. „W Schleswigsko-Holsteinskej lěkuja tele dny hišće pjeć pacientow na koronawirus w chorownjach. To pokazuje, zo je regionalnje diferencowane postupowanje trěbne. Epidemiske połoženje dyrbi sejm tuž zaso zběhnyć.“
