Berlin (dpa/SN). Twarc lětadłow Airbus chce jako reakciju na krizu lětarstwa koronapandemije dla přichodnej dwě lěće 40 procentow mjenje mašinow produkować a tysacy dźěłowych městnow šmórnyć. To je šef předewzaća Guillaume Faury připowědźił. Tójšto nowych lětadłow njejsu lětanske předewzaća dotal wote­wzali. Wot tuchwilu 90 000 dźěłowych městnow w ciwilnym wobłuku Airbusa je 15 000 wohroženych. Kriza budźe po słowach Fauryja najzašo kónc lěta 2021 hospodarsce přewinjena.

Zakituje bayersku strategiju

Berlin (dpa/SN). Bayerski ministerski prezident Markus Söder (CSU) je strategiju swojeho zwjazkoweho kraja nastupajo testy za kóždeho zakitował, zo móhli koronawirus wotwobarać. Njeje alternatiwy w boju přećiwo wirusej, hač wšitkich testować a wotstawk mjez ludźimi dodźeržeć, rjekny wón dźensa w rańšim magacinje telewizije ZDF. Ludźom, kotřiž maja symptomy, Söder garantuje, zo wuslědk testa w běhu 24 hodźin předleži.

Merkel a Macron wuradźujetaj

Berlin (dpa/SN). Zwjazkowy sejm a Zwjazkowa rada chcyštej dźensa na wurjadnymaj posedźenjomaj konjunkturny paket zwjazkoweho knježerstwa schwalić, kiž ma konsum a hospodarstwo w koronakrizy zaso wožiwić. Wón wobsahuje hač do kónca lěta wobmjezowane zniženje nadhódnotoweho dawka wot 19 na 16 procentow a jónkrótnu přiražku 300 eurow za kóžde dźěćo, kotrež ma prawo na dźěćacy pjenjez. Zwjazkowy sejm je so dopołdnja z naležnosću zaběrał, Zwjazkowa rada chcyše so popołdnju zeńć.

We wobłuku konjunkturneho paketa chce stat přidatnje 62,5 miliardow eurow nowych kreditow brać a so tak z 218 miliardami eurow zadołžić. Telko noweho dołha njeje sej dotal žane zwjazkowe knježerstwo nabrěmjeniło. Wurjadnej posedźeni stej trěbnej, zo móhli zniženje nadhódnotoweho dawka wot 1. julija zeskutkownić.

Frakcija FDP w zwjazkowym sejmje dwěluje, zo zniženy nadhódnotowy dawk konsum dołhodobnje wožiwi, a mjenuje to „drohi běrokratiski impuls“.

Wjeseliće so runje tak kaž ja? Wot srjedy póńdźemy z wulkimi tošemi nakupować, wšako budźe wšitko wo tři procenty tuńše. To chcyštej Němski zwjazkowy sejm a Zwjazkowa rada dźensa w běhu dnja doskónčnje schwalić. Dwěluju wšak, zo so wobchody potom zaso z ludźimi pjelnja. Stres maja tele dny předewšěm wobchodnicy. Woni dyrbja wšitke kasy na nowu sadźbu nadhódnotoweho dawka 16 město dotal 19 procentow přestajić a „smědźa so hižo nětko na to wjeselić“, kónc lěta wšitko zaso wróćo stajić směć. Potom budu tež płaćizny tworow zaso zwyšene ... Bych sej ćim bóle přał, zo knježerstwo w koronakrizy naprawy wobzamknje, kotrež so dołhodobnje wuskutkuja. Na přikład móhło solidarny připłatk, pochadźacy ze spočatka 90tych lět, dospołnje wotstronić. To by na dobro wšěch było. Město toho připowědźa nam naprawy, kotrež najprjedy raz derje klinča, kotrež pak budu spěšnje zaso zabyte. Marko Wjeńka

Pjany šofer awta ze sobujěducymaj na třěše je w Bayerskej jězbnu dowolnosć přisadźił. Spodźiwna jězba bě zastojnikam při wobchadnej kontroli w hornjoallgäuskim Durachu w nocy na sobotu napadnyła. Pola šofera zwěsćichu 1,30 promilow alkohola a wzachu jeho sobu k wotewzaću kreje. Towaršej dyrbještaj z třěchi zalězć a domoj nóžkować.

Hrajkowa pistola w zaku cholowow je w Bayerskej zasadźenje policije zawiniła. Starosćiwy wobydler bě policiju zazwonił, rozprawjejo wo wobrónjenym mužu w hosćencu. Na to přijědźechu wjacore policajske awta. Při kontroli 30lětneho zastojnicy zwěsćichu, zo so přimadło pistole, kotrež bě widźomne, originalnej bróni chětro runa. Tamny dźěl pak bě hnydom jako hrajka spóznajomna. Muž njetrjeba so tuž chłostanja po­zdatneho wobrónjenja dla bojeć.