Zapósłane (24.11.16)

Donnerstag, 24. November 2016 geschrieben von:

Bernd Pittkunings z Choćebuza wu­praja so k aktualnej temje wjelki a wowcy:

Kaž w Serbskim rozhłosu zhonich, zetka so 22. nowembra w Budyšinje 200 ludźi, zo bychu sej žadali škit wjelkow wobmjezować. W Serbskich Nowinach móžach k tomu na foće transparent demonstracije widźeć: „Wir brauchen keine Wölfe!“

Je woprawdźe škoda, zo su na zemi zwěrjata, kotrež nichtó njetrjeba. Mjez nami prajene: Němcy w Drježdźanach njetrjebaja žadyn Katolski Posoł, moja sotra njetrjeba žadyn rolator a ja njetrjebam žanoho tigra. Wšitko, štož njeje mi k wužitku, móže preč, abo?

Jeli so prawje dopomnju, bě posledni čłowjek w Němskej, kotrehož je wjelk nadpadnył, Čerwjenawka. Znaty, kiž ma dźěda a wowku w lěsu 200 kilometrow wot Moskwy w kónčinje wjelčich črjódow, mi powědaše, zo njemóža so samo tam na to dopominać, hač je wjelk hdy čłowjeka nadpadnył.

Zapósłane (23.11.16)

Mittwoch, 23. November 2016 geschrieben von:

Sylwija Rječcyna, organizatoriska nawodnica 1. serbskeje kulturneje brigady, piše w mjenje kulturneho ćělesa:

Publikum lětušeje schadźowanki dožiwi mjez druhim chór 1. serbskeje kulturneje brigady z „Italskej solotju“. Wulka pomoc, solotej tak prawje „načinić“, běštaj brigadnikam dźiwadźelnikaj Petra Bulankec-Wencelowa a Marian Bulank. Wonaj staj ze solistami a chórom přinošk scenisce tak přihotowałoj, zo njeměješe jenož publikum, ale tež chór swoje wjeselo, a to hižo na probach. Za njesebičnu podpěru so brigada Wamaj, knjeni Bulankec-Wencelowa a knježe Bulanko, cyle wutrobnje dźakuje.

Christiana Piniekowa z Choćebuza wupraja­ so k přinoškej wo iniciatiwje Serbski sejm w SN ze 17. nowembra:

W powěsći wo Serbskim sejmje „Ma postupowanje za njefairne“ rěka, zo Gunnar Krawc serbsce njerěči. Sam pak je wón při wšelakich składnosćach ze mnu serbsce rěčał.

Hłownje přihłosuja

Dienstag, 22. November 2016 geschrieben von:

Zwjazkowa kanclerka Angela Merkel (CDU) je připowědźiła, zo klětu znowa za zastojnstwo kandiduje. Smy so mjez Serbami wobhonili, što k tomu měnja.

Hanaróža Šafratowa z Bukec: Kandidaturu knjenje Merkel sym mjenje abo bóle wočakowała. Tróšku so prašam, što je wona za Němsku docpěła – jasny pak je jeje wukon na europskej runinje. Wona je jedna z tych, kotřiž hišće za Europu wojuja, a to je wosebje w dźensnišim času jara trjeba. Njewěrju do toho, zo móže kóždy jednotliwy stat Europskeje unije sam za sebje eksistować. Hačrunjež nimam wšitko za spomóžne, štož wot EU přińdźe, je wona zakładnje wažna.

Zapósłane (18.11.16)

Freitag, 18. November 2016 geschrieben von:

Jan Nuk z Radworja praša so hladajo na debatu wo šulskim zakonju: Što je pa­ragraf 5 Serbskeho zakonja Sakskeje hódny?

Zajimy serbskeho ludu móža so na krajnej, regionalnej a komunalnej runinje wot jednoho třěšneho zwjazka serbskich towarstwow zastupować.“ Tak steji pod §5 Serbskeho zakonja Sakskeje.

Hižo dawno mje mjerza, zo njesteji na tutym městnje eksplicitnje „Domowina je zastupjerka zajimow Serbow“, kaž ma to sama w swojich wustawkach zapisane.

Kaž sym wot wšelakich zapósłancow Sakskeho krajneho sejma po přewrótowym času zhonił, njehodźeše so tele wočakowanje přesadźić, dokelž widźeše te- hdy knježaca woršta Domowinu „jako relikt NDRskeho časa podobnje stronje PDS“.

Někajki druhi třěšny zwjazk Serbow nimo Domowiny pak po přewróće njeeksistowaše, tak zo rozsudźichu so tehdyši zapósłancy krajneho sejma za horjeka mjenowanu jara njekonkretnu formulaciju w Serbskim zakonju Sakskeje.

Wjednistwo Domowiny wuchadźa z prawom z toho, zo zastupuje zajimy Serbow, dokelž tež dźensa nimo Domowi­ny žadyn druhi třěšny zwjazk Serbow njeje­.

Zapósłane (15.11.16)

Dienstag, 15. November 2016 geschrieben von:

Doroteja Šołćina z Budyšina je minjenu sobotu nazymski koncert dožiwiła. Wona­ piše:

Město kermuše prošachu Budyske Domowinske­ skupiny zańdźenu sobotu, 12. nowembra, na lětuši nazymski koncert ze Smjerdźečanskej rejwanskej skupinu a folklornej skupinu Sprjewjan do Serbskeho domu.

Zapósłane (14.11.16)

Montag, 14. November 2016 geschrieben von:

Marja Macalina z Hrubjelčic wupraja so k temje wjelki:

Skónčnje politikarjo wotuća! Hižo dołho mje problem zasydlenja wjelkow w husće wobsydlenej Łužicy zaběra. Před něhdźe 60 lětami, jako běch hišće dźěćo, je dźěd ze mnu často na zahrodu ke kurjencej šoł a powědał: „Marka, budź wjesoła, zo hižo žane wjelki njejsu. Rubježnicy su na burskich statokach wulke škody načinili. Samo ludźo so w nocy bojachu. Wšako knježeše tež wulka chu­doba.

Tuchwilu so nam w Němskej dosć derje dźe. Kak kołwrótny pak dyrbiš być, zo přińdźeš na absurdnu ideju, tu z wulkimi wudawkami a fanatizmom wjelki zasydlić. Na kubłanišćach dyrbimy njesměrnje lutować. Dale dyrbimy lutować a njemóžemy dosć zapłaćić, zo móhli ratarjo swoje pola ekologisce wobhospodarjeć a přiwšěm wot wunoška žiwi być. Ludźo, kotřiž mało zasłužeja a sej připódla hišće drobny skót dźerža, spytaja našu přirodu wobchować a maja nětko wysoke płoty twarić a sej wosebite psy kupić, zo bychu skót před wjelkami škitali. Na swěće je dosć a nadosć płonin, kotrež tymle rubježnikam přihódne žiwjenske móžnosće skića.

Populisća čuja so wobkrućeni

Donnerstag, 10. November 2016 geschrieben von:

Nowy prezident USA Donald Trump zaběra ludźi tež w Němskej a Europje. Redakcija SN je so mjez někotrymi z nich wobhoniła, hač a kak so wuslědk w USA po jich měnjenju na klětuše wólby zwjazkoweho sejma wuskutkuje.

Dr. Měrćin Wałda, rěčnik iniciatiwneje skupiny Serbski sejm: Wo tym sym přeswědčeny. Krótko po dobyću gratulowachu Trumpej prawicarjo kaž Geert Wilders, Marine Le Pen, Viktor Orban, Frauke Petry a dalši. Moja generacija je wotrostła w nadźiji, ženje hižo šowinizm, rasizm abo awtoritarizm dožiwić. Njejsym wěrił, zo budźe to tež w Němskej w tak krótkim času zaso móžno. Ale hižo w našej domiznje mamy prawicarskich hewrjekarjow, kotřiž čuja so „zmužići“ přez parole dale a wuspěšnišich populistiskich stron. To ći dych wotrazy.

NDR, statna bjezstrašnosć a Serbja

Mittwoch, 09. November 2016 geschrieben von:

Wodźace wosobiny bywšeho komunistiskeho režima pječa dźensa hižo swoje skutkowanje w NDRskej dobje njetema­tizuja, je Sieghard Kozel 26. oktobra w Serbskich Nowinach twjerdźił, ale tomu tak njeje. W serbskim konteksće wone skerje swoje skutki, njeskutki abo nic-skutki jako wužitne za narodnosć wustajeja, hačrunjež bě knježacy towaršnostny porjad njesprawny. Samoknjejstwo jedneje strony njesprawnosći polěkowaše. Na prašenje, čehodla so poprawny nadawkidawar statneje bjezstrašnosće, strona SED, w mojej publikaciji lědma předstaja, je lochko wotmołwić: Njeje to tema knihi. Přispomnjenje, zo bě NDR legitimny stat, zda so mi być woprawnjene. Nic pak, kaž je Sieghard Kozel pisał, zo bě NDRska towaršnosć legitimna. Towaršnostny porjad njebě legitimny, dokelž bě w mnohim nastupanju nječłowjeski, mjez druhim w skutkowanju tajneje policije. Wona měješe mjenujcy nadawk, ludnosć wobstražować a njepřećelow likwidować. W demokratiskim staće njesłuža organy mocy, tež wěstotne organy, tomu, samoknjejstwo jedneje strony wobškitać, ale tomu, demokratiski porjad zawěsćić.

Zapósłane (04.11.16)

Freitag, 04. November 2016 geschrieben von:

Regina Šołćina z Konjec poby tydźenja na zarjadowanju k 15. róčnicy šulskeho zběžka w Chrósćicach a so wupraja:

Zajimcy a sympatizanća kaž tež wojowarjo wo tehdyšu dobru wěc běchu přišli nadźijejo so, někajke, hdyž tež snadne, pozitiwne rezultaty našeho tehdyšeho boja směć sobu domoj wzać. Nažel pak dyrbjach zwěsćić, zo njejsu zamołwići trěbne wučby z tehdyšeje wopačneje a zahubneje šulskeje politiki sćahnyli – nastupajo šulski zakoń woni na blaku teptaja, hrajkajo sej z paragrafami a artiklemi. Smy drje tehdy stratu poćerpjeli, ale přiwšěm docpěli, zo njejsu wšitke serbske šule zawrěli a jedyn wulki šulski „silo“ něhdźe na zelenu łuku stajili!

Politikarjo maja sopřed nadběhowanych stupić

Freitag, 28. Oktober 2016 geschrieben von:

Berlin (ML/SN). „Zetkam-li w Sakskej zmužitych ludźi, kotřiž so za demokratiju a čłowjeske prawa zasadźeja, da so stajnje wjeselu.“ Takle wotmołwi wiceprezidentka Němskeho zwjazkoweho sejma Claudia Roth (Zeleni) na prašenje redaktorki Berlinskeje nowiny Die Welt Claudije Kade, „hač so wona hižo na swój přichodny wopyt w Sakskej wjeseli?“ Pod nadpismom „Sym drje projektowa płonina za prawicarsku hidu“ wotmołwja znata politikarka Zelenych w interviewje cyłoněmskeho dźenika na prašenja w zwisku ze šćuwańcu na reprezentantow zjawnosće we wobłuku swjatka němskeje jednoty w Drježdźanach.

Anzeige