Jobcenteraj wokrjesow Zhorjelc a Budyšin kročitej po nowych pućach. Prěni raz stej wonej na dźěłowe a wukubłanske wiki wčera do Lubija přeprosyłoj.
Lubij (UM/SN). Ličba dnja rěkaše 5 160. Tak wulka je wot předewzaćow Zhorjelskeho wokrjesa přizjewjena potrjeba personala hač do lěta 2022. W Budyskim wokrjesu so znajmjeńša runje telko nowych dźěławych přidruži. Wjace hač połojca poskitkow dźěłowych městnow, kotrež maja so wutworić abo znowa wobsadźić, měri so na fachowcow. Na ludźi, kotřiž maja znajmjeńša kwalifikowane powołanske zakónčenje, w najlěpšim padźe samo hišće něšto wjace „w zaku“. Zwotkel pak jich brać?