Choćebuske zarjadniske sudnistwo skóržbje wotpowědowało
Choćebuz (SN/BŠe). Rozsud Choćebuskeho zarjadniskeho sudnistwa minjeny tydźeń w Braniborskej nětko njeměr zbudźa. Po wusudźe smě koncern Łužiska energija a milinarnje (LEAG) jenož hišće hač do 14. meje brunicu w Janšojskej jamje wudobywać. Němska wobswětowa pomoc (DUH) a wobswětowy zwjazk Zelena liga běštej mjenujcy skoržiłoj, dokelž předewzaće přewjele wody z jamy klumpa, štož hłownemu zawodnemu planej njewotpowěduje. Minjenu srjedu to Choćebuske sudnistwo ze swojim wusudom wobkrući.
Koncernowa zawodna rada LEAG reaguje z wulkim njezrozumjenjom. Hladajo na wójnu w Ukrainje ma tema energijowe zastaranje w Němskej zaso hinašu dimensiju. „Štóž wudobywanje brunicy w Janšojskej jamje njedowoli, tež zawěsćene mnóstwo tudyšeho wuhla a tak tež zawěsćenu produkciju miliny njedopušći“, rěka w pjatkownej zdźělence zawodneje rady LEAG.