Wójna w Ukrainje so tež na produkciju Łužiskeje woleńcy we Wojerecach wuskutkuje. Nimo toho zwyšene płaćizny za ćěriwo a surowizny mały zawod nadměru wužaduja.

Wojerecy (SN/at). Wo swojim dodawarju laneho symjenja rěči jednaćelka Wojerowskeje Łužiskeje woleńcy Regine Jorga z najwjetšim připóznaćom. To je ze swójbu w Němskej bydlacy kazachski wobchodnik, wot kotrehož wona z Kazachskeje dowožowanu hłownu surowiznu kupuje. „Tydźensce tři abo štyri nakładne awta nam lane symjo z Kazachskeje přez Rusku přiwjezu“, jednaćelka rozprawja. Z wójnu w Ukrainje pak so wona praša, kak dołho móže z transportami scyła hišće ličić. Wupady drje dotal žane byli njejsu, transporty pak njejsu wjace tak dypkowne. Regine Jorga so nadźija, zo so dodawanski rjećaz dospołnje njepřetorhnje.