Dźěłarnistwo IG metall wo tuchwilnych wuwićach informowało
Budyšin (SN/BŠe). Wot spočatka měrca hač do kónca meje přewjedu w předewzaćach po cyłej Němskej wólby zawodneje rady. Kaž dźěłarnistwo IG metal wčera na onlinowej nowinarskej rozmołwje informowaše, su z dotalnymi wuslědkami jara spokojom. „Najwjetši dźěl mandatow docpěchu kandidaća lisćiny IG metal“, wobkrući nawodnica dźěłarnistwa za wobwod Sakska, Braniborska a Berlin Birgit Dietze. Hladajo na tuchwilne a přichodne wužadanja je to jasne znamjo, wšako sobudźěłaćerjo nowym narěčenskim partneram ćežke nadawki přicpěwaja. W tym zwisku mjenowaše nawodnica wobwodow na wuchodźe Němskeje strukturnu, energijowu a generacisku změnu, digitalizaciju, koronapandemiju a wójnu w Ukrainje.