Wjelka z třomi nohami su ludźo hižo wjacore razy znowa wuhladali
Lejno (SN/BŠe). Hižo loni je wjelk z třomi nohami wobydlerjow w Horjanach a Delanach starosćił. Tež Budyski krajny rada Michael Harig (CDU) je so w zjawnym lisće kritisce wuprajił a wottřělenje zwěrja žadał. Wjace króć bě wjelk nětko zaso wokoło Lejna widźeć. Hakle minjenu njedźelu je tež wowčer Gerat Šmit rubježne zwěrjo najprjedy w Hórkach a potom tež na dworje swojeje wowčernje w Časecach lepił a jeho wuhnał. Wowčer pak je swoje zetkanje hnydom wjelčemu managementej přizjewił.
„Fachowemu wobłukej wjelk předleža z lěta 2022 cyłkownje wosom wobkedźbowanjow potrjecheneho wjelka, kotremuž pobrachuje nimale kompletna prědnja noha“, wuswětli nowinska rěčnica sakskeho krajneho zarjada za wobswět, ratarstwo a geologiju Karin Bernhardt. Šěsć zdźělenkow pochadźa z kónčinow Chrósćic, Njeswačidła, Hodźija a Budyšina. Při jednym z wobkedźbowanjow je samo wobraz nastał, tak zo jedna so wo wěsty dopokaz. Tamne pjeć liča pak k njewopodstatnjenym pokazkam, k čemuž słuša njedźelna zdźělenka.