Pillnitz (JM/SN). Cyłkownje 16 wučomnikow druheho a třećeho wukubłanskeho lěta je so kónc meje na mjeztym jědnatym wubědźowanju krajinowych zahrodkarjow pod hesłom „Sakscy mištrojo 2022“ wobdźěliło. Dwaj dnjej trajace wubědźowanje wotmě so we wukubłanišću Sakskeho zarjada za wobswět, ratarstwo a geologiju w Drježdźanach-Pillnitzu. Mjez wobdźělnikami bě tež wučomnik Franz-Hennig wot zahrodnistwoweho a krajinotwarskeho předewzaća Wehle z Čornych Noslic. Wón njebě drje na kóncu mjez prěnimi, móžeše pak sej wjele nowych nazhonjenjow a dopóznaćow sobu domoj wzać.
Dobyło je mustwo Drježdźanskeho zahrodnistwa Werner Eyßer-Schöne Marc-Kevin Richter (18) a Johannes Freigang (20). Wobaj zastupujetaj Saksku při wšoněmskim wubědźowanju krajinowych zahrodkarjow w septembru w Nürnbergu.