Serbowka Diana Karbowa je projektowa managerka za Wojerowske hospodarske spěchowanje

Wot jeje ródneje wsy je wjele pućow do Wojerec. „Krajina po puću inspiruje. Wona mje přeco zaso zwjesela“, měni 42lětna Serbowka Diana Karbowa ze Swinjarnje pola Pančic-Kukowa. Ze sportom ­a z meditaciju wona wšědnje dźeń zahaji. Předewšěm rady płuwa, běha a wěnuje so yoga, dychanskim zwučowanjam abo lodowemu kupanju. To tyje jeje strowoće, wo tym je 42lětna přeswědčena. Wot minjeneho januara je jako projektowa managerka z ćežišćom hospodarske spěchowanje w měsće Wojerecach zasadźena. Zhromadnje z koleginu Gudrun Thieme-Schmidt z Ranja přewodźa mać dweju dźěsćow mnohostronske projekty we wobłuku strukturneje změny. Město zamóže dźěłowe městno za štyri lěta z pomocu spěchowanskeho programa STARK financować.