Lipsk (SN/bn). Planowane rozšěrjenje Rychwałdskeje brunicoweje jamy do směra na wuchod je Němskej železnicy (DB) z přičinu, kolije čary Choćebuz – Zhorjelc zdźěla přepołožić. Parcielnje dwukolijowa trasa budźe dospołnje elektrifikowana a ma spěšnosć hač do 160 km/h dowolić. Nadawkar tejele infrastrukturoweje naprawy je hórniske předewzaće Łužiska energija a milinarnje LEAG. Wuraznje žadaja sej „wšitke škitahódne aspekty wobkedźbować a nańć za čłowjeka, přirodu a wěrinu znjesliwe rozrisanje“.
Za region juhowuchod zamołwita wotnožka DB w Lipsku je předwčerawšim wotpowědne detaile wozjewiła. Kaž w jeje nowinarskej zdźělence rěka, ma „wotrězk čary mjez Běłej Wodu a Rěčicami w běhu dweju lět hač do 2027 nastać“. Na jězbne časy nima so přepołoženje po informacijach DB wuskutkować.
