Prěni „Łužiski forum 2038“ z fokusom na regionalne hospodarstwo

Carny Goźd (SN/bn). Předewzaćelskej zwjazkaj Sakskeje a Braniborskeje stej wčera w Carnogózdskim kulturnym domje BASF prěni cyłodnjowski „Łužiski forum 2038“ wuhotowałoj, wěnowany ekonomiskemu wuwiću w a po strukturnej změnje. Mjez hosćimi běchu zastupjerjo hospodarskich organizacijow a firmow regiona kaž tež we woběmaj zwjazkowymaj krajomaj skutkowacy politikarjo a wědomostnicy. Patronatstwo wukonještaj ministerskaj prezidentaj Sakskeje, Michael Kretschmer (CDU), a Braniborskeje, dr. Dietmar Woidke (SPD). Wobaj wobdźělištaj so tež na panelu „Łužica – Modelowy region a kónčina splećenja“.