LMBV na regionalnej konferency dalše naprawy w jězorinje rozkładła

Hórnikecy (AK/SN). Łužiska a srjedźoněmska towaršnosć hórnistwoweho zarjadnistwa (LMBV) koncentruje so při saněrowanju jězorow dale na tak mjenowany rjećaz zbywacych jamow. „Zaměr je, hač do lěta 2030 něhdźe 4 000 hektarow wodoweje přestrjenje dozhotowić. K rjećazej zbywacych jamow słušeja Rański jězor (820 hektarow), Sedličanski jězor (1 420 hektarow), Parcowski (1 100 hektarow) a Lejnjanski jězor (650 hektarow). K wěrnosći runje tak słuša, zo dyrbja jězory kaž Sprjewinodołski abo Nowołučanski najprjedy čakać“, podšmórny Gerd Richter, nawoda wobłuka saněrowanje Łužica předwčerawšim na regionalnej konferency Łužiska jězorina 2022.

Wjace hač połsta wobdźělnikow z turizma, hórnistwa, komunalneje politiki, lěsnistwa, přirodoškita a hospodarstwa je so w Hórnikečanskej Energijowej fabrice zešło. Tema lětušeho schadźowanja rěkaše „Aktiwne regionalne wuwiće“. Zaměrowy zwjazk Łužiska jězorina Sakskeje bě na konferencu přeprosył.