Časecy (SN/BŠe). Hnydom dwójce je wjelk minjene dny stadło něhdźe 450 wowcow Gerata Šmita blisko Časec wopytał a mortwe zwěrjata zawostajił. „Wjelk je 1,05 metrow wysoki płót přeskočił“, wujasni Hórčan wowčer. Slědy móžeše fachowc z wjelčeho běrowa w błóće zawěsćić. Wulke stadło je wustróžane z pastwy wućekło a poda so za Wučkecami do směra hłowneje dróhi, kotraž je wažny zwisk k zwjazkowej awtodróze A 4. Dróhu su zwěrjata w nocy přeprěčili. „Zo njeje k wobchadnemu njezbožu dóšło, je wulke zbožo“, Šmit podšmórny. Hakle rano wokoło šěsć hodźin je wobydlerka z Jědlicy wowčerja zazwoniła, jako je stadło z wokna domskeho wuhladała. Bjezposrědnje na to je Hórčan wowcy z płotami zawěsćił. Hakle jako so do Časec nawróći, je tři mortwe wowcy na pastwje namakał.