Na wopyće w drastowej stwičce, kotraž je w Kulowskim Jakubecowym wustawje zarjadowana
„Komorku serbskeje drasty“ su w hornim poschodźe Jakubecec wustawa w Kulowje zarjadowali. Wot decembra 2024 je w małej rumnosći wupožčowarnja narodneje drasty za Kulow a wokolinu zaměstnjena. Wo nju so towarstwo Bratrowstwo z.t. stara. Ze Serbskeho komunalneho programa Swobodneho stata Sakskeje dóstawa srědki za zhotowjenje abo zwuporjedźenje dźělow drasty. „Chcemy na tute wašnje tež lubosć a česćownosć za narodnu drastu zachować. Tohodla sposrědkujemy tež nadrobnu wědu wo njej. Ideelna hódnota je nam wažna. A tež narodna drasta je wuraz serbskosće a wuznaće k ródnym korjenjam“, měnitej iniciatorce Kristin Belkotowa a Sonja Hrjehorjowa.
