Budyšin. (SN/jp) Nowy wobchod, w kotrymž njeje předawarja abo předawarki, wobsteji wot meje na Karla Marxowej njedaloko Žitnych wikow. Nutřkowne wuhotowanje je tróšku swojorazne, a poprawom by je skerje w Japanskej wočakował: We wobchodźe njejsu polcy, ale tam steji pjeć awtomatow, kotrež su połne chłóšćenkow, napojow a dalšich produktow.

Přećelej Nick Pietschmann a Adrian Gründer chcetaj kupcam ze swojim konceptom zmóžnjeć, po potrjebje tež w časach nakupować, hdyž su wšitke dalše wobchody w měsće zawrjene, wosebje w nocy. Hustohdy ludźo runje potom to a tamne trjebaja, štož doma nimaja. Z nowym wobchodom „SnackMatic“, kotryž je sydom dnjow wob tydźeń 24 hodźin wočinjeny, to hižo problem njeje.

Wosebitosć koncepta je, zo wobchod dospołnje awtomatisce funguje. Awtomaty drje ma čłowjek napjelnić a – jeli trjeba – tež zmylki namakać a wuporjedźeć, jednaćelej pak njetrjebataj přistajeneho, kotrehož dyrbjałoj zapłaćić. Zdobom njetrjebataj samaj stajnje we wobchodźe přitomnaj być.