Kupjele so wjesela, skotarjo so starosća

Porchow/ Hrańca. (SN/StŠ) Temperatura wodnjo nad 35 stopnjemi, w nocy pak nic pod dwaceći stopnjemi – štož je za jednych perfektne lěćo, je za tamnych skerje wohrožace. W kupjeli w Porchowje so nad lěćnym wjedrom přewšo wjesela a so nadźijeja, zo tež woprawdźe tak horco budźe, kaž připowědźene. Wšako dotal hišće přewjele ludźi w prózdninach w Porchowje so kupać njebě, tak wuchowanski płuwar Sandro Funke. „Ludźo hladaja rano na wjedrowu app, a hdyž tam něšto wo hrimanju steji abo hdyž je trochu sylniši wětřik připowědźeny, potom zwjetša do kupjele njepřijědu.“

Bilanca po třoch njedźelach lěćnych prózdnin tuž předobra njeje. Jeničce na horcymaj dnjomaj kónc junija, jako temperatura na nimale 40 stopnjow stupaše, běchu kupanskej basenkaj a trawnik w Porchowskej kupjeli kopaće połne.