ST Mały Wjelkow
– ST 1922 Radwor 0:3 (0:1)
Zestawa hosći: Wróbl – Henke, Buša, Sćapan, Šram, Karwin, Bauer, Nuk (75. Wjenka), Zähr, Schulze, Mark
Po wjac hač štyrjoch lětach nastupichu Radworscy koparjo zaso raz w Małym Wjelkowje, hdźež wšak běchu faworit. Z wosom duelow wot lěta 2007 njeběchu hišće žadyn přěhrali. Šěsć króć dźěchu jako dobyćer z hrajnišća, dwójce sej cyłkaj dypkaj dźěleštej. Tak sej trenar Pětr Bejmak wot swojich chowancow tež nětko zaso połnu koncentraciju a měrnosć we wšěch akcijach žadaše. Radworčenjo tuž wot započatka dominowachu. Hnydom z prěnim dobrym nadběhom we 8. min. poradźi so jim 0:1. Mark suny bul po flance Nuka do krótkeho kuta. A mějachu hišće dalše šansy do połčasa. Nuk a dwójce Mark pak wrota misnyštaj. Najlěpši hrajer na stronje domjacych bě jich wrotar. Z dobrymi refleksami a paradami wón wrotam zadźěwaše.
Wokrjesne finale we wubědźowanju „Młodźina trenuje za olympiju“
Hrajerjo beachvolleyballa běchu ći prěni, kotřiž startowachu w nowym šulskim lěće do wubědźowanja „Młodźina trenuje za olympiju“. W Budyskej Sprjewinej kupjeli wotmě so při chłódnych temperaturach wokrjesne finale w starobnej klasy II (9. do 11. lětnik). Sportowcy Serbskeho gymnazija Budyšin (SGB) wobkrućichu znowa swoju dominancu. Woni přewinychu Schillerowy gymnazij Budyšin, Goethowy gymnazij Biskopicy a Wyšu šulu Biskopicy.
Turněr wotmě so po systemje „best of three“, to rěka, zo wojowachu mustwa – wobstejace stajnje z holčeje a hólčeje dwójki kaž tež z měšaneho porika – jednu sadźbu hač do 21 dypkow. Beachvolleyballistce Jessica Hetschickec z Dalic a Anni Leidigec z Cyžec, dwójka Józef Hantuš z Radworja/Matej Cyž z Chrósćic a měšany team Swenja Wowčerjec z Prěčec/Maksimilian Jurack z Malešec njedachu sportowej konkurency w pěsku žanu šansu na dobyće. Mustwo SGB skompletowa Toni Rudolph z Wulkeje Dubrawy a dopomha jako wuměnowy hrajer rjanemu wuspěchej serbskeho kubłanišća.
SJ Njebjelčicy
– SV Haselbachtal 5:4 (1:2)
Zestawa domjacych: Hahn – Hrjehor (46. Kral), Haška, Šołta, Dubaw, Hoier, Hanuza, Lejnart (87. Ričel), Cyž, Hoelzel, Čornak (77. Mjechela)
Přihladowarjo, kotřiž su sej minjenu njedźelu w Njebjelčicach koparsku hru wobhladali, rozsud zawěsće njewobžaruja. Wot spočatka bě wona wotměnjawa a dosć atraktiwna. Hłowne přičiny toho běchu hrube zmylki na woběmaj bokomaj, ale tež sylne nadběhi a krasnje wuhrate wrota.
Wosebje w 1. połčasu njenamakachu domjacy prawy taktiski recept. Haselbachtalčenjo strašnje nadběhowachu. Jich wonkowni škitarjo starachu so tak přeco zaso wo wjetšu ličbu hrajerjow na křidłomaj. A Njebjelčenjo mějachu z tym wulke problemy. Hižo po 11 mjeńšinach hosćo z dwojimi wrotami nawjedowachu. Wo 0:1 postara so Rauprich, wo 0:2 Frenzel. Po krótkim šoku pak Njebjelčanscy hrajerjo wotućichu. Po stacijach Dubaw – Lejnart – Hanuza docpě bul Čornaka, kiž z niskej třělwu na 1:2 skrótši.
HZ Łaz/Běły Chołmc
– Sokoł Ralbicy/Hórki II 3:0 (2:0)
Zestawa hosći: Měškank – M. Matka, Zynda, Bogusz, Materna, Bernard (86. Šěn), Schultz (44. Šnajder), Róbl, M. Kurjat, G. Kurjat. Šmit (66. J. Matka)
ST Marijina hwězda
– SK Hlinowc 3:5 (2:3)
Zestawa domjacych: Vacek – Wróbl, Sbjeznie, Łušćanski, Lipič, Schmidt, Bělk (71. Langer), D. Jurš, T. Jurš, Pakoßnick, Peschmann (63. Winkler)
Prěnje koparske mustwo ST Marijineje hwězdy je sej za duel susodow tójšto předewzało. Tak widźeše 95 přihladowarjow hnydom wot započatka sylnych domjacych. Hižo zahe měješe Křesćan Bělk po flance Paula Schmidta prěnju móžnosć (6.). Na tamnym boku wotwobara Oliver Vacek třělwu hosći k róžkej (8.). 1:0 nasta wo rjanej akciji přez prawu stronu. Jakob Pakoßnick bě Schmidta posłužił, kiž běžeše hač k zakładnej liniji. Pas dozady suny Falko Peschmann k 1:0 (10.) do wrotow. Dwě mjeńšinje pozdźišo přesadźi so Bělk po spěšnym zamjeće Tomaša Jurša přećiwo dwěmaj škitarjomaj přećiwnika a třěli 2:0 (10.). Štož pak so potym sta, běchu eklatantne zmylki w rjadach hosćićela. W běhu 13 mjeńšin nawjedowaše Hlinowc 3:2. Krótko do połčasa by Dawid Jurš sam před wrotarjom přećiwnika 3:3 trjechić dyrbjał. Narěč trenarja Tobiasa Škody na to w kabinje bě chětro wótra, a klóšterscy koparjo pokazachu spočatk druheho połčasa hnydom wjace elana.
Po prěnim dypku, postupje do wobwodneje volleyballoweje ligi, spjelnichu Marijine hwězdźički tež druhi dypk.
Z ćopłej ruku podpěrachu Pančičanske volleyballistki při nowym woblečenju lětanski center Milan z Kamjenca, twarska tzwr Sorabija z Róžanta, Janek Wowčer z Kulowa a swójske towarstwo. Nowu drastu je Morczinekec wabjenska agentura z Čelchowa darmotnje poćišćała. Předkoło wobwodneho pokala skićeše hrajerkam móžnosć, so prěni raz w nowym outfiće prezentować.
– Ochranowske volleyfantki 0:2
W prěnjej sadźbje zasadźi trenar Ralf Wachsmann nowu šestku. To hišće tak prawje njefungowaše. Spěšny zastatk njemóžachu stopnjowace so Marijine hwězdźički wurunać. W přichodnej sadźbje steješe zaso najsylniša wubranka na parkeće. Z nowym nadawkom agěrowaše Halena Jancyna jako libera. Wona kaž tež cyłe mustwo pokazaštej wuběrny wukon. Po dramatiskej kónčnej fazy pak běchu znowa Ochranowčanski wuspěšne a dobychu hru z 2:0.
– VV Žitawa 09 II 2:0
Zestawa domjacych: J. Jakubov – Kolan, Klippel, Pfanne, Kral, Rosendo (67. Walther), Hoßmang, Čermák, Reher (79. Heppner), A. Jakubov, Salewski (59. Hansch)
FC Schönberg 95, postupnik do regionalneje koparskeje ligi, bě njedźelu prěni raz na Budyskej Młynkec łuce. Hrajersce sylne mustwo trenarja Axela Rietentieta bě do hry w sprjewinym měsće z kóždeje wonkowneje partije z dypkom domoj přijěło. Tež tónraz to wězo chcyše. 550 přiwisnikow Budissy Budyšin pak chcyše dobyće domjaceho cyłka widźeć. Zo budźe to ćežki nadawk, wědźeše pak trenar Tomaš Henčl hižo do hry. Hižo w 13.min. pokaza sudnik na dypk w šěsnatce domjacych. Jědnatka bě woprawnjena a Schönbergski kopar ju wěsće přetwori. Hosćićeljo prócowachu so wotnětka wo wurunanje. Salewski bě prěnju šansu derje spřihotował, Alexander Jakubov pak na wrotarju zwrěšći. Tež Rosendo namaka we wrotarju přećiwnika Hahnelu swojeho mištra. Hišće do přestawki měještaj Hoßmang a Klippel dobrej móžnosći. Žana pak k wrotam njewjedźeše.
Lětuši Budyski měšćanski běh bě z 1 333 wobdźělnikami jasnje pod rekordnymaj ličbomaj 1 507 w lěće 2013 a 1 491 loni. Najwjace bě jich tónkróć šulerjow do 19 lět, kotřiž so sobotu na wjacore čary podachu. Hłowna přičina mjenje běharjow móhł startowy pjenjez być, kotryž wučinja za šulerjow dale tři eura. Wobdźělnicy ze Serbskeje zakładneje šule Budyšin na přikład njejsu na 22. Budyskim měšćanskim běhu zhromadnje za swoje kubłanišćo startowali, ale jako jednotliwcy. Sportowi wučerjo běchu hižo loni startowy pjenjez třoch eurow jako njewoprawnjeny kritizowali a sej nišu płaćiznu žadali. Dotal bě mjenujcy spěchowanske towarstwo serbskeje zakładneje šule kompletnu sumu zapłaćiło, lětsa pak dyrbjachu šulerjo swój podźěl sami płaćić.
Nimo běha za cyle małe dźěći poskićichu zarjadowarjo šulerske běhi, prěni raz swójbny běh a k tomu hišće hłownej na distancy 5,6 a 9,3 kilometrow. Zamołwići běchu čaru w měšćanskich zelenišćach při dźiwadle wo někotre metry skrótšili, zo njeby tam k njezbožam dóšło.
SJ Chrósćicy – ST Ćisk 2:0 (1:0)
Zestawa domjacych: Králíček – Pöpel, Cyž, Šafář, Dórnik, Šmit (60. Dehn), Runt, F. Zahrodnik, Młynk (83. Budar), Žur, Věchet
Načolnik, načolnik, hej, hej, hej!!! Tele a hišće dalše pěsnje dobyća su po wčerawšej hrě z Chróšćanskeje koparskeje kabiny słyšeć byli. Wšako mějachu tež wšu přičinu. Po napjatej a přez cyły čas wurunanej partiji wopušćichu domjacy hrajnišćo jako dobyćer. Nimo toho su načolnika tabulki, přećiwnika ST Ćisk, přesćahnyli a steja nětko na prěnim městnje.
FSV Łuty – Sokoł Ralbicy/Hórki 0:4 (0:2)
Zestawa hosći: Gloxyn – Kř. Matka, B. Bjeńš, von Köding, Lulak, St. Bjeńš, Korjeńk (80. Wałda), T. Bejma (65. M. Matka), Nuk, Domaška, B. Bejma
Wjesele, ale tež z hłowu wijo su so koparjo Sokoła Ralbicy/Hórki wčera we Łutach z horstku delanskich fanow rozžohnowali. Su drje ze 4:0 jasnje dobyli, njewužiwanych šansow dla so pak njesměrnje mjerzachu.