22. Mužakowski hrodowy parkowy běh so wotměł
Lětuši 22. Mužakowski hrodowy parkowy běh, prěnje hódnoćenske wurisanje lětušeje rjadneje lisćiny Wopačanski cup běharjow, je 425 sportowcow do města wjercha Pücklera přiwabił. Mjez nimi běše tež zaso horstka serbskich atletow. Na distancach 0,8 km, 2,5 km, 5 km a 10 km wubědźowachu so aktiwni wot třilětneho hač k 87lětnemu.
Na 10 km dobyštaj Robert Kubisch a Lilli Reichwald z Budyšina. Najwuspěšniši serbski starter běše 25lětny Jakub Čórlich z Němcow. Wón wobsadźi cyłkownje 7. městno a w swojej starobnej klasy samo třeće. Na 5 km dobyštaj Leon Sperling a Sandra Beck z Rózborka. Jurij Nuk bě třeći w sk 80.
Wšitcy startowacy su sej z Mužakowskim hrodowym parkowym běhom prěnje dypki za rjadne lisćiny 2016 nahromadźili. Jurij Nuk
Trenar z dypkom spokojom
FC Schönberg
– FSV Budissa Budyšin 2:2 (0:2)
Zestawa hosći: Jakubov – Kolan, Patka, Pfanne, Kral, Hoßmang, Hansch (79. Heppner), Hausdorf, Rosendo, Salewski, Walther (61. Reher)
Bě to prěnja hra po rozžohnowanju Budissy z Tomašom Henčlom. Wón bě z njej chětro wuspěšny a je ju z wobwodneje ligi hač do regionalneje ligi wjedł. Přechodny trenar Reimund Linkert pósła na kopanišćo nimale samsnych jědnaćoch, kotřiž běchu partiju z 0:2 přećiwo Jenje přěhrali. 251 přihladowarjow bě přišło, mjez nimi běchu štyrjo z Budyšina. Wjeselo bě wulke, jako postara so Hansch wo nawjedowanje 0:1 (23.). 0:2 (37.) poradźi so Salewskemu a wšitcy sej myslachu, zo maja hosći hižo tři dypki.
W kopańcy pak znajemy dwaj połčasaj. Prěnje přećiwniske wrota sudnik dla nimohry njepřipózna, ćišć na wrota Jakubova pak přiběraše. Schönberg trjechi 1:2 (69.) a štyri mjeńšiny po tym wuruna. Na zbožo móžeše Budissa znajmjeńša hišće dypk wuchować. Trenar Linkert pak bě z nim spokojom. Clemens Werner
Skónčnje zaso raz tři dypki
FSV Budissa Budyšin
– BFC Dynamo 3:2 (2:1)
Zestawa domjacych: J. Jakubov – Kolan, Patka, Pfanne (52. Fröhlich), Kral, Hausdorf, Hoßmang, Rosendo, Reher, Walther (88. A. Jakubov), Salewski (92. Heppner)
Kajka bě to super hra před jenož 550 přihladowarjemi? Budissa Budyšin, kotraž bě lětsa hišće bjez dobyća, je BFC Dynamo z Berlina, třećeho regionalneje koparskeje ligi, přewinyła. Tón bě z hrajersce sylnym mustwom ze sprjewineho města do sprjewineho města přijěł a chcyše wězo z třomi dypkami zaso domoj jěć. Domjacy pak wot wšeho spočatka jara bojownisce wustupowachu a docpěchu přez Rosenda w 21. min. 1:0. Tež po nawjedowanju woni njepopušćichu a třělichu tež hišće 2:0 (34.). Róžk Walthera bě Salewski přetworił. Nětko wukonjachu hosćo wjace ćišća a skrótšichu hišće w prěnim połčasu na 2:1 (37.).
BFC Dynamo wróći so z kabiny wysoko motiwowany a hižo w 49. min. wuruna. Hosćićeljo pak so njepodachu a po 65 mjeńšinach znowa nawjedowachu. 3:2 za nich bě Rosendo třělił. Po wjacorych móžnosćach na woběmaj stronomaj wosta při dobyću domjacych.
Po jutrach pojědu koparjo Budissy k Viktoriji Berlin. Clemens Werner
Porjedźenka
Zmylkaj w rozprawje wo „hłownej“
Do rozprawy wo hłownej zhromadźiznje SJ Chrósćicy, kotruž smy wozjewili, staj so zmylkaj zašmjatałoj. Tak rěka nowy zastupowacy předsyda Chrystof Mikławšk a do rozšěrjeneho předsydstwa buštaj Chrystof Zahrodnik a Tomaš Dučman wolenaj. Nimo toho ma sportowe towarstwo tučasnje 160 čłonow. SN
Widźał, słyšał, napisał (21.03.16)
Awtor dźensa
André Strelow
Přiwisnicy kopańcy dožiwjeja tučasnje horcu fazu z rozsudami na mjezynarodnej a zwjazkowej runinje. Najprjedy su so Mnichowčenjo w kralowskej lize hakle w poslednjej mjeńšinje do podlěšenja wuchowali. Thomas Müller z hłójčkowanym bulom bě jim blamažu zalutował. Wjeselo běše wězo jara wulke. W přidatnym hrajnym času Bayerojo hišće dwójce do čorneho trjechichu a su so tak doskónčnje za přichodne koło kwalifikowali. Tam čaka poměrnje lochki nadawk. Benfica Lissabon je a budźe jenož mjezystacija po puću do połfinala. Wšitko druhe by jara wulke přesłapjenje było. Koparjo z Wolfsburga, kotřiž su so přećiwo KAA Gentej přesadźili, dóstachu porjadny kaliber přilosowany. Real Madrid, najwuspěšniši klub we wubědźowanju, budźe najprjedy z hosćom w Němskej. Nadawk je nimale njerozrisajomny. Přiwšěm je to za Heckingowe mustwo najwjetši towarstwowy wuspěch.
Sport (18.03.16)
Přihotuja so na hru lěta
W Kamjencu zetkaja so koparjo Jednoty Kamjenc a FSV Zwickauwa sobotu, 26. měrca, k połfinalu wo sakski pokal. Hišće ženje njejsu hrajerjo z Lessingoweho města koło najlěpšich štyrjoch mustwow Sakskeje docpěli. Přihotuja so hižo pilnje na „hru lěta“. Wot 12.30 hodź. změja w stadionje wosebity program. Dźěći hač do 14 lět smědźa darmotnje do stadiona. Zastup za dorosćenych płaći dźewjeć eurow, potuńšeny sydom. Lětne kartki za tutu hru žanu płaćiwosć nimaja.
38. MTB w Humbodtowym haju
Njedźelu, 3. apryla, zarjaduje kolesowarske towarstwo RSV Budyšin w Budyšinje w Humboldtowym haju wubědźowanje z mountainbikami (MTB). Započatk je w 9.30 hodź.
Koparske dypkowe hry
19.03. 15:00 Kamjenc – Wocl Riesa
19.03. 15:00 Łuty – Kulow
19.03. 15:00 Kinspork – Rakecy
19.03. 15:00 Kubšicy – Radwor
20.03. 10:30 Hory II – Ralbicy/Hórki II
20.03. 13:30 Budissa – BFC Dynamo
20.03. 15:00 Chrósćicy – Ramnow
20.03. 15:00 Njebjelčicy – Großdrebnitz
20.03. 15:00 Marijina hwězda – Sepicy
Volleyballowe dypkowe hry
19.03. 14:00 VfB Zhorjelc – Worklecy
19.03. 14:00 Pančicy, žony – Zhorjelc
19.03. 16:00 Pančicy, žony – Kundraćicy
19.03. 10:00 Worklecy II we Wojerecach
20.03. 10:00 hrajny dźeń žonow w Budyšinje
W Budyšinje unihokej hrać
Tónraz jenož njerozsudnje
ST Ćisk
– SJ Chrósćicy 2:2 (1:0)
Zestawa hosći: Králíček – Pöpel, Bětnar, Šafář, Dórnik, Kunze (76. Młynk), Runt, Zahrodnik, Dehn, Domaška, Žur (90. Budar)
SJ Chrósćicy ma nowe předsydstwo
Minjeny pjatk wotmě Sportowa jednotka Chrósćicy swoju hłownu zhromadźiznu w „Jednoće“. Spočatnje rozprawješe jednaćel Tadej Cyž wo tučasnym połoženju towarstwa. Sportowa jednotka ma něhdźe 100 čłonow a čłonkow. Dwě třećinje z nich su aktiwni w sekciji młodźina a dźěći. Chróšćanska SJ rozrjaduje so do dweju koparskeju mustwow na polu muži a wjacorych zastupnistwow młodźiny. Dale přisłušatej jednotce tež wolejbulowa a lochkoatletiska sekcija. W fokusu dźěła předsydstwa bě w minjenych lětach a je tež aktualnje prěnje koparske mustwo, Cyž podšmórny.
Pokładnik Ronny Škoda rozprawješe wo financach jednotki w minjenych třoch lětach. Wosebje w lětomaj 2013 a 2015 registrowaše Škoda postup dochodow, štož wosebje z tym zwisuje, dokelž wotmě so w mjenowanymaj lětomaj Mjezynarodny folklorny festiwal „Łužica“. Přidatne dochody ma sportowe towarstwo na festiwalu mjez druhim z předawanja napojow.
Hladajo na financy bě Hana Grutcyna dale wšitke wudawki kaž tež knihowanja na a z konta towarstwa hač do lěta 2013 přehladała. Wona wobkrući prawosć financneje bilancy pokładnika Škody.
Domaška šěsć razow do wrotow trjechił
Sokoł Ralbicy/Hórki
– FSV Łuty 8:2 (4:0)
Zestawa domjacych: Gloxyn – Matka, B. Bjeńš, Schultz, Korjeńk, Wałda (63. M. Kurjat), Šewc, S. Bjeńš, Bejma, G. Kurjat, Domaška
Ralbičanski stadionowy rěčnik so njedźelu zawěsće wjeseleše, zo njetrjebaše při mikrofonje stać, dokelž hrajachu delanscy koparjo na twjerdym hrajnišću. By-li wón mjenujcy přihladowarjam najwažniše informacije posrědkować měł, by so wón bóle poćił hač někotryžkuli hrajer. Z hosćom bě w Delanach posledni tabulki z Łutow. Přećiwnik započa spěšnje a běše w prěnich dźesać mjeńšinach tež lěpši. Po tym pak domjacy pokazachu, zo steja zasłužbnje na štwórtym městnje tabulki, a wuhrachu sej z rjanymi kombinacijemi šansu po šansy. Prěnje tři dobre składnosće hišće njewužichu, po dołhim zamjeće pak steješe Gabriel Kurjat samlutki před wrotami a wěsće k nawjedowanju přetwori (27.). Nětko bě so suk torhnył a Łutowčenjo njemějachu w prěnim połčasu žanu składnosć wjac. Tři z mnohich dobrych móžnosćow Pětr Domaška hišće wuži (32., 36. a 43.) a z hattrickom na 4:0 zwyši.
Wuslědki (16.03.16)
Wokrjesna wyša koparska liga
Kulow – Bukecy2:3 (1:2)
Wachau – Póst Budyšin 1:1 (1:1)
Ćisk – Chrósćicy2:2 (1:0)
Hnašecy – Kumwałd0:2 (0:0)
Hory – Großröhrsdorf 2:2 (1:2)
Ramnow – Kinspork1:1 (0:0)
Wjelećin – Rakecy2:1 (1:1)
Ralbicy/Hórki – Łuty8:2 (4:0)
1. Chrósćicy 22 51 : 19 53
2. Hory 22 56 : 21 43
3. Großröhrsdorf 22 61 : 35 43
4. Ralbicy/Hórki 22 55 : 23 41
5. Kumwałd 21 57 : 38 37
6. Rakecy 22 42 : 35 35
7. Ramnow 22 47 : 47 33
8. Póst Budyšin 22 48 : 45 31
9. Hnašecy 21 44 : 30 30
10. Ćisk 22 46 : 48 28
11. Połčnica 21 34 : 36 28
12. Kinspork 22 42 : 41 23
13. Kulow 22 36 : 39 22
14. Bukecy 21 26 : 57 17
15. Wjelećin 21 31 : 67 16
16. Wachau 22 32 : 71 13
17. Łuty 21 19 : 75 10
