Narć. Na wodźenje pod hesłom „Lěhwo Elsterhorst – dopominać, spominać, napominać“ přeprošuje Wojerowski měšćanski muzej jutře, wutoru, w 10 hodź. Na awtentiskim městnje, w poslednjej zdźeržanej lacaretnej barace, zhonja zajimcy wo hnujacym wosudźe bywšeho lěhwa wójnskich jatych a podźišo wuhnatych. Mjez druhim pokazaja jutře dotal njewozjewjene fota a dokumenty wo stawiznach lěhwa, na přikład wo přichadźe tysacow pólskich jatych w lěće 1939 a jich žiwjenju w lěhwje.

Zajimcy zetkaja so při zachodźe wohnjowoborneje šule w Narću. Wobdźělenje płaći pjeć eurow, potuńšene tři eura.

Dokelž dyrbješe předstajenje komedije „Kurowa klinika ,Wjesoła mysl‘“ dźiwadłoweje skupiny Šunow-Konje­cy w Lejnjanskim Kubicec hosćencu chorosće dla wupadnyć, to lajscy dźiwadźelnicy zajutřišim w 16 hodź. w Šunowskej Fabrikskej hospodźe ­nachwataja. To budźe zdobom poslednje předstajenje. Tež tuta hra je dotal wulki wothłós žnjała. Foto: Feliks Haza

Wodorunje: 3 dojutrowny čas, 5 muske předmjeno, 6 europske horiny, 7 drohotny płat, 10 škitna wobalka štoma, 13 přebywanišćo po šuli, 14 myslička, 15 sibirska rěka

Padorunje: 1 sydlišćo, 2 jednotka wahi, 3 dźeń tydźenja, 4 družina bencina, 8 pólske město nad Wódru, 9 něhdy přistaw Roma, 11 typ němskich awtow, 12 koparski klub Amsterdama

Budyšin. Přizjewjenje nowačkow na Serbski gymnazij Budyšin za šulske lěto 2018/2019 do 5. lětnika je wot 1. do 7. měrca w sćěhowacych časach: póndźelu, srjedu a štwórtk wot 7.30 do 16 hodź., wutoru wot 7.30 do 18 hodź. a pjatk wot 7.30 do 12 hodź. Za zapisanje trěbne su wu­pjelnjeny přizjewjenski formular, kubłan­ske poručenje zakładneje šule, narodźenske wopismo a połlětne wuswědčenje. Přizjewjenje za 6., 7. a 10. lětnik je w času wot 1. do 9. měrca póndźelu, srjedu a štwórtk wot 7.30 do 16 hodź., wutoru wot 7.30 do 18 hodź. a pjatk wot 7.30 do 12 hodź. Za zapisanje trěbne su wu­pjelnjeny přizjewjenski formular, narodźenske wopismo a połlětne wuswědčenje.