Z kucharjom Wjelbika warili

Montag, 14. November 2016
Artikel bewerten
(0 Stimmen)
W Ralbičanskej šulskej kuchni knježeše dźensa dopołdnja čiłe žiwjenje. Šulerjo 5. lětnika su wubědźowanje Ludoweho nakładnistwa Domowina dobyli a warjachu z Tomašom Lukašom wosebity menij.  Foto: SN/Maćij Bulank W Ralbičanskej šulskej kuchni knježeše dźensa dopołdnja čiłe žiwjenje. Šulerjo 5. lětnika su wubědźowanje Ludoweho nakładnistwa Domowina dobyli a warjachu z Tomašom Lukašom wosebity menij. Foto: SN/Maćij Bulank

Ralbičanscy šulerjo su dźensa dopokazali, zo su dobri kucharjo

Ralbicy (SN/MiR). 22 šulerjow 5. lětnika Ralbičanskeje wyšeje šule su dźensa dopołdnja z Tomašom Lukašom warili. Namjet kucharja Budyskeho hosćenca „Wjelbik“ předstajenje swojeje knihi „Warić z Tomašom“ z wubědźowanjom zwjazać, bě w serbskich šulach wulku zahoritosć zbudźiło. 13 požadanjow ze wšelakich šulow běchu do LND dóšli. Ralbičanscy šulerjo su prěnje myto, a z tym zhromadne hodźiny z Tomašom Lukašom dobyli. „Chcu šulerjam pokazać, zo móžeš při warjenju być jara kreatiwny. Recept hodźi so po potrjebje a přidawkach změnić“, wón rozłožuje. Warili su dźensa zhromadnje jabłučkowe koleska, ragou fin a šokolodźane brownije. „Sam warić je něšto hinaše hač sej něhdźe něšto kupić, štož słuša do wobłuka fastfood“, wón zwěsća. „Naši šulerjo su doma warili, wšelake recepty wuspytali a je fotografowali. Dale su zdźěłali kucharski ABC a nastał je wosebity spěw za wubědźowanje“, rjekny wučerka za serbšćinu Jana Bětnarjowa.
A tak su šulerjo tež na dźensnišim přepodaću knihi w Ralbičanskej starej šuli Tomašej Lukašej, jeho sobudźěłaćerjej Andreasej Fischerej kaž tež lektorce Ludoweho nakładnistwa Domowina Weronice Žurowej zanjesli swoju „Kołbasu“. „Za LND běše wudaće knihi dobra składnosć na wosebite wašnje zjawnje na nowosć skedźbnić. Je wšak to prěnja kucharska kniha za dźěći, kotruž smy wudali“, praji Weronika Žurowa. „Zwěsćich, zo nałožuja šulerjo cyle wědomje serbskorěčne zapřijeća, kotrež su sej nadźěłali a tež te, kotrež wšědnje wužiwaja“, rjekny wučer za serbšćinu w Ralbicach Jan Rjeda, kiž bě w běhu dopołdnja wužił składnosć šulerjow při warjenju wobkedźbować.
Veröffentlicht in Kubłanje
Bitte anmelden, um einen Kommentar zu posten

Anzeige