Wokrjesna ludowa uniwersita ma zaso nowe poskitki

Budyšin (SN/mwe). Lětuši nazymski semester Budyskeje wokrjesneje ludoweje uniwersity je so minjenu póndźelu po lětnich prózdninach zahajił. „Kaž přeco mamy něhdźe 300 kursow w poskitku – a to w fachowych wobłukach towaršnosć, kultura, strowotnistwo, rěče a po­wo­łanje. We wokrjesu je po přeću tež móž­no, wšelake kursy na wsach a w nakromnych kónčinach přewjesć – po će­žišćach pak su wone w našich re­gio­nal­nych městnosćach w Budyšinje a Kamjencu kaž tež w Radebergskej wot­nož­ce. Nimo toho mamy poskitki tež na dru­hich městnach – po potrjebje orientowane“, Klaus Helbig, nawoda Budyskemu wokrjesej přisłušaceje institu­cije, Serbskim Nowinam na naprašowanje zdźěli.

Najwjace poskitkow maja w fachowymaj wobłukomaj rěče a strowotnistwo. Při tym su kursy na polu fitnesy najbóle prašane. To rěka, zo so tež na ludowej uniwersiće požadanja ludnosće za moder­nym a strowym žiwjenjom wotbłyšćuja.