Šule su zawrjene, šulerjo a wučerjo pak maja swoje nadawki
Budyšin/Chrósćicy/Radwor (SN/MiR). Budyski Serbski šulski a zetkawanski centrum (SŠZC) je zawrjeny. Šulerjo a wučerjo su coronawirusa dla, kotryž běchu pola šulerja zwěsćili, doma. We wšitkich třoch kubłanišćach pak běchu wčera nawodnistwa přitomne. Nawodnica zakładneje šule Annette Natušowa: „Krizowy stab postaja, kotre nadawki mamy wukonjeć.“ Nawodnica wyšeje šule Borbora Krječmarjowa pak na naprašowanje SN zdźěli, zo njesmě medijam žane informacije dać. Kaž nawoda Serbskeho gymnazija René Wjacławk rjekny, „je z hnydomnym skutkowanjom šulski wotběh zakónčeny. Nowe informacije šěrimy na našej internetnej stronje. Wuknjacy měli so po tym puću wobhonić, kotre nadawki maja spjelnić.“ Wot dźensnišeho ma šulske twarjenje dospołnje, to rěka tež za wšitkich sobudźěłaćerjow zawrjene być. Tuž su tam wčera po minutowskim takće na nowe informacije ze strowotniskeho zarjada čakali.