W Slepom móža so šulerjo wšědnje wody napić, kelkož so jim chce

Budyšin (SN/MiR). Horcota, kotraž prěni tydźeń noweho šulskeho lěta knježi, wowliwuje wuwučowanje na šulach. Kak kubłanišća z tym wobchadźeja?

Na Budyskim Serbskim gymnaziju wot srjedy hač do jutřišeho šulsku hodźinu wot 45 minutow na poł hodźiny skrótša. Tak su to tež loni činili. „Wuwučujemy konsekwentnje w blokach, potajkim w dwójnych hodźinach. Z přechodnym rjadowanjom horcoty dla maja šulerjo z tym nětko stajnje 60 minutow wučby w jednym předmjeće“, rozjasnja šulski nawoda René Wjacławk. Z tym je skrótšenje lěpša warianta, hač hdy bychu poslednje hodźiny wupadnyli.

W Ralbicach na wyšej šuli maja wot srjedy skrótšene hodźiny, nic pak wupad wučby. W rjadowniskich rumnosćach na zakładnej šuli njeje dopołdnja hišće přehorco. „Wšako su nocy poměrnje chłódne a domownik rano zahe wšitke wokna zwočinja“, zdźěli šulska nawodnica Andrea Liehnowa. Tutón tydźeń matej 1. lětnikaj jenož štyri hodźiny wučby wob dźeń a wšě dalše lětniki zakónča wučbu w 12.25 hodź., po pjatej hodźinje. Šulerjo du potom do horta abo domoj.