Ze skupinu za pintlaškow w Budyšinje za swoje kubłanišćo wabja

Budyšin/Miłoćicy (SN/MiR). Za kubłanišća so přichodne lěta z wěstosću tójšto změni, dokelž budźe mjenje dźěći. Dotal bě to nawopak: Nošerjo pytachu kubłarjow a šule – přeco hišće – wučerjow. Tomu­ w bliskim přichodźe wjace tak njebudźe, znajmjeńša nic hladajo na pěstowarnje.

Z widom na to so nawodnica Serbskeje pěstowarnje „Jan Radyserb-Wjela“ w Budyšinje, Grit Henčlowa ze swojim teamom nětko wo to prócuje, zo bychu wjace dźěći do přebywanišća wabili. „Nimamy wjace telko přizjewjenjow kaž zašłe lěta“, wona w rozmołwje ze SN naspomni. „Přičiny za to znajemy. Njeje so w minjenych třoch lětach hižo telko dźěći narodźiło kaž lěta do toho. Na to dyrbimy so nastajić.“ W lětach do 2022 bě jich telko zajimcow za městna w tutej pěstowarni, zo dyrbjachu požadarjow samo wotpokazać.